«Դեմ եմ» նախաձեռնությունն ահազանգել էր, թե դպրոցներում այն ուսուցիչներին, ովքեր դիմում են գրում «պարտադիրից» հրաժարվելու համար, ստիպում են ազատման դիմում գրել:
Անդրադառնալով նմանօրինակ լուրերին՝ Աշխատանքի և սոցիալական հարցերի նախարար Արտեմ Ասատրյանն այսօր խորհրդարանում լրագրողների հետ զրույցում նշեց, թե նման տեղեկություններ չունեն, եթե ստանան, կզբաղվեն:
Ասատրյանն ասաց, որ կենսաթոշակային համակարգի վերաբերյալ նոր օրենքն արդեն գործում է, օրենքի շրջանակներում յուրաքաչյուր ոք կարող է դիմում գրել և հրաժարվել պարտադիր կուտակային վճարից:
Այն դիտարկմանը, որ, փաստորեն, դպրոցներն օրենքը խախտում են, նախարարը պատասխանեց. «Դուք ունե՞ք էդպիսի տեղեկատվություն: Եթե կան կոնկրետ դեպքեր, կարող եք ներկայացնել, յուրաքանչյուր կոնկրետ դեպքը քննության առարկա կդառնա»,- ասաց նա:
Արտեմ Ասատրյանը նաև նշեց, որ Աշխատանքի և սոցիալական հարցերի նախարարությունում համակարգից հրաժարվող աշխատակիցներ չկան:
«Սոցիալական պաշտպանության ոլորտում աշխատող անձինք երևի ավելի լավատեղյակ են բարեփոխումների նպատակներին, խնդիրներին և այդպիսի որոշումներ են կայացրել»,- ընդգծեց նա:
Նշենք, որ այսօր Ազգային ժողովում նախորդ տարվա պետական բյուջեի կատարողականը ներկայացնելուց հետո ոչ մի պատգամավոր նախարարին հարց չուղղեց:
.gif)
