Անաստաս Միկոյանի արձանի տեղադրման մասին որոշումը շարունակվում է բուռն քննարկվել հասարակության շրջանում: Հասարակության մի մասը չի ցանկանում ստալինյան ռեպրեսիաներին մասնակից անհատի արձանը տեսնել մայրաքաղաքում:
Քանդակագործ Ֆերդինանտ Առաքելյանն այսօրվա մամլո ասուլիսում ասաց, ո այս մեծ աղմուկից հետո արդեն Անաստաս Միկոյանի հարազատները չեն ցանկանում, որ նրա արձանը տեղադրվի մայրաքաղաքում:
Քանդակագործը դեմ չէ, որ Միկոյանի արձանը տեղադրվի, քանի որ նրան հանճարեղ հայ է համարում: «Նրան մի՛ կապեք ռեպրեսիաների հետ, դա մեծ ֆոնն է, պետք է դիտարկել նրա ընդհանուր գործունեությունը: Միկոյանը փրկել է Խաչատրյանին, Սարյանի կյանքը », – մանրամասնեց Ֆերդինանտ Առաքելյանը:
Քանդակագործը կարծում է, որ եթե մայրաքաղաքում անգամ Տիգրան Մեծի արձանը տեղադրվեր, դարձյալ մեր հասարակությունը կդժգոհեր:
«Դուք սխալվում եք»,- արձագանքեցին լրագրողներն ու ասուլիսի մյուս բանախոսը՝ տիկնիկային թատրոնի գեղարվեստական ղեկավար Ռուբեն Բաբայանը:
Տիկնիկային թատրոնի գեղարվեստական ղեկավարը կարծում է, որ եթե Միկոյանի արձանը տեղադրվի մայրաքաղաքում, հաջորդ քայլը պետք է լինի Լենինի արձանի տեղադրումը: «Ես կարծում եմ, որ պետք է Լենինի ու Միկոյանի արձանները տեղադրել ոչ թե փառաբանելու, այլ հիշելու` ինչ են նրանք արել հայ ժողովրդի հետ»,- եզրափակեց Ռուբեն Բաբայանը:
.gif)
