Հունիսի 23-ին մի խումբ քաղաքացիներ, իրացնելով իրենց սահմանադրական իրավունքը, ընդդեմ էլեկտրաէներգիայի սակագնի թանկացման ոչ զանգվածային, խաղաղ բողոքի ակցիա են կազմակերպել Հանրային ծառայությունները կարգավորող հանձնաժողովի շենքի մոտ:
ՀՀ Ոստիկանությունը, հերթական անգամ ոտնահարելով Սահմանադրությամբ և օրենքներով ամրագրված քաղաքացիական իրավունքները և դիմելով իշխանազանցության՝ բռնության գործադրմամբ բերման են ենթարկել 26 քաղաքացիների: Այնուհետև իրավապահների կողմից բռնությունները շարունակվել են նաև ոստիկանության Կենտրոնի բաժնի մոտակայքում, այդ թվում լրագրողների նկատմամբ: Երկու քաղաքացի մարմնական վնասվածքներով տեղափոխվել է հիվանդանոց: Տուժած շուրջ երկու տասնյակ քաղաքացիներ հաղորդում են ներկայացրել քննչական մարմիններին` դատաբժշկական փորձաքննության ուղեգիր ստանալու համար:
Գործող իշխանությունները, չունենալով փաստարկներ էլեկտրաէներգիայի հերթական անհիմն թանկացման հարցում և պարտվելով քաղաքական հարթակներում, կրկին դիմում են իրենց հոգեհարազատ բռնության մեթոդին: Սա իշխանությունների վախի նշան է, որը պայմանավորված է մի կողմից օրի-օրի աճող հակաիշխանական տրամադրություններով, իսկ մյուս կողմից ոչ իշխանական քաղաքական ուժերի համագործակցության խորացմամբ:
Հայ Ազգային Կոնգրեսը խստորեն դատապարտում է նման գործելաոճը և պահանջում է պատասխանատվության կանչել ոստիկանության այն ծառայակիցներին, ովքեր չարաշահել են իրենց լիազորությունները և ծառայական պարտականությունը կատարելիս կոպտորեն խախտել են ՀՀ օրենսդրությունը: Հակառակ դեպքում ապօրինությունների ողջ պատասխանատվությունն ընկնում է վարչախմբի վրա` Սերժ Սարգսյանի գլխավորությամբ:
Հայ Ազգային Կոնգրես
.gif)
