Armlur.am-ն այսօր կոմպոզիտոր Ռոբերտ Ամիրխանյանից հետաքրքրվեց` արդյոք ճիշտ է համարում իր գործընկերոջ Շուշան Պետրոսյանի հայտարարությունը լրագրողների մասին:
Հիշեցնենք, որ երգչուհին լրատվամիջոցների ներկայացուցիչներին վիրավորել էր` նրանց անվանելով անբարոյական:
Ամիրխանյանի կարծիքով` Շուշան Պետրոսյանի ասածը նույնն է, թե ասել, որ բոլոր երգիչներն անբարոյական են: «Կան երգիչներ, որ հայկական երգերի մեջ օտար ելևէջներ են մտցնում, որ երգը դարձնում են ծախու ապրանք, բայց կան երգիչներ, որոնք բարեխիղճ կատարում են իրենց գործը: Նույն երևույթը կա նաև լրագրողների շրջանում: Հետևաբար, ընդհանրական հայտարարություն անելը բոլոր լրագրողների հասցեին՝ ճիշտ չէ»,- ասաց կոմպոզիտորը:
Նրա կարծիքով` սովորաբար նման հայտարարություն անում են այն ստեղծագործողները, որոնք ուզում են ինքնահաստատվել, բայց չի կարծում, որ Շուշան Պետրոսյանն ինքնահաստատվելու խնդիր ունի: «Նա այդ մարդկանց շարքում չէ»,- նշեց կոմպոզիտորը:
Արվեստագետի խոսքով` ամեն քայլափոխի ստեղծագործողներին մեկնաբանում են. «Մի խոսք կա, ասում են` չեմ վախենում` ինձ կհասկանան, թե ոչ: Ես վախենում եմ, որ ինձ սխալ մեկնաբանեն: Ուղղակի մեզ հարկավոր է ապրել այնպես, որ մեզ ուրիշները չմեկնաբանեն»:
Սոնա Դավթյան
.gif)
