Եթե քառյակը ճնշումներ գործադրի, իշխանությունը կգնա զիջումների. «Դեմ եմ»-ի անդամ

«Դեմ եմ» նախաձեռնությունն այսօր՝ ժամը 19:00-ին, Մատենադարանից երթ է կազմակերպում: Երթի նպատակն է ևս մեկ անգամ կոչ անել  աշխատողներին պայքարել իրենց իրավունքների համար, համարձակ դիմումներ գրել  գործատուներին և այդ դիմումներով պահանջել իրենց աշխատավարձից պահումներ չանել: Նախաձեռնության անդամ Դավիթ Մանուկյանն  armlur.am-ի  հետ զրույցում ասաց, որ  իրենք  այնքան ժամանակ են պահանջելու և երթեր անելու մինչև հասնեն իրենց  նպատակին:

Դավիթ Մանուկյանի խոսքով, իրենց պայքարն արդյունք տալիս է. « Մենք հավաստի տեղեկություններ ունենք, որ «Գրանդ Հոլդինգը» սկսել է իր աշխատակիցներից դիմումներ ընդունել, որը նախկինում չէր անում»:

Եթե նախորդ երթերի ժամանակ «Դեմ եմ» նախաձեռնության անդամները փակել են բանուկ և երթևեկելի փողոցներ, վաղվա երթի ժամանակ նման  բան չի լինի: «Մեր երթը խաղաղ բնույթ  ունի»,- ասաց  Դավիթ Մանուկյանը:

Նախաձեռնության անդամից նաև հետաքրքրվեցինք` արդյոք իշխանությունն ընդառաջ կգնա «քառյակի» 12 կետանոց պահանջներին, որոնցից  մեկը վերաբերում է կուտակային կենսաթոշակային օրենքում  փոփոխություն անելուն, մասնավորապես  քառյակը պահանջում է հանել  կուտակային կենսաթոշակային համակարգի պարտադիր բաղադրիչը: «Կարծում եմ` եթե քառյակը որոշակի ճնշումներ գործադրի, իշխանությունը զիջումների կգնա»,- եզրափակեց Դավիթ Մանուկյանը: