Ո՞վ իրավունք ունի հայ տղամարդուն համբալ անվանել (տեսանյութ)

Այսօր Գավառում տեղի ունեցած միջադեպը թե սոցցանցերում, թե  լրատվական դաշտում  բուռն քննարկման առարկա է դարձել: «Հայ-ռուսական միավորում» կազմակերպության ղեկավար, նախկին Առաջադիմական սոցիալիստական կուսակցության նախագահ Ռոբերտ Ահարոնյանը  հայհոյել  ու վիրավորել է «Կանանց ռեսուրսային կենտրոնի» տնօրեն Լարա Ահարոնյանին: Միջադեպի առնչությամբ  armlur.am-ը զրուցեց  Ռոբերտ Ահարոնյանի հետ:

-Պրն Ահարոնյան, դուք 2013-ին առաջադրել էիք ձեր թեկնածությունը  նախագահական ընտրություններում: Սակայն միջադեպի առնչությամբ Ձեզ քննադատողները մի  հարց են տալիս` ինչպե՞ս կարող է նախագահի աթոռին հավակնողը տարանջատում մտցնել սփյուռքահայերի ու հայաստանցիների  միջև:

-Ես նախ և առաջ հայ եմ, հետո նոր նախագահի թեկնածու ու քաղաքական ինչ-որ  ուղղության պատկանող: Ես ցավում եմ, որ սփյուռքահայերը  Հայաստանում զբաղվում են  նման գործունեությամբ (նկատի ունի կանանց ռեսուրսային կենտրոնի գործունեությունը-խմբ.): Այսօր արդեն երկրորդ անգամ ներկա եմ եղել մի դատի,  որի մասնակից  կողմերից ոչ մեկին չեմ ճանաչում: Պարզապես ներկա եմ գտնվել, քանի որ  համացանցում շատ էր խոսվում այդ դատի մասին:

Գենդերային հավասարության էդ ներկայացուցիչները էդ լկտի տեսքով, էդ  գույնզգույն մազերով… մենք մոռանում ենք մեր հայկական մտածելակերպը, մոռանում ենք, որ մեր պետության հիմքը ընտանիքն է: Սփյուռքահայերը եկել են Հայաստան  ի՞նչ անելու` քանդելո՞ւ մեր ընտանիքը,  մեր պետության  հիմքը: Յուրաքանչյուր հայ տղամարդ, եթե ապտակել  է իր կնոջը, վատ խոսք է ասել, ապա ոչ մի հայ կին իրավունք չունի դատարան դիմելու: Տվյալ կնոջ կողքին (նկատի ունի  դատավարության կողմերից մեկին` ընտանեկան բռնության զոհ դարձած Հասմիկ Խաչատրյանին-խմբ.) ոչ ոք կանգնած չէր (այդ կնոջ բարեկամները հրաժարվել են նրանից),բացի  գենդերային հավասարության ներկայացուցիչներից:

Ես, որպես հայ, զարմանում եմ, որ Քյավառի ժողովուրդը թույլ է տալիս գենդերներին մտնել այնտեղ: Էդ աղջկա ամուսնուն հարցնում են` պատրա՞ստ եք հետ ընդունելու Ձեր կնոջը, ամուսինը համարյա ասում է «հա», բայց երբ նայում է գենդերային հավասարության ներկայացուցիչներին, էդ լրբերին, կներեք,  ասում է` չէ, թող ինձնից հեռու մնա: Նույն հարցը տալիս են էդ աղջկան, ով ամաչում է, որ  մի քանի կոպեկի  համար իր խելքը լվացել են:

-Բայց  արդյոք պետք է բոլոր սփյուռքահայերի հասցեին նման կերպ արտահայտվել`ասելով, քշելու ենք բոլորիդ այստեղից: Չէ՞ որ շատ սփյուռաքահայեր  հայանպաստ գործունեություն են ծավալում:

-Ժամանակին կոմունիստական իշխանությունը բացեց սահմանները  և մեծ թվով սփյուռքահայեր Հայաստան եկան, բայց ոչ ոք չէր կարող մտածել, որ փողոցով անցնող իրար գրկած  սփյուռքահայերի կտեսնենք:

Բայց ես խոնարհվում են այն սփյուռքահայերի առաջ, որոնք մտածում են հայ ազգի բազմանալու համար, որոնք ընդունում  են մեր հայկական հողն ու ջուրը, մեր մտածողությունը:

-Ես ցավում եմ, որ մեր պետական այրերը գրանցում են նման ՀԿ-ների: Այդ ընտանիքի խուլ ու համար երեխային  հանձնել են մանկատուն:  Իսկ ամուսինը Քյավառում անուն-պատիվ ունեցող, հայտնի ընտանիքի երիտասարդ է: Նա բախտագուշակ Վարդիկի տղան է: Ամբողջ Հայաստանը ճանաչում է այդ ընտանիքին որպես Հայաստանի  օրինապաշտ ընտանիք:

-Իսկ որպես տղամարդ կարելի՞ է հայհոյել ու վիրավորել կնոջը, անկախ նրանից նա ի՞նչ կառույցի  ղեկավար է ու ի՞նչ գործունեություն է ծավալում:

-Քիչ անց Narod.am կայքում կտեսնենք  միջադեպի տեսանյութը, որտեղ երևում է`ինչպե՞ս են այդ  կանայք,  ոչ հասկանալի  տղամարդիկ  հայհոյում, հարձակվում ավտոմեքենայի վրա, բարձր հայհոյանքներով կանգնեցնում մեր մեքենան:  Բնականաբար, այսքանից հետո  հայ տղամարդը դուրս է գալիս ու ասում այն, ինչ պետք  է: Ավելին ասեմ ձեզ, երբ լրագրողներից մեկին հարցազրույց էի տալիս,  ռեպլիկներ էին բաց թողնում իմ հասցեին` «ինչո՞ւ եք եվրոպական կոստյում հագել, հանեք ձեր վրայից ձեր կոստյումը» ու նման սադրանքներ: Մեր մեքենայի հայ վարորդին ասել են «համբալ»: Ինչ-որ ներկած մազերով կին, ինչ-որ խորհրդի նախագահ կամ ղեկավար ի՞նչ իրավունք ունի  հայ տղամարդուն «համբալ»ասել:

Armlur.am-ը զրուցեց  կանանց ռեսուրսային կենտրոնի ղեկավար Լարա Ահարոնյանի  հետ` պարզելու` հնարավո՞ր է վիրավորանքների  ու հայհոյանքների համար նա դատարան դիմի:

«Ես դատարան չեմ դիմի: Այդ մարդն արտահայտեց իր մտացածը, որին համամիտ չեն շատերը: Մենք  մյուս անգամվա դատի համար պիտի խնդրենք ոստիկանությանը, որ ավելի շատ իրավապահներ լինեն էնտեղ, քանի որ ագրեսիվ էին տրամադրված այդ մարդիկ ու հարձակվում էին ակտիվիստների վրա»,- ասաց տիկին Ահարոնյանը:

Ինչ վերաբերում է Ահարոնյանի այն հայտարարությանը, որ սադրանքը սկսվել է «Կանանց ռեսուրսային կենտրոնի» մասնակիցների կողմից, տիկին Ահարոնյանն ասաց. «Ես չգիտեմ ով ի՞նչ է ասել, բայց ես, երբ դատարանից դուրս էլ գալիս, տեսա, որ Ահարոնյանը հարձակվում է մարդկանց վրա: Սկսեցի լուսանկարել, հետո նա  սկսեց ինձ հետ խոսել, թե դուք ով եք, ինչ եք: Դրանից դուրս ես այդ մարդուն չեմ տեսել»:

Լարա Ահարոնյանի խոսքով` Ռոբերտ Ահարոնյանը պարզապես արտահայտեց իր կարծիքը`ասելով, որ բռնությունն ընտանիքում պետք է լինի:

Տեսանյութը`Epress.am-ի:

Սոնա Դավթյան