Ուկրաինայում տեղի ունեցած նախագահական ընտրությունների տվյալներով` ամենայն հավանականությամբ Ուկրաինայի նախագահի պաշտոնը կստանձնի Պյոտր Պորոշենկոն: Թե ինչքանով նա կկարողանա Ուկրաինան դուրս բերել այս վիճակից, armlur.am– ի զրուցակից Ռազմավարական և ազգային հետազոտությունների հայկական կենտրոնի (ՌԱՀՀԿ) տնօրեն, քաղաքագետ Մանվել Սարգսյանը կարծում է` դեռ վաղ է խոսել. «Դեռ պարզ չէ` Լուգանսկում ու Դոնեցկում իրադարձությունները ոնց կզարգանան: Բացի այդ` արդյոք Ռուսաստանը կճանաչի ընտրության արդյունքները»:
Մանվել Սարգսյանին մտահոգում է այն, որ Ուկրաինայի բնակչության մոտ 55,9 տոկոսը ձայնը տվել է Պորոշենկոյին, ում Մ. Սարգսյանը համարում է օլիգարխիայի ներկայացուցիչ, բացի այդ` 55,9 տոկոսը վկայում է այն, որ որ ոչ բոլորն են կողմ, որ նախագահի պաշտոնը ստանձնի օլիգարխիայի ներկայացուցիչը:
ՌԱՀՀԿ տնօրենի կարծիքով դրական է այն, որ վերջապես Ուկրաինան նոր ղեկավար ունի, այսինքն` աշխարհի համար պարզ է` ո՞ւմ հետ է ինքը գործ ունենալու, իսկ մինչ այդ «Ուկրաինայի իշխանություններին համարում էին անօրինական ու խունտայի ներկայացուցիչներ: Քաղաքական գործընթացներն արդեն կանոնավոր կընթանան»:
Հիշեցնենք, որ երեկ Ուկրաինայի նախագահական ընտրությունների նախնական տվյալներով` Պորոշենկոն ստացել է ընտրողների 55,9 տոկոսի աջակցությունը, իսկ Ազգային հեռուստատեսության էքզիթ փոլի արդյունքներով՝ 57,3 տոկոսի աջակցությունը:
Սոնա Դավթյան
.gif)
