Ռուսաստանում քրեական աշխարհում հարաբերական անդորրը, որը կապված էր Օլիմպիական խաղերի անցկացման հետ, հետզհետե վերանում է: Արտասահմանից ՌԴ է վերադարձել մոտ 50 «օրենքով գող», և գրեթե ամեն օր տեղի են ունենում քրեական հավաքներ ու վեճեր:
Հիշեցնենք, որ 2013 թվականին՝ Սոչիի Օլիմպիական խաղերին ընդառաջ, շատ «օրենքով գողեր» լքել էին Ռուսաստանի սահմանները: Դա եղել էր այն ժամանակ, երբ իրավապահները բացատրական աշխատանքներ էին կատարել նրանց առաջնորդների հետ և բացատրել «խաղի կանոնները»՝ կապված օլիմպիական խաղերի անցկացման հետ:
«Օրենքով գողերին» զգուշացվել էր լքել երկիրը երկար ժամանակով, հակառակ դեպքում՝ իրավապահները խոստացել են ակտիվության առաջին իսկ դրսևորման դեպքում ձերբակալել նրանց, իսկ երկրի քաղաքացի չհանդիսացող մարդկանց՝ արտաքսել երկրից:
Շատ գողեր նախընտրել էին հեռանալ Եվրոպա, իսկ ովքեր մնացել էին ՌԴ-ում, փորձել են իրենց հանգիստ ու աննկատ պահել: Օրինախախտները ձերբակալվել են:
Վերջերս նրանց վրայից հանվել էր արգելքը, և ավելի քան 50 «օրենքով գող» վերադարձել էր հայրենիք:
Այս ընթացքում թե՛ վերադարձած «օրենքով գողերը», թե՛ Ռուսաստանում եղածներն ապրիլից ակտիվություն են դրսևորում՝ կազմակերպելով մեծ հավաքներ և հաշվեհարդար տեսնելով թշնամիների հետ: Գործընթացը դեռևս հանգիստ է ընթանում, սակայն օրինապահները պնդում են՝ դա երկար չի տևի:
Ակտիվ հավաքներից մեկի ժամանակ «օրենքով գողի» իր կոչումից զրկվեց ռուսական քրեական աշխարհում «լեգենդ» համարվող Ալեքսանդր Սեվերովը (Սաշա Սեվեր):
Հենց նրան էր ժամանակին նվիրվել Միխայիլ Կրուգի հայտնի «Владимирский централ» երգը:
Ինչպես հայտնել է օրինապահ մարմիններում եղած աղբյուրը, նշված հավաքը կազմակերպել էր Սերգեյ Վոլկովը՝ «Վոլչոկ» մականունով:
Հավաքին մասնակցել են նաև քրեական աշխարհի այլ հայտնի ներկայացուցիչներ. արդյունքում որոշվել է «օրենքով գողի» կոչումից զրկել քրեական աշխարհում հայտնի 55-ամյա Սաշա Սեվերին, ով արդեն հասցրել է 10 անգամ դատապարտվել:
Աղբյուրի համաձայն՝ Սեվերին պարտադրվել է հրաժարվել գողական ավանդույթներից՝ հեռուստաալիքներին տված հարցազրույցների պատճառով: Վոլչոկը դժգոհել է նաև նրանցից, ում Սեվերը ժամանակին գումար է տրամադրել ընդհանուր «օբշագից»:
Հիշեցնենք, որ Վոլչոկի ու Սաշա Սեվերի միջև հարաբերությունները լարված էին տարիներ շարունակ. երկուսի իշխանությունն էլ տարածվում է Տվերի մարզում, և այդ ընթացքում ոչ մեկ անգամ էր տարաձայնություն ծագել նրանց միջև տարածքները վերաբաշխելու հարցի շուրջ:
Աղբյուրը նաև հիշեցնում է, որ պարբերաբար հավաքներ է իրականացնում նաև ազգությամբ հայ՝ «օրենքով գող» Էդուարդ Ասատրյանը (Էդիկ Ասետրինա):
Ռուսաստան վերադառնալով՝ նա էլ ավելի է հզորացրել իր կլանը, որի անդամների թիվն օրեցօր աճում է և քրեական աշխարհում մեծ դիրք է գրավում:
.gif)
