Երևանի համար 91 դպրոցի 6-րդ դասարանի ծնողներն ու ծնողխորհրդի նախագահը եկել էին «Ժողովուրդ» օրաթերթի խմբագրություն և իրենց վրդովմունքն էին արտահայտում 6-րդ դասարանի աշակերտ Սարգիսի մայրիկի` Գայանե Հարությունյանի հայտարարության վերաբերյալ:
Հիշեցնենք, որ այսօր «Ժողովուրդ» օրաթերթը գրել էր, որ 91 դպրոցի 6-րդ դասարանի աշակերտ Սարգիսի մայրը պատրաստվում է իր երեխային տեղափոխել դպրոցից, քանի որ ինչպես հայտարարել էր ծնողը, ուսուցիչը վիրավորել է իր երեխային`ասելով. «Շան տեղ չդնեք»:
Նամակում մասնավորապես ասված է. «Ուր ենք գնում, ուր ենք հասել: Ո՞վ է թույլ տվել ինչ-որ մեկի անհիմն ստահոդ հայտարարություններից ելնելով` վարկաբեկել ուսուցչի, մի ողջ դպրոցի անբասիր անունը: «Մի կաթիլ մեղրի» բովանդակությամբ աղմկոտ հոդվածները վիրավորում են ուսուցիչներին, որոնք առանց չափազանցության, ամեն օր հերոսանում են իրենց աշխատանքով` ցուցաբերելով հանդուրժողականություն, համբերատարություն, հոգեբանի մեծ հմտություն:
Մերօրյա աշակերտակենտրոն քաղաքականությունը ճշգրտորեն է ընկալվում և տարվում մանկավարժների կողմից, մինչդեռ որոշ ծնողներ ցավալիորեն խեղաթյուրված են պատկերացնում այն` կարծելով, և ինչու ոչ, նույնիսկ իրենց երեխաներին տրամադրելով, թե դա ամենաիսկական ամենաթողությունն է և անպատժելիությունը: Դրա արդյունքում մենք ունենք այն, ինչ ունենք: Ցավով պետք է նշել, որ ընտանիքը (միակ զավակին հիվանդագին սիրելու պատճառով) շարունակ ապակողմնորոշել է որդուն` դաստիարակելով նրան երեսպաշտության ոգով, ինչը հանգեցրել է դասարանի առօրյան և դասապրոցեսը միտումնավոր խանգարելու բազմաթիվ փորձերին, դարձրել երեխային անհաշտ ու անհանդուրժող:
Սարգիսն այսօր չունի մտերիմ ընկերներ (չնայած դասղեկի և ծնողխորհրդի գործադրած ջանքերին), դրսևորում է տարօրինակ վարքագիծ` հաճախ է ստում, դիմում բանսարկության, վիրավորում մյուսներին, անհարգալից արտահայտություններ թույլ տալիս ուսուցիչների մասին, փորձում է ուսուցիչներին կանխամտածված հունից հանել: Դրա վառ արտահայտությունն է շանտաժը մարտ ամսին Ն.Էդուարդովնայի հետ պատահած դեպքի (իբրև թե ոտքով իրեն հարվածել է):
Հարցը քննարկվել է տնօրենի մոտ, աշակերտները տվել են իրենց մեկնաբանությունները տեսածի մասին, որով հստակ է դարձել, որ ուսուցչուհին ոտքով չի հարվածել, այլ դիտողություն է արել և կոչել աշակերտավայել վարքագիծ ցուցաբերել: Նույն դասարանի աշակերտների հավաստմամբ բարեհամբույր դասղեկ Ն. Լալայանը չունի կոպիտ արտահայտություններ անելու սովորություն և նրա ուշադրության կենտրոնում են բոլոր աշակերտները հավասարապես:
Ծնողական ժողովներին մասնակցելու տիկին Գայանեին ուղղված մյուս ծնողների հորդորները այս տարի ապարդյուն են անցել. նա չի մասնակցել և ոչ մի ծնողական ժողովի` բոլորին անվանելով «անդաստիարակներ և բոմժեր»:
Ինչ վերաբերում է դրամահավաքին, անձը վիրավորող արտահայտությանը և և այլն, սոսկ զրպարտություն է: Ում հայտնի չէ, որ այսօր դպրոցների խոցելի տեղը դրամահավաքն է. ուրեմն ինչու չլրացնել ստերի շարքը ևս մեկով…:
Մեր դպրոցում դրամահավաքի մասին խոսք լինել չի կարող, քանի որ վերջին 2 տարվա ընթացքում վերադասի խիստ հսկողությամբ և պահանջով այն առհասարակ չի կատարվում:
Հերոստրատն այրեց Արտեմիսի տաճարը…
Ցավալի է, իհարկե, երբ քավության նոխազ են դարձնում կրթության և դաստիարակության գործին անմնացորդ ու անշահախնդիր նվիրված մարդկանց»:
.gif)
