Ներկրվող ապրանքների ավելացված արժեքի հարկը ներկայումս գանձվում է սահմանին, սակայն կառավարության կողմից նախատեսված է ծրագիր` ԱԱՀ-ն գանձելու ապրանքի վաճառքից հետո: Armlur.am-ը տնտեսագետ Հասմիկ Հովհաննիսյանից հետաքրքրվեց` պետության և գործարար հատվածի համար ո՞ր տարբերակն է շահավետ:
Հասմիկ Հովհաննիսյանի խոսքով` արտադրողների համար, իհարկե, ցանկալի է` ավելացված արժեքի հարկը գանձվի ապրանքի վաճառքից հետո, պետության համար կարճաժամկետ հատվածում եկամուտներ ստանալու համար ևս նպատակահարմար է ավելացված արժեքի հարկը գանձել հենց սահմանում:
«Բայց երկարաժամկետ առումով պետության համար ցանկալի է ավելացված արժեքի հարկը գանձել ապրանքի իրացումից հետո: Այդ դեպքում տնտեսական ակտիվությունը բարձրանում է, դրան զուգահեռ այլ հարկեր են անցնում պետբյուջե: Իսկ եթե ավելացված արժեքի հարկը գանձվում է սահմանի վրա, ապա մենք գործարարին ասում ենք`շրջանառու միջոցները տուր պետությանը, որը ձեռնարկության գործունեությունը սահմանափակում է. նա ստիպված է իր շրջանառու միջոցից գումար հանել և տալ պետությանը: Իսկ երբ գործարարի ձեռքից շրջանառու միջոցը դուրս է գալիս իր ձեռքից, դա վնասում է գործարարի գործունեությանը»,- մանրամասնեց տնտեսագետը:
Նրա խոսքով` ապրանքի վաճառքից հետո գանձվելիք ԱԱՀ-ն թե´ պետության, թե´ գործարարների համար ձեռնտու է, եթե ամեն ինչ նորմալ ընթանա: Նորմալ ընթանալ ասելով`Հասմիկ Հովհաննիսյանը նկատի ունի գործարարի ազնվությունը պետության հանդեպ`մասնավորապես գործարարները չպետք է խաբեն պետությանը և անօրինական ճանապարհով ապրանքներ չիրացնեն:
Սոնա Դավթյան
.gif)
