Արագածոտնի մարզպետն ունեցվածք չունի՞ (լուսանկար)

Արդեն հինգ տարի Արագածոտնի մարզպետի պաշտոնը զբաղեցնող Սարգիս Սահակյանն աչքի է ընկնում իր դյուրագրգիռ բնավորությամբ: Նա իր բնավորության այդ գիծը սկսեց օգտագործել հատկապես վերջերս, երբ նոր վարչապետի նշանակումից հետո ակտիվորեն խոսակցություններ սկսեցին տարածվել նաև մարզպետների փոփոխության մասին:

Փոփոխման ենթակա մարզպետների թվում նշվում էր նաև Ս. Սահակյանի անունը, սակայն նա մինչ այժմ էլ անխռով շարունակում է իր աշխատանքը:

Նշենք, որ մարզպետը սովորել է Երևանի անասնաբուծական-անասնաբուժական ինստիտուտի անասնաբուծության ֆակուլտետում, որակավորմամբ անասնաբույծ-ինժեներ է: 

Աշխատանքային գործունեությունը սկսել է 1977-ին` աշխատելով Թալինի շրջանի Ագարակի անասնապահական սովխոզում` որպես բանվոր:

1984-1986 թթ. եղել է Անիի շրջանի Լուսաղբյուր գյուղական սովետի գլխավոր զոոտեխնիկ, իսկ 1986-1992թթ.` Աղինի գյուղական սովետի գլխավոր զոոտեխնիկ: Տարբեր տարիներին աշխատել է նաև որպես ուսուցիչ, մարզպետարանի գյուղ բաժնի վարիչ, գյուղատնտեսության վարչության պետ և այլն:

2002-ից զբաղեցրել է Արագածոտնի մարզպետի տեղակալի պաշտոնը, իսկ 2009-ից էլ զբաղեցնում է մարզպետի պաշտոնը:

Հետաքրքիր է, որ Սահակյանը բարձրաստիճան պաշտոնատար անձանց էթիկայի հանձնաժողով ներկայացրած հայտարարագրում չի նշել ոչ մի տեսակի շարժական, անշարժ կամ թանկարժեք գույք: Բացակայում են նաև դրամական միջոցների մասին տվյալները: Միայն նշված է, որ մարզպետի համար եկամտի աղբյուր  է հանդիսացել աշխատավարձը:

Հետաքրքիր է` ինչո՞վ է ապրում մարզպետը:

Եվ սա այն դեպքում, որ Արագածոտնի շատ բնակիչներ բազմիցս բաց նամակով դիմել էին ՀՀ նախագահին` բողոքելով այն մասին, որ նա աչքի է ընկնում անօրինական գործողություններով, աշխատանքի ընդունվելու համար գումարներ է պահանջում, ստիպում է վճարել հարկերը և այլն: