ՀՀ արդարադատության նախարար Հրայր Թովմասյանը «Ժողովուրդ»-ին վստահեցրեց, որ երբ մենակ է լինում, վերլուծում եւ հասկանում է, որ իր կատարած աշխատանքում կան բաներ, որ այնպես չի արել, ինչպես կցանկանար:
-Պարո՛ն Թովմասյան, առաջիկա խորհրդարանական ընտրությունների ժամանակ Դուք անձամբ ակտիվ լինելո՞ւ եք եւ ո՞ր կուսակցությանն եք սատարելու, քանի որ անկուսակցական եք համարվում:
-Կգա ժամանակը, կտեսնենք, հլը ահագին ժամանակ կա մինչեւ ապրիլի 6-ը: Ես այս պահին չեմ կարող ասել, թե որ կուսակցության հետ եմ լինելու, այս պահին որեւէ որշում չկա, նման ցուցակ դեռեւս չկա:
-Ինչպե՞ս եք պատկերացնում Ձեր քարոզարշավը, ամբիոնների՞ց եք ելույթ ունենալու, թե՞ նաեւ հանդիպումներ կունենաք ժողովրդի հետ:
-Ես այս պահին չեմ կարող ասել, եթե կլինի մի բան ասելու` ամբիոնից ելույթ կունենամ, եթե պետք լինի` մարդկանց հետ կհանդիպեմ:
-Այս տարիների ընթացքում Ձեր կատարած աշխատանքից գո՞հ եք, ըստ Ձեզ, ի՞նչ վիճակում է գտնվում արդարադատության ոլորտը, այն Ձեզ գոհացնո՞ւմ է:
-Ես մեր ունեցած ռեսուրսները` ոչ միայն արդարադատության նախարարության, այլ երկրի, հետեւյալ կերպ կգնահատեմ. տղաս 7 տարեկան ա ու ինձ շատ ա հարցեր տալիս, եւ հարցերից մեկն այն էր, թե ոնց ա լինում, որ ինքնաթիռը թռնում ա, ու ես սկսեցի ուսումնասիրել… Եթե ինքնաթիռը հավաքել ա որոշակի արագություն, եւ եթե ինքը կես մետր անգամ բարձրացել ա, ուրեմն ինքը չի կարա իջնել: Ինքը պիտի բարձրանա ավելի, մի քանի մետր հետո նոր փորձի իջնել: Մենք մոտավորապես այդ վիճակում ենք, մենք իջնել չեն կարող, մենք այդ արագությունը վերցրել ենք` բարեփոխումների, գետնից պոկվել ենք: Իհարկե, այստեղ շատ մեծ էներգիա է անհրաժեշտ, որպեսզի այդ բարձրությունը հավաքենք: Երբ որ մենակ եմ լինում, կան բաներ, որ դժգոհ եմ, որ ոչ թե չեմ կարողացել անել, այլ ոչ ճիշտ եմ գնահատել, բայց ի ուրախություն ինձ, դրանք այդքան էլ շատ չեն:
-Պարո՛ն Թովմասյան, Դուք համարվում եք վարչապետ Տիգրան Սարգսյանի մտերիմը…
-Ո՞վ է նկատել դա, վարչապետը բոլորի հետ ա, ասենք` կարող է գործի բերումով ավելի շատ է ինձ հետ շփվում, ավելի շատ է հանձնարարություններ տալիս: Ինքը, կարծում եմ, բոլորի հետ էլ մտերիմ է: Ես էլ եմ բոլորի հետ մտերիմ, կառավարության բոլոր անդամների, ոչ միայն աշխատանքային, այլեւ ընկերական շփումներին, միջոցառումներին ենք միասին մասնակցում:
-Ձեզ ինչպե՞ս է հաջողվում լինել ՀՀԿ-ականների հետ, լինել վարչապետի վստահելին, միեւնույն ժամանակ նաեւ բարեկամական կապեր ունենալ ԲՀԿ-ի հետ: Օրինակ` բավականին մտերիմ հարաբերությունների մեջ եք Գրիգոր Գրիգորյանի` Շերիֆի հետ:
-Ես ԲՀԿ-ում մտերմություն, բացի գործընկեր նախարարներից, ոչ մեկի հետ չունեմ: Եթե Շերիֆը Գրիգոր Գրիգորյանն է, ես նրան վերջին անգամ տեսել եմ երեւի մի ութ ամիս առաջ եւ ընդամենը մի 20 օր առաջ եմ իմացել, որ ինքը ԲՀԿ-ական է: Լավ լինելը… 76 կուսակցություն կա, եւ ես ոչ մեկի հետ էլ թշնամի չեմ, բայց իմ կապերը Հանրապետական կուսակցության հետ են, ես ԲՀԿ-ի հետ որեւէ կապ, գաղափարական առնչություն ո՛չ ունեցել եմ, ո՛չ էլ ունեմ:
-Երբ Դուք նախարար չէիք, ընդդիմադիր դիրքորոշում ունեիք, հիմա այլ տեսակետ ունեք: Արդյո՞ք ամեն ինչ Ձեզ համար արդեն նորմալ է, թե՞ Դուք դա ի պաշտոնե եք անում:
-Ինչի՞ն ընդդիմանամ, այդ ընդդիմանալու տեղերը կոմիտեներն են, որտեղ ե՛ւ ընդդիմանում եմ, ե՛ւ քննադատում եմ, ե՛ւ չենք համաձայնում, ե՛ւ մյուսներին ենք համոզում: Ցավոք սրտի, բաց չեն այդ քննարկումները, երեւի չեք գտնի մի նախագիծ, որի վերաբերյալ նախարարությունն ինչ-որ առաջարկություն, ինչ-որ ընդդիմություն չունենա: Եթե ես այն ժամանակ չունեի այդ գործիքները փոխելու, ապա ես այժմ ի պաշտոնե ունեմ որեւէ բան փոխելու իրավունք:
-Հասկանալի է, որ ներկա իշխանություններին ժողովուրդը չի սիրում, քանի որ նրանք ժողովրդին հիշում են միայն ընտրություններից առաջ` կաշառք բաժանելով, ինչպես արվեց փետրվարի 12-ին Հրազդանի քաղաքապետի ընտրությունների ժամանակ…
-Ես չեմ տեսել` Հրազդանում ինչ է կատարվել, եթե Դուք տեսել եք… Ես հետեւում եմ լրատվամիջոցներին, ընտրությունը կատարյալ չէր, բայց համաձայն եմ ԿԸՀ նախագահի հետ, որ մի քայլ առաջ էր, չենք տեսել որեւէ լցոնման դեպք:
-Դա արտաքինից էր այդպես երեւում, բայց ընտրություններից առաջ ամեն ինչ արվել էր ներքին կարգով: Հանրապետականները շատ լավ էին «աշխատել», ընտրություններից առաջ մարդկանց ճնշել, ահաբեկել եւ կաշառք էին բաժանել:
-Լավ են աշխատել, լցոնում չի եղել: Ես հիմա ասեմ, իսկ Իջեւանում ինչի՞ չեղավ, այսինքն` որտեղ որ պարտվում են` վատ են «աշխատել», որտեղ որ պարտվում են, ասում են` փող են բաժանել: Եթե քաղաքական գործիչներն են նման բան ասում, ինձ համար հասկանալի է, որովհետեւ իրենք ունեն այդ կրակը պահելու… բայց երբ դա լրագրողներն են ասում, մի տեսակ չեմ հասկանում: Մենք առաջիկայում ընտրություններ ունենք եւ սերմանել, թե գիտեք ինչ, սրանից հետո էսպես է լինելու… Չէ՛, ասեք, բայց Իջեւանն էլ էր փորձաքար, ինչի՞ այնտեղ պարտվեց Հանրապետական կուսակցությունը, էստեղ հաղթեց, որտեղի՞ց այդքան վստահություն, որ Իջեւանում լավ չեն աշխատել, էնտեղ քիչ են փող բաժանել, էստեղ շատ:
Հ.Գ. Պարոն նախարարը զարմանում է, որ լրագրողներն են բարձրաձայնում, թե ընտրությունների ժամանակ ինչ մեթոդներով են ձայն «հավաքում»` մոռանալով, որ ինքը, լինելով արդարադատության նախարար, պետք է առաջիններից մեկն արձագանքի նման իրավիճակին:
.gif)
