ԺԱՆՏԱԽՏԻ ՕՐՈՔ ՔԵՖ ՈՒ ԽՐԱԽՃԱՆՔ ՉԻ ԿԱՐՈՂ ԼԻՆԵԼ

Շուշիի առանձնակի գումարտակի նախկին հրամանատար Ժիրայր Սէֆիլյանը «Ժողովուրդ»-ի հետ զրույցում հայտարարեց, որ մայիսի 16-ին իրենք լինելու են Ազատության հրապարակում:

-Պարոն Սէֆիլյան, տարբեր քաղաքական ուժեր, վերջին շրջանում նաեւ ԱԺ ԲՀԿ-ական պատգամավորներ, փորձ են անում միավորել այն ազատամարտիկներին, որոնք փողոց են դուրս եկել ու պայքարում են իրենց սոցիալական խնդիրների լուծման համար: Դուք ինչո՞ւ չեք «խառնվում» այդ գործընթացներին, ինչո՞ւ որեւէ արձագանք չկա Ձեր կողմից:
-Ազատամարտիկների դաշտը հետպատերազմյան ժամանակաշրջանից սկսած` այս ավտորիտար ռեժիմի կողմից միշտ ուշադրության ներքո է եղել: Այսինքն՝ նրանք միշտ զբաղվել են այդ դաշտի վերահսկելիությունն իրենց ձեռքում պահելով: Ու պարբերաբար այդ դաշտում տեղի են ունեցել դասավորումներ, մերթընդմերթ ուժեղացել է Երկրապահը, մերթընդմերթ պառակտվել է, մերթընդմերթ պատերազմի մասնակիցներին իրար դեմ են դուրս բերել` հատուկ իշխանությունների կողմից պլանավորած ձեւով: Իսկ վերջին ծրագրերը, քայլերը տեղավորվում են հենց այս տրամաբանության մեջ, այսինքն՝ իշխանությունները շարունակում են նույն ոճով` նպատակ ունենալով այդ դաշտի վերահսկելիությունը պահել իրենց ձեռքում: Սակայն ես կարծում եմ, որ ամեն ինչն էլ չափ ու սահման ունի, ու վերջապես այն մարդկանցից բացի, որոնք ծախու են, կան նաեւ ազատամարտիկներ, որոնք ծախու չեն: Կարող է՝ նրանք քանակով շատ չեն կամ բոլորի կողմից չեն նշմարվում, որովհետեւ չծախու ազատամարտիկները հասարակական գործունեությամբ չեն զբաղվում: Ես համոզված եմ, որ նվիրյալների բանակը ուշ թե շուտ համախմբվելու է ազատագրական դրոշի ներքո:
-Այսօր ազատամարտիկներն իրենց սոցիալական խնդիրները լուծելու համար կարծես թե պատրաստ են ցանկացած ուժի հավատալ, չե՞ք կարծում, որ դա վտանգավոր է եւ դրա դեմ պետք է քայլեր ձեռնարկել:
-Դժբախտաբար, այսօր ազատամարտիկներից շատերը սոցիալապես շատ վատ վիճակի մեջ են եւ նրանցից ոչ բոլորն են պատրաստ չվաճառվել: Ես չեմ ուզում ինչ-որ մեկին մեղադրել, որովհետեւ մարդիկ ընտանիքի տեր են ու ստիպված են հանուն իրենց երեխաների դա անել, օրվա հացի խնդիր լուծել: Սակայն մենք լուծումը պետք է պահանջենք այն հատվածից, որը մինչ օրս կարողացել է անկաշառ մնալ: Իսկ մեր պահանջը նրանցից պետք է լինի այն, որ օր առաջ ակտիվանան եւ, ի վերջո, իրենց ունեցած պոտենցիալը ներդնեն մեր պատկերացրած քաղաքական պայքարի մեջ:
-Բայց այնպիսի տպավորություն է, որ Դուք էլ եք «նեղացածի» կարգավիճակում ու, կարելի է ասել, որեւէ խնդրի չեք «խառնվում»: Ինչո՞ւ ակտիվ չեք: Ձեր համակարգած «Նախախորհրդարան»-ի կողմից միայն հայտարարություններ են արվում եւ վերջ, գործնական որեւէ բան չկա: Կարելի է ասել՝ Ձեր վերջին ակտիվությունը նկատվել է «Փակ շուկա»-ի պայքարի ժամանակ ու վերջ: Մի՞թե դա ՀՀ-ում միակ խնդիրն էր:
-Ինչ-որ չափով աղավաղում եք մեր գործունեությունը: Եթե դուք կարծում եք, որ իմ տեսակի մարդու գլխավոր նպատակը «փակ շուկան» էր, ապա չարաչար սխալվում եք: Ուրեմն ասեմ, որ մենք շատ ակտիվ ենք, ես անձնապես շատ ակտիվ եմ, առավոտից մինչեւ երեկո զբաղվում եմ հասարակական-քաղաքական գործունեությամբ եւ ոչ անձնական կյանքով, սա գիտեն բոլորը: Ինչ վերաբերում է «Ծածկած շուկա»-ին, ապա մենք բազմաթիվ խնդիրներով ենք զբաղված եղել, հիշեք նաեւ Մաշտոցի պուրակը, աշխատանք, որն արդյունք է տվել: Ըստ էության, ես եղել եմ աջակցողի դերում: Իսկ «Փակ շուկա»-ի դեպքում, մեր խնդիրն այնտեղ մտնելը չէր, մեր խնդիրն այդ պայքարը հնարավորինս քարոզչական միջոցների ուշադրության տակ պահելով, ամբողջ օլիգարխիկ համակարգը ջրի երես հանելն էր: Մենք ապացուցեցինք, որ ամբողջ ուժային համակարգը կանգնած է մեկ օլիգարխի թիկունքում: Մեզ հաջողվեց այդ ամենը ֆիկսել լուսանկարներով եւ ապացույցներով ներկայացնել: Մենք ջարդել ենք այն միֆը, որ այդ հանցագործների դեմ խաղ չկա: Ուզում եմ ասել՝ մենք զբաղված ենք բազմաթիվ գործերով:
-Խնդրում եմ կոնկրետ նշեք Ձեր հետագա քայլերը:
-Մայիսի 16-ին մենք լինելու ենք Ազատության հրապարակում, մենք ասում ենք, որ ծրագրային պայքարն, ըստ էության, հետեւանքի հետեւից գնալու պայքար է: Այս տարիների ընթացքում տեղի ունեցած պայքարն անիմաստ չէ, բոլորն էլ կարեւոր են եղել, անկախ այն հանգամանքից` արդյունք եղել է, թե ոչ: Այս ռեժիմը չի լինելու հարատեւ, մի օր տեղի է ունենալու իշխանափոխություն, եւ բոլոր հանցագործությունները պետք է բացահայտվեն, իսկ հանցագործները պատասխան տան:
-Ինչպե՞ս եք տոնելու Մայիսի 9-ը, լինելո՞ւ եք Արցախում:
-Ոչ, ես այստեղ եմ լինելու, երբ ժողովրդի զգալի մասը սոցիալապես խայտառակ կարիքավոր վիճակի մեջ է, մենք ինչպես կարող ենք տոն կազմակերպել: Ժանտախտի օրոք քեֆ ու խրախճանք ենք անում, մեր տեսակն այդ հոգեվիճակին չի կարող լինել: Դա հարիր է տականքին, որին դուք ականատես եք 22 տարի:

Զրուցեց ՍՈՆԱ ԳՐԻԳՈՐՅԱՆԸ