«Ժառանգություն» կուսակցությունը պատրաստվում է հունիսի 28-ին կայանալիք իր համագումարին: «Ժողովուրդ»-ը տեղեկացավ, որ կուսակցությունում այս պահին մթնոլորտը լարված է, քանի որ կուսակցականներից շատերի համար պարզ չէ, թե, ի վերջո, որն է կուսակցության տեսլականը, ինչ է պատրաստվում անել կուսակցությունը: Մարդկանց համար տեսանելի չէ կուսակցության ապագա «ճանապարհային քարտեզը», որդեգրած քաղաքական ճանապարհը: «Ժառանգության» անդամների համար անհասկանալի են նաեւ իրենց առաջնորդի` Րաֆֆի Հովհաննիսյանի՝ վերջին ժամանակահատվածի գործունեությունն ու հայտարարությունները՝ մասնավորապես Շանթ Հարությունյանից ավելի խենթ լինելու ցանկությունը: Այս եւ առաջիկա համագումարի վերաբերյալ այլ հարցերի շուրջ «Ժողովուրդ»-ը զրուցել է «Ժառանգություն» կուսակցության քարտուղար Ստեփան Սաֆարյանի հետ՝ պարզելու, թե ինչ ակնկալիքներ ունեն համագումարից:
-Պարոն Սաֆարյան, «Ժառանգություն» կուսակցությունը համագումարի ժամանակ ի՞նչ հարց է քննարկելու, ի՞նչ օրակարգ է ձեւավորել կուսակցությունը:
-Մենք մեր վերջին համագումարն արել ենք 2 տարի առաջ, իսկ կանոնադրությունը պահանջում է առնվազն երկու տարին մեկ համագումար անել: Հետեւաբար սա կանոնադրական համագումար է, թվով 10-րդը: Համագումարի հիմնական հարցը անցած տարիների անցուդարձին գնահատական տալն է, կատարած աշխատանքի հաշվետվությունները ու նոր ղեկավար մարմինների ընտրությունը` վարչություն, կանոնադրական հանձնաժողով, վերահսկիչ հանձնաժողով եւ այլն: Ասեմ, որ համագումարի օրը քանիցս անգամ քննարկվել ու հետաձգվել էր:
-Դուք կուսակցության վարչության անդամ եք, բայց այս անգամ հրաժարվելու եք ընդգրկվել վարչությունում, ինչո՞ւ: Այնպիսի տպավորություն է, որ Դուք նեղացել եք կուսակցությունից, նրա վարած գործունեությունից:
-Ես նոր վարչության կազմում չեմ լինելու: Կա ուրիշ բան. վարչության ներսում, իհարկե, վերջին ամիսներին տարաձայնություններ եղել են` կուսակցության արտաքին քաղաքական գծի, եվրաասոցացման, Ուկրաինայում տեղի ունեցած իրադարձությունների վերաբերյալ, բայց պետք է ասեմ, որ այդ տարաձայնություններն իրենց լուծումները ստացել են ընդունված բանաձեւերով: Իմ մասով ասեմ, որ արմատներն ավելի հեռու են գտնվում: 2012թ. խորհրդարանական ընտրություններից հետո ես արդեն որոշում էի կայացրել, որ, ըստ էության, պետք է զբաղվեմ քաղաքականությամբ, որի ձեւերից մեկն էլ վերլուծական աշխատանք կատարելն էր: Այդ ժամանակվանից մտադրվել էի ստեղծել հիմնադրամ: Բայց այդ ընթացքում տեղի ունեցած ընտրությունները բավականին ձգձգեցին պրոցեսը: Բայց այն տարեվերջին ներկայացվեց գրանցման ու արդեն քանի ամիս է՝ հիմնադրամը գրանցվել է: Ու մոտ ժամանակներս հիմնադրամը բուռն գործունեություն է ծավալելու: Քանի որ գիտակցում եմ դրա ծանրաբեռնվածությունը, անկողմնակալ լինելը, ես բավականին վաղուց որոշում էի ընդունել համագումարի ժամանակ չառաջադրվել վարչության անդամ:
-Նշեցիք, որ բազմիցս կուսակցության համագումարը հետաձգվել է, ո՞րն է եղել այդ ամենի պատճառը: Տեղեկություններ կան, որ կուսակցության առաջնորդի՝ մշտապես երկրում չգտնվելը թույլ չի տալիս համագումար անցկացնել:
-Հետաձգելու պատճառները չէի ասի, որ լուրջ էին ու հիմնավոր, կար ժամանակ դեռեւս չշտապելու ու տարբեր պատճառներով, մեկ Րաֆֆի Հովհաննիսյանի բացակայության, մեկ քաղաքական շրջանի… մի քանի անգամ հետաձգվեց այդ հարցը: Եթե հիշում եք, մեր կուսակցության ներկայացուցիչները հայտարարել էին, որ այն տեղի կունենա տարվա վերջին կամ այս գարնանը, բայց տարբեր պատճառներով այն հետաձգվում էր:
-Այժմ նշվում է, որ կուսակցությունում լարված մթնոլորտ է ու անգամ չի բացառվում, որ Դուք կուսակցությունից դուրս գաք: Կա՞ իրականում նման բան:
-Ուրեմն ասեմ, որ ինչքան էլ լինեն տարաձայնություններ` ներքին ու արտաքին քաղաքականություններում, մեզ մոտ մարդկային հարաբերություններում լարված հարաբերություն չկա: Կարծում եմ՝ մենք բոլորս լինելով մի կուսակցության ներկայացուցիչ, որտեղ իրենց կամքով, առանց ճնշումների են կուսակցությանը անդամագրվել… եթե անգամ մեզանից մեկը նման որոշում կայացնի, ապա դա առնվազն կանի շատ ցիվիլ տարբերակով: Մեր հարաբերությունների մասին լուրերը չափազանցված են, անկախ նրանից՝ մեկս մյուսի որ տեսակետներն ենք կիսում կամ չենք կիսում, մենք ունենք նորմալ մարդկային հարաբերություններ:
-Իսկ ինչպե՞ս եք գնահատում «Ժառանգություն» կուսակցության վերջին ժամանակահատվածում վարած քաղաքականությունը, երբ կուսակցության առաջնորդին շատ հազվադեպ դեպքերում կարելի է տեսնել:
-Եթե անգամ դժգոհություն կա կամ գոհացուցիչ չգնահատվի, ապա դա միայն «Ժառանգության» խնդիրը չէ: ՀՀ-ի քաղաքական դաշտը կատարյալ լճացված վիճակում է հայտնվել, ու այս առումով խոսել միայն «Ժառանգության» պրոբլեմների մասին՝ ճիշտ չէ, բոլորն էլ արդյունք չարձանագրելու իրողություն ունեն: Դրանք միշտ բարձրաձայնվել են քաղաքակիրթ տարբերակով ու ճիշտ եմ համարում, որ այս ընթացքում կան կուսակցության ուղեգծի վերաբերյալ քննարկում, տարբեր դիրքորոշումներ: Ու հենց կուսակցության համագումարն էլ կպատասխանի այդ հարցերին, թե ո՞ւր շարժվել, ի՞նչ անել եւ ո՞րն է այդ գիծը:
-Տեղեկություններ կան նաեւ, որ կուսակցության առաջնորդ Րաֆֆի Հովհաննիսյանը մտադիր է լքել կուսակցությունը: Ինչքանո՞վ է հավանական այդ տարբերակը:
-Ես երբեւիցե նման տպավորություն չեմ ունեցել, որ Ր. Հովհաննիսյանը հեռանում է կուսակցությունից կամ Հայաստանից: Ես համարում եմ, որ դա պարոն Հավհաննիսյանի անձնական տիրույթում է, բայց ես նման զգացողություն չեմ ունեցել:
-«Ժառանգություն» կուսակցությունը սպասում է Զարուհի Փոստանջյանի վերադարձի՞ն ավելի կոնկրետ քայլեր անելու համար:
-Նման խնդիր չկա: Չկա այնպիսի բան, թե ինչ կլինի նրա վերադարձից հետո, ես կարծում եմ, որ նա կվերադառնա եւ կանի այն, ինչ արել է նախկինում:
ՍՈՆԱ ԳՐԻԳՈՐՅԱՆ
.gif)
