ԱԺ ՆՈՐ ՆԱԽԱԳԱՀԸ ՏԱՐՕՐԻՆԱԿ ՈՐՈՇՈՒՄՆԵՐ Է ԿԱՅԱՑՆՈՒՄ

Երեկ մեկնարկած Սեւծովյան տնտեսական համագործակցության խորհրդարանական վեհաժողովին մասնակցելու համար հայրենի խորհրդարանը պատվիրակություն չի ուղարկել Աթենք: «Ժողովուրդ»-ի լավատեղյակ աղբյուները փոխանցում են, որ ԱԺ նախագահ Գալուստ Սահակյանը ոչ մի կերպ չի համաձայնել մասնակցել այդ վեհաժողովին, չնայած այն բանին, որ պատգամավորներն անձամբ են նրա հետ զրուցել ու հորդորել բաց չթողնել նման լուրջ իրադարձությունը: Բանն այն է, որ վեհաժողովում պետք է ղեկավար կազմի ընտրություն տեղի ունենար ու այնտեղից հայկական կողմին խնդրել էին անպայման մասնակցել նիստին:

ԱԺ արտահերթ նիստի ժամանակ ՀԱԿ խմբակցության քարտուղար Արամ Մանուկյանն այս առիթով հարց ուղղեց ԱԺ նախագահ Գալուստ Սահակյանին՝ խնդրելով ներկայացնել վեհաժողովին չմասնակցելու պատճառը: Վերջինս էլ հայտարարեց, թե պատգամավորների բացակայությունն անդրադառնում է խորհրդարանի բնականոն աշխատանքի վրա. «Գործուղումների մեկնելն անհրաժեշտ է, բայց այն ժամանակ, երբ դրանից խորհրդարանի աշխատանքը չի տուժում: Մենք ցանկանում ենք այսուհետ այդ սկզբունքով աշխատել»: Ըստ Գալուստ Գրիգորիչի՝ Աժ նիստերն ավելի կարեւոր են, ինչի համար էլ իրենք որոշել են չմասնակցել վեհաժողովին:
Նշենք, որ Սեւծովյան տնտեսական համագործակցության խորհրդարանական վեհաժողովի պատվիրակության կազմում են ԱԺ ՀՀԿ խմբակցության անդամ Գագիկ Մինասյանը, ով ղեկավարում է պատվիրակությունը, ԱԺ ԲՀԿ խմբակցության անդամ Միքայել Մելքումյանը, ԱԺ ՕԵԿ խմբակցության անդամ Հովհաննես Մարգարյանը եւ ՍԺ ՀԱԿ խմբակցության քարտուղար Արամ Մանուկյանը: «Ժողովուրդ»-ն այս առիթով զրուցել է նրանց հետ:

ՄԻՔԱՅԵԼ ՄԵԼՔՈՒՄՅԱՆ
-Պարոն Մելքումյան, Հայաստանը շա՞տ բան է կորցրել Սեւծովյան տնտեսական համագործակցության խորհրդարանական վեհաժողովին չմասնակցելով: Ի՞նչ դիրքորոշում ունեք այդ հարցի հետ կապված:
-Այնտեղ ընտրվում էր ղեկավարություն, քարտուղարություն, որի քվեարկությանը մենք չենք մասնակցել, եւ դա լավ չէ: Այնտեղ ելույթ կար` Հովհաննես Մարգարյանը պետք է ելույթ ունենար, այնպես որ, չմասնակցելը բոլոր դեպքերում լավ չէ:
-Պատճառաբանվել է, որ պատգամավորների աշխատանքն այստեղ ավելի կարեւոր է:
-Դե ներողություն, բայց եթե մենք ուզեինք՝ կարող էինք բացակայել ԱԺ նիստից, պատվիրակությունը 4 հոգի ունի, որից 3-ը՝ ոչ իշխանական: Ասենք` մենք քաղաքում ենք, բայց չենք մասնակցում, դրանով ինչ է փոխվում: Ընդհանուր առմամբ չմասնակցելը լավ չէ:

ԱՐԱՄ ՄԱՆՈՒԿՅԱՆ
-Պարոն Մանուկյան, չմասնակցելով Սեւծովյան տնտեսական համագործակցության խորհրդարանական վեհաժողովին Հայաստանն ի՞նչ կորցրեց:
-Դա նույնն է, եթե ասենք՝ ՄԱԿ-ից կամ Եվրախորհրդից դուրս գալով ինչ ենք կորցնելու: Այսինքն՝ միջազգային կառույցները կարեւոր չե՞ն:
-ԱԺ նախագահը որոշել է, որ ավելի կարեւոր է պատգամավորների մասնակցությունը Աժ նիստերին, քան վեհաժողովին:
-Փոքր, սահմանափակ… չգիտեմ, կարող են գյուղի ցանկապատ կառուցեն ու դրա մեջ ապրեն: Այսինքն՝ այս ամենը կարող է նորմալ դիտվե՞լ: Դա գռեհկություն է, դա սահմանափակվածություն է, դա անգրագիտություն է, դա տհասություն է, որ Հայաստանը միջազգային կառույցներում պետք է ներկայացված չլինի:
-Բայց գուցե այստեղ ավելի կարեւոր հարցեր կան քննարկելու, ինչի համար էլ Գ. Սահակյանը նման որոշում է կայացրել:
-Իհարկե կարեւոր է, բայց պատվիրակը կարող է գնալ այնտեղ զեկույց ներկայացնել ՀՀ-ի անունից, իսկ այստեղ էլ լինեն նիստերը, ի՞նչ է եղել: Մեկը մյուսին հակասո՞ւմ է: Այնտեղ կա ընդամենը 4 պատվիրակ, խմբակցություններն իրենք պետք է որոշեն իրենց պատվիրակը գնա՞, թե՞ չգնա: Ասենք՝ ԲՀԿ-ի տեղը ինչի համար պետք է որոշում կայացնի Գալուստ Սահակյանը, ՕԵԿ-ն այնտեղ զեկուցում ուներ, ինչի՞ համար նա չպետք է գնար, ինչո՞ւ Գ. Սահակյանը պետք է որոշի ՕԵԿ-ը գնա՞, թե՞ չգնա: Վերջին հաշվով խայտառակ վիճակ է: Ի վերջո միջազգային կառույցը ներկայացնում է, որ ՀՀ-ի դրոշը դատարկ է: Ինչո՞ւ: Թող աշխատակազմից մարդ գնար, ինչ-որ մեկը գնար, որ դատարկ չլիներ ՀՀ-ի տեղը:
-Հնարավո՞ր է, որ այդ հարցը Ձեզ այդչափ վրդովեցրել է նաեւ այն պատճառով, որ Դուք` որպես պատվիրակության անդամ, չմեկնեցիք այդ գործուղմանը:
-Դա ինչ կապ ունի, ոնց որ ասեք՝ ՄԱԿ չենք գնում, ԵԽԽՎ չենք գնում: Հայաստանը ինտեգրացող երկի՞ր է, թե՞ ոչ, Հայաստանը միջազգային կառույցներին ընդունող երկի՞ր է, թե՞ ոչ:

ԳԱԳԻԿ ՄԻՆԱՍՅԱՆ
-Պարոն Մինասյան, չեք կարծո՞ւմ, որ Սեւծովյան տնտեսական համագործակցության խորհրդարանական վեհաժողովին չմասնակցելով լուրջ խնդրի առաջ ենք կանգնելու:
-Գիտեք, ցանկացած վեհաժողովում բազմաթիվ խնդիրներ են քննարկվում, մենք ունեինք պատրաստված զեկույցներ, սակայն ԱԺ-ի բնականոն գործունեությունն ավելի բարձր գերակայություն ունի, դրա համար էլ մենք որոշեցինք չմասնակցել:
-Իսկ մենք այդ դեպքում ինչ-որ բաներ չե՞նք կորցնելու:
-Ընդհանրապես, եթե մենք չենք կարողանում մեր ելույթներն ունենալ, մեր տեսակետները ներկայացնել` իհարկե…
-Վեհաժողովին չմասնակցելը կապվա՞ծ է ՀՀԿ-ի` քվորում չապահովելու հետ:
-Ով է ասում, որ չենք ապահովում, բա մենք հիմա ոնց ենք աշխատում: Նման բան չկա: Արդեն պատճառը նշեցի:

Զրուցեց ՍՈՆԱ ԳՐԻԳՈՐՅԱՆԸ