Հաշվի առնելով այն հանգամանքը, որ Հրայր Թովմասյանը նշանակվել է ԱԺ աշխատակազմի ղեկավար, ինչպե՞ս է Թովմասյանին «չաթլախ» անվանած ԱԺ ՀՅԴ խմբակցության ղեկավար Արմեն Ռուստամյանը պատկերացնում իրենց համատեղ աշխատանքը մեկ շենքում. երեկ այս հարցին ի պատասխան` Ա. Ռուստամյանն ասել է. «Իմ ու պարոն Թովմասյանի միջեւ անձնական խնդիր չի եղել, անձնական կամ անձնավորված միջադեպ էլ չի եղել: Ուրիշ բան, որ հետո, ցավոք, ով ոնց ուզել` մեկնաբանել է: Դա իրականության խեղաթյուրում է` ես Հրայր Թովմասյանի անձին հասցեագրված ոչինչ չեմ ասել, հետեւաբար, նրան վիրավորելու ցանկություն չէի կարող ունենալ: Ավելին ասեմ` վերջերս ես ու պարոն Թովմասյանը հանդիպել ենք ու մանրամասն զրուցել այս ամենի մասին: Կարծում եմ՝ հարցն այլեւս գոյություն չունի, այն փակված է»,-yerkir.am-ին պարզաբանել է Ռուստամյանը:
Իհարկե լավ է, որ այդ տհաճ հարցն արդեն փակված է, սակայն անհասկանալի է, թե իրականության ինչ խեղաթյուրման, կամ ինչ կամայական մեկնաբանության մասին է խոսում Արմեն Ռուստամյանը: Ի վերջո` թե՛ Հրայր Թովմասյանի՝ «ղալաթ են արել»-ը, թե՛ Ա. Ռուստամյանի՝ «չաթլախ»-ը ասվել են հրապարակավ` Ազգային ժողովում, եւ այդ ամենի տեսագրությունները հասանելի են բոլորին: Եվ եթե այսօր արդեն Ռուստամյանը խոսում է ինչ-որ խեղաթյուրման մասին, թերեւս արժե նրան հիշեցնել ոչ վաղ անցյալում ասած սեփական խոսքերը: «Արդարադատության նախարարի ասածն աննախադեպ է… նման պահվածքով արդարադատության նախարարը վիրավորում է ողջ ԱԺ-ին: Հետո փորձել է բացատրել, թե արաբերեն «ղալաթ» բառը նշանակում է սխալ: Փաստորեն` ոչ թե զղջում է իր ասածի համար, այլ մի բան էլ բացատրում է: Եթե բառարաններով է, ուրեմն մենք էլ ենք տիրապետում բառարաններին, եւ եթե մենք նրան ասենք` ղալաթ ես անում, չաթլախ, թող չնեղանա»: Ավելին՝ դրանից հետո, պարզաբանելով ասածի շարժառիթները, Ռուստամյանը բառացիորեն ասել էր. «Խոտորնակին` խոտորնակ, ոնց որ ինքն էր ասել, այնպես էլ մենք ենք պատասխանում: Ես իրեն լավ իմաստով եմ ասել: Բացեք Ս. Մալխասյանցի բացատրական բառարանը, դա տաճկերեն բառ է` նշանակում է ճաք տալ»:
Այստեղ, թերեւս, ամենաուշագրավը` «Ես իրեն լավ իմաստով եմ ասել» արտահայտությունն է, որի կողքին Ռուստամյանի երեկվա՝ « ես Հրայր Թովմասյանի անձին հասցեագրված ոչինչ չեմ ասել» արտահայտությունը դնելով` բավականին անդուր պատկեր է ստացվում: Համարյա`«ղալաթ եմ արել»:
Իսկ եթե ավելի լուրջ` շատ ավելի ազնիվ կլիներ, եթե ուրիշներին խեղաթյուրման կամ սխալ մեկնաբանությունների մեջ մեղադրելու փոխարեն Արմեն Ռուստամյանը եւ Հրայր Թովմասյանը պարզապես հրապարակավ միմյանց ձեռք սեղմեին` ի նշան այն բանի, որ հասկացել են. ԱԺ-ում, եւ, առհասարակ, չի կարելի միմյանց նման «բառամթերքով» դիմել:
.gif)
