Չի բացառվում`Ուորլիքի հայտարարությունը հետագայում փոխվի. Դավիթ Բաբայան

ԼՂՀ նախագահի մամլո քարտուղար Դավիթ Բաբայանի հետ armlur.am-ը զրուցեց ամերիկացի համանախագահ Ջեյմս Ուորլիքի վերջին հայտարարությունների մասին:

-Պրն Բաբայան, ինչպե՞ս եք արձագանքում Ջեյմս Ուորլիքի այն հայտարարություններին, ստատուս քվոյի` Ղարաբաղում կայուն չլինելու, օկուպացված տարածքները Ադրբեջանին վերադարձնելու մասին:

– Մեզ համար վերադարձ անցյալին չկա: Մենք չունենք օկուպացված տարածքներ:

 – Արդյոք ստատուս-քվոն Ղարաբաղում կայուն չէ՞, որի մասին հայտարարում է ամերիկացի համանախագահը:

– Ես  նման բան չեմ տեսնում: Ապակայունացման փորձեր, հիստերիկ պահվածք տեսնում ենք Ադրբեջանի կողմից:

-Արդյոք ՀՀ և Ադրբեջանի նախագահների առաջիկա հանդիպումը ԼՂ կարգավորման հարցում նոր լուծում կտա կամ բեկումնային վիճակ կմտցնի բանակցային գործընթացում:

– Գիտեք, հանդիպումները կարևոր են, քանի որ նպաստում են խաղաղության և կայունության պահպանմանը: Բայց բանակցային գործընթացում բեկում առաջացնելու համար անհրաժեշտ է փոխել Ադրբեջանում տիրող իրավիճակը:

Այնտեղ սարսափելի պետություն է, ֆաշիստական պետություն է  ստեղծվում: Միջազգային հանրությունը   պետք է սրա վրա ուշադրություն դարձնի:

-Ջեյսմ Ուորլիքի մասին հայտարարությունը շատերը բացատրում են աշխարհաքաղաքական գործընթացների համատեքստում, մասնավորապես` Հայաստանի` Մաքսային միությանն անդամակցությունը Արևմուտքը դիտարկում է իրեն դեպի մեջքով շրջվել, այդ պատճառով էլ հնչում են նման հայտարարություններ:

– Չեմ ուզում այս ամենը կապել աշխարհաքաղաքական գործընթացների հետ: Մեզ համար մի բան է  հստակ` մենք չենք առաջնորդվում «կամ»- «կամ» սկզբունքով, այլ  առաջնորդվում ենք «և´»-«և´» մոտեցմամբ:

Իսկ ինչու  «և´»-«և´» մոտեցում, քանի որ մենք ունենք Սփյուռք, հետևաբար, Հայաստանը պետք է լավ հարաբերություններ պահպանի բոլոր այն պետությունների հետ, որտեղ կա հայկական սփյուռք:

-Այսինքն` ասել, որ Հայաստանի` Մաքսային միության անդամակցությունը վատ է անդրադառնում ԼՂ բանակցային գործընթացի վրա, ճիշտ չէ՞:

-Ո’չ, չեմ կարծում: Մաքսային միությունը անդամակցությունը լավ հնարավորություններ կստեղծի տեղական արտադրության զարգացման համար:

-Ուորլիքը, բացի այդ օկուպացված տարածքներից ու ստատուս քվոյի անկայուն լինելուց, խոսում էր խնդրի կարգավորման այլ կետերի մասին ևս: Ընդունելի են դրանք ԼՂՀ-ի համար:

– Նման կետերի առաջարկը չի նշանակում, որ դրանք պետք է ընդունվեն: Դա բանակցությունների խնդիր է: Կողմերից մեկը, օրինակ, Ադրբեջանը կարող է դրանք ընդունել, իսկ մենք ասել` չենք ընդունում և շարունակել բանակցությունները:

-Պրն. Բաբայան, այնուամենայնիվ, ամերիկացի համանախագահի այս հայտարարությունը, որը ԼՂ խնդրի համար դիտարկվեց որպես սուբյեկտիվիզմի դրսևորում, ինչո՞վ է պայմանավորված:

-Գիտե՞ք, մեկ-երկու տարիների ընթացքում մենք հասանք նրան, որ ԱՄՆ-ի երկու քաղաք ճանաչեց ԼՂ անկախությունը, ավելին` Ուորլիքի հայտարարությունից հետո Կալիֆորնիան ճանաչեց Արցախի անկախությունը:

Հետևաբար, ԱՄՆ-ը միայն դիտարկել որպես Ուորլիքի կամ միայն պետդեպարտամենտի մոտեցումներով, ճիշտ չէ, որովհետև ԱՄՆ-ը բարդ ու բազմաշերտ երկիր է: Ուորլիքը հայտարարությունն ու տեսլականը պետք է դիտարկել ԱՄՆ-ի շահերի համատեքստում:

Այդ տեսլականը, սակայն, կարող է փոխվել: Չկան հավերժական մոտեցումներ կան միայն շահեր, հանգամանքներ, որոնք կարող են փոխել այդ տեսլականը: Չի  բացառվում, որ Ուորլիքի հայտարարությունը հետագայում փոխվի:

Սոնա Դավթյան