Անահիտ Շահբազյանը հայ մի քանի երգիչների հետ Պաշտպանության նախարարության հրավերով արդեն երեք օր է` մի քանի զորամասերով համերգներով են հանդես գալիս: Armlur.am-ի հետ զրույցում երգչուհին ասաց, որ զինվորների համար կատարում են թե հայրենասիրական երգեր, թե այլ ժանրի ստեղծագործություններ: Թեև երգչուհին ջազային երգչուհի է, բայց կատարում է նաև այլ ժանրի երգեր:
«Ես իմ գործունեությունը սկսել եմ որպես էստրադային երգչուհի, բայց հետո հասկացա, որ ջազն ուրիշ մի երաժշտություն է, որով ավելի լուրջ պետք է զբաղվել»,- անկեղծացավ երգչուհին:
Ինչ վերաբերում է ջազի` հասարակության ընկալմանը, Անահիտը դրան չի սպասում: Նա կարծում է` արտիստը պետք է այնքան լավ արտիստ ու երգչուհի լինի, որ հասարակությունը ընդունի նրա երգացանկը: «Ես կարևորում եմ մնայունն ու որակյալը, չեմ անում այն, ինչ դուր է գալիս մարդկանց, այլ անում են այն, ինչ ինձ է դուր գալիս»,- ասաց մեր զրուցակիցը:
Անահիտ Շահբազյանը ցանկություն ունի մասնակցել Եվրատեսիլ մրցույթին, բայց առայժմ դրա մասին չի մտածում, քանի որ իր առջև դրել է խնդիրներ: «Ունեմ ջազային իմ նորաստեղծ խումբը, որի հետ փորձում ենք մնայուն արժեքներ ստեղծել»,- մանրամասնեց երգչուհին:
Երգչուհուց նաև հետաքրքրվեցինք` բացի ստեղծագործական փոփոխություններից, անձնական կյանքում նորություններ կլինեն: «Դե, առայժմ, չկան նորություններ»,- ասաց երիտասարդ ստեղծագործողը, հավելելով, որ առայժմ նա իր կյանքի կեսին չի գտել:
Սոնա Դավթյան
.gif)
