Armlur. am -ին ՀՀ Կապի եւ տրանսպորտի նախարարությունից տեղեկացնում են, որ Ժնեւում աշխատանքն է սկսել Հեռահաղորդակցության միջազգային միության (ITU) Համաշխարհային ռադիոհաղորդակցության կոնֆերանսը (WRC-12), որին մասնակցում է նաեւ ՀՀ տրանսպորտի եւ կապի նախարար Մանուկ Վարդանյանի գլխավորած պատվիրակությունը:Կոնֆերանսը սկսվել է լիագումար նիստով, որտեղ ընտրվել են ղեկավար կոմիտեի նախագահը և տեղակալները, Լիազոր, խմբագրական եւ ֆինանսական կոմիտեների, ինչպես նաև հետազոտական խմբերի նախագահները և տեղակալները: Ի դեպ, կոնֆերանսի ղեկավար կոմիտեի փոխնախագահ է ընտրվել ՀՀ տրանսպորտի եւ կապի նախարարի խորհրդական Ալբերտ Նալբանդյանը:Միջոցառման շրջանակներում նախարար Մանուկ Վարդանյանը հանդիպումներ է ունեցել մի շարք բարձրաստիճան պաշտոնյաների հետ, այդ թվում` Հեռահաղորդակցության միջազգային միության գլխավոր քարտուղար Համադուն Տուրեի եւ անդրադարձել առաջիկայում իրականացվելիք ծրագրերին: Նախարար Մ.Վարդանյանը երկուստեք հետաքրքրություն ներկայացնող հարցեր է քննարկել Սերբիայի, Լեհաստանի եւ Չինաստանի իր գործընկերների հետ հանդիպման ժամանակ: Նշենք, որ հունվարի 23-ից մինչեւ փետրվարի 17-ը ընթացող ռադիոկոնֆերանսի ժամանակ կքննարկվեն աշխարհում ռադիոհաղորդակցության նշանակությանը, զարգացմանը, որակի կատարելագործմանը և տեխնոլոգիաների նորամուծություններին վերաբերող հարցեր:
.gif)
