ՄԱՐԶԵՐ

ՍԱՀՄԱՆԱՄԵՐՁԻ ԿԱՐԳԱՎԻՃԱԿ ՉՈՒՆԻ
Տավուշի մարզի Բերդի տարածաշրջանի Վերին Կարմիրաղբյուր համայնքի ղեկավար Կամո Չոբանյանից տեղեկացանք, որ իրենց համայնքի բնակիչ, շուրջ մեկ ամիս Ադրբեջանում գերության մեջ ացկացրած եւ խոշտանգված 77-ամյա Մամիկոն Խոջոյանի դին տեղափոխվել է Երեւան: Գյուղապետն ասաց, որ մայիսի 20-ին մահացած Մամիկոն Խոջոյանի մարմինը հետազոտության կենթարկվի, եւ ՀՀ առողջապահության նախարարությունը պաշտոնապես կհայտնի մահվան ստույգ պատճառը:

Հիշեցնենք, որ Մամիկոն Խոջոյանը Ադրբեջանի տարածքում հայտնվել էր 2014 թվականի հունվարի 28-ին, եւ Կարմիր Խաչի միջազգային կոմիտեի աջակցությամբ Հայաստան էր վերադարձվել մարտի 4-ին: Կամո Չոբանյանի խոսքերով՝ ադրբեջանական գերությունից վերադառնալուց հետո Մամիկոն Խոջոյանը շատ էր տանջվում ցավերից, նա համագյուղացիներին չէր ճանաչում, կորցրել էր հիշողությունը: Համայնքապետի վկայությամբ` Մամիկոնը թեեւ հոգեկան հիվանդ էր, սակայն մինչ Ադրբեջանի տարածքում հայտնվելը ֆիզիկական ցավեր չէր ունեցել:
Հիշեցնենք, որ Մամիկոն Խոջոյանի գերեվարության դեպքից կարճ ժամանակ անց գերի էր ընկել նույն համայնքի մեկ այլ բնակիչ` 22-ամյա Արսեն Խոջոյանը: «Ժողովուրդ»-ը համայնքապետից հետաքրքրվեց, թե ինչպես է վերջինիս առողջական վիճակը: Գյուղապետն ասաց,որ Արսենը նոր է դուրս գրվել հիվանդանոցից եւ նրա առողջական վիճակը նորմալ է: Կամո Չոբանյանը, սակայն, մտավախություն հայտնեց, որ ադրբեջանցիները նրա առողջության նկատմամբ էլ կարող էին ոտնձգություն կատարել,որը կարող է բացահայտվել, օրինակ,մեկ տարի անց:
Մեր դիտարկմանը, որ միեւնույն, այն էլ՝ ոչ սահմանամերձ Կարմիր Աղբյուր համայնքից կարճ ժամանակահատվածում երկու հոգու` ադրբեջանական սահմանը հատելու եւ գերի ընկնելու իրողությունը, մեղմ ասած, մտահոգիչ եւ հարցահարույց է՝ Կ. Չոբանյանը հակադարձեց` նշելով, որ իրենց գյուղն իրականում սահմանամերձ է: Գյուղապետն ասաց, որ իրենց հողերը սահմանից 1 կմ հեռավորության վրա են գտնվում, եւ իրականում Վերին Կարմիրաղբյուրը սահմանամերձ համայնք է: Նրա խոսքերով՝ իրենք Ադրբեջանի տարածքին ավելի մոտ են գտնվում, քան, օրինակ, Արծվաբերդը, սակայն ի տարբերություն Արծվաբերդի, Վերին Կարմիրաղբյուրը չի համարվում սահմանամերձ գյուղ:
Կամո Չոբանյանը նշեց, որ համայնքը պաշտոնապես սահմանամերձ ճանաչելու դեպքում իրենք ազատվելու են հողի հարկից եւ այդ հարկի գումարի չափով համայնքը պետական բյուջեից լրավճար է ստանալու: Գյուղապետը հայտնեց, որ վերջերս գերմանական դոնոր մի կազմակերպություն Բերդի տարածաշրջանի սահմանամերձ համայնքներում խմելու ջրագծերի շինարարության ծրագիր է ֆինանսավորում: Վերին Կարմիրաղբյուր համայնքը եւս ունի խմելու ջրի մատակարարման բարելավման հիմնահարց: Բայց քանի որ գյուղը չունի սահմանամերձի կարգավիճակ, չի կարողացել օգտվել այդ ծրագրից: Գյուղապետը հույս ունի, որ Ադրբեջանին սահմանակից Վերին Կարմիրաղբյուրը մի օր կստանա սահմանամերձի կարգավիճակ:

ՈՍԿԱՆ ՍԱՐԳՍՅԱՆ
Տավուշ