Փետրվարի 26-ին վարչապետ Տիգրան Սարգսյանը կուսակցական այցով ժամանել էր Իջեւան: Նրան ուղեկցում էին ԱԺ հանրապետական պատգամավորներ Գագիկ Մելիքյանը, Գագիկ Մինասյանը, Հակոբ Հակոբյանը (Տավուշի N 41 ընտրատարածք), ինչպես նաեւ ֆինանսների նախարար Վաչե Գաբրիելյանը, էկոնոմիկայի նախարար Տիգրան Դավթյանը եւ արդարադատության նախարար Հրայր Թովմասյանը:
Տ.Սարգսյանի ու մարզի ՀՀԿ-ական ակտիվի հանդիպումը կայացել է Տավուշի մարզպետարանում: Չնայած օրը կիրակի էր, ոչ աշխատանքային, սակայն մի՞թե մարզպետարանի շենքը կուսակցական հավաքի հարմար տեղ է: Համայնքապետերից մեկը հողի հարկի պարտքերը չեղյալ համարելու կառավարության օրենսդրական նախաձեռնության մասին հարց է բարձրացրել` նշելով, որ դրանից տուժում են օրինապահ, հողի հարկը մուծած գյուղացիները: Մտավախություն կա, որ այսուհետ նրանք եւս հարկ չեն մուծի` ակնկալելով, որ 5 տարի անց` ընտրությունների շեմին, իրենց պարտքերը չեղյալ կհամարվեն: Վարչապետն ասել է, որ հողի հարկի պարտքը չեղյալ համարելու օրինագիծը դեռ պետք է ընդունվի ԱԺ-ի կողմից, որ այն վերաբերում է միայն տույժ-տուգանքներին, ոչ թե բուն պարտքերին:
Պտղավանի գյուղապետ Ռաֆիկ Օհանյանը մտահոգություն է հայտնել Այրումի սողանքի գոտում վնասված ջրագծի վերականգնման ուշացման վերաբերյալ: Հիշեցնենք, որ ինքնահոս այդ ջրագծով ոռոգվում է շուրջ 1000 հա, ոռոգման սեզոնն էլ Դեբեդի հովտում շուտ է սկսվում` մարտ ամսից: Վարչապետն ասել է, թե ջրագիծը կվերականգնվի միջպետական ճանապարհի՝ սողանքից քանդված հատվածի հետ: Տավուշի համայնքների ղեկավարները վարչապետին առաջադրել են պետական բյուջեով դպրոցական շենքերի, գյուղերի մշակույթի տների, համայնքային ճանապարհների հիմնանորոգման խնդիրները: Հավաքի ավարտին Տ.Սարգսյանը ՀՀԿ անդամատոմսեր է հանձնել շուրջ 1 տասնյակ դպրոցների տնօրենների, բժշկական եւ պետական հիմնարկների աշխատողների:
.gif)
