«Հարսնաքար» ռեստորանային համալիրի տարածքում բռնարարքի աղմկահարույց գործով վերաքննիչ բողոքների քննությունը մակագրվել է ՀՀ քրեական վերաքննիչ դատարանի դատավորներ Սերգեյ Չիչոյանին՝ նախագահող դատավոր, և դատավորներ Եվա Դարբինյանին և Գագիկ Ավետիսյանին:
Վերաքննիչ բողոքներում պաշտպանական կողմը միջնորդում է ամբողջությամբ բեկանել և փոփոխել Ավան և Նոր-Նորք վարչական շրջանների ընդհանուր իրավասության դատարանի դատավճիռը, որով բոլոր վեց ամբաստանյալները մեղավոր են ճանաչվել ՀՀ քրեական օրենսգրքի 112-րդ հոդվածի 2-րդ մասի 6-րդ և 14-րդ կետերով՝ մի խումբ անձանց կամ կազմակերպված խմբի կողմից դիտավորությամբ առողջությանը ծանր վնաս պատճառելը, որն անզգուշությամբ առաջացրել է տուժողի մահը, 113-րդ հոդվածի 2-րդ մասի 1-ին և 3-րդ կետերով՝ մի խումբ անձանց կամ կազմակերպված խմբի կողմից երկու կամ ավելի անձանց նկատմամբ դիտավորությամբ առողջությանը միջին ծանրության վնաս պատճառելը, 118-րդ հոդվածով՝ ծեծը, և դատապարտել ազատազրկման 12 տարի ժամկետով և տուգանքի` նվազագույն աշխատավարձի հարյուրապատիկի չափով` 100 000 ՀՀ դրամի չափով:
Պաշտպանական կողմը միջնորդում է ամբաստանյալ Դավիթ Ադամյանի մասով կայացնել նոր դատական ակտ ` ճանաչելով և հռչակելով նրա անմեղությունը: Եվս երկու ամբաստանյալների մասով պաշտպանական կողմը միջնորդում է արդարացման դատական ակտ կայացնել, մասնավորապես, կողմը միջնորդում է դադարեցնել Արման Խաչատրյանի քրեական հետապնդումը՝ կայացնելով արդարացման դատական ակտ, իսկ Արման Բաղդասարյանի վերաբերյալ կայացնել արդարացման դատական ակտ կամ գործը նրա մասով ուղարկել նույն դատարան` նոր քննության:
Պաշտպանական կողմը երկու ամբաստանյալների մասով միջնորդում է վերաորակել մեղադրանքը, մասնավորապես, ամբաստանյալ Նորայր Հայրապետյանին մեղավոր ճանաչել ՀՀ քրեական օրենսգրքի 112-րդ հոդվածի 2-րդ մասի 14-րդ կետով՝ դիտավորությամբ առողջությանը ծանր վնաս պատճառելը, որն անզգուշությամբ առաջացրել է տուժողի մահը, 118 -րդ հոդվածով, նշանակել արդարացի պատիժ, իսկ ամբաստանյալ Գարիկ Մարգարյանին մեղավոր ճանաչել ՀՀ քրեական օրենսգրքի 113-րդ հոդվածի 1-ին մասով՝ դիտավորությամբ առողջությանը միջին ծանրության վնաս պատճառելը:
Ամբաստանյալ Արթուր Բաբլոյանի նկատմամբ պաշտպանական կողմը միջնորդում է կիրառել «ՀՀ անկախության հռչակման 22-րդ տարեդարձի կապակցությամբ համաներում հայտարարելու մասին» ՀՀ ԱԺ-ի որոշման համապատասխան մասի դրույթները և նրա մասով կարճել քրեական գործի վարույթը կամ նշանակել մեղմ պատիժ կամ նշանակված պատիժը պայմանականորեն չկիրառել:
.gif)
