Տավուշի քաղաքներում էլեկտրաէներգիայի, բնական գազի, խմելու ջրի վարձավճարները գանձելու համար հսկիչները բազում անգամ թակում են բաժանորդների դռները: Վճարունակները զլանում են բանկերի մասնաճյուղերում եւ փոստային բաժանմունքներում ժամանակին մուծել կոմունալ վարձերը, կարիքավորներն էլ, գումար չունենալով, սպասում են կենսաթոշակներին եւ ընտանեկան նպաստներին: Եթե բաժանորդը սահմանված ժամկետում կոմունալ վճարը չի մուծում, հսկիչը պարտավոր է կապարակնքել հաշվիչը: Վերստին բաժանորդ դառնալու համար բնակիչը պետք է որոշակի գումար մուծի: Շատ դեպքերում հսկիչներն իրենք են մուծում անվճարունակ բաժանորդի փոխարեն` գումարը որոշակի ժամկետում ընտանիքից ստանալու պայմանավորվածությամբ: Հսկիչներն այդ քայլին դիմում են ոչ միայն եւ ոչ այնքան գթասրտությունից դրդված. բանն այն է, որ գումարների հավաքագրման ցածր ցուցանիշ ունեցող հսկիչները զրկվում են աշխատավարձի հավելավճարից:
.gif)
