«Ժողովուրդ»-ը տեղեկացավ, որ Սերժ Սարգսյանի եղբոր` Ալեքսանդր Սարգսյանի որդին վերջերս պաշտոն է ստացել: Հայկ Սարգսյանը Երեւանի քաղաքապետարանի Քաղաքաշինության եւ հողի վերահսկողության վարչությունում ավագ տեսուչ է աշխատում: Պարզեցինք, որ Սերժ Սարգսյանի եղբորորդուն քաղաքապետարանի այդ վարչություն են գործուղել հատուկ նպատակով. վերջինիս է վերապահված օլիգարխների եւ քրեական տարրերի կողմից ապօրինի զավթումների դեմ պայքարը: Երեւանի քաղաքապետարանի մեր աղբյուրներից հայտնի դարձավ, որ երբ Երեւանի քաղաքապետարանի մյուս աշխատակիցները` անկախ պաշտոնական դիրքից, չեն կարողանում ազդել ապօրինի հող զավթողի վրա, Հայկին են ուղարկում, որպեսզի «դիմակայի» օլիգարխներին: Ասում են` այդ ամենն արդյունք է տալիս, քանի որ մեր երկրում դժվար է աշխատել օրենքով: Մեզանում այլ բարքերն են ավելի արմատավորված: