ԱԺ պետաիրավական հարցերի մշտական հանձնաժողովի նախագահ Դավիթ Հարությունյանը «Ժողովուրդ»-ի հետ զրույցում խոստովանել է, որ ինքը մեկ անգամ քվեարկել է իր գործընկերոջ փոխարեն: Սակայն, ըստ Հարությունյանի, այդ գործընկերը ներկա է եղել ԱԺ դահլիճում, եւ քանի որ չի հասցրել գալ իր տեղը՝ քվեարկությանը մասնակցելու համար, իրեն է խնդրել սեղմել կոճակը:
-ՀՀԿ-ական պատգամավորների կողմից ուրիշի փոխարեն քվեարկելու փաստի առթիվ ՀՔԾ ուղարկված դիմումի վերաբերյալ ԱԺ նախագահ Սամվել Նիկոյանը խորհրդակցություն էր անցկացրել ու որոշել դիմել խմբակցություններին, որպեսզի վերջիններս իրենց պատգամավորներին զգուշացնեն նման արարքի անթույլատրելիության մասին: Որքանո՞վ էր իրավաչափ Նիկոյանի քայլը, եւ որքանո՞վ արդյունավետ կլինի այն:
-Սա քաղաքական հորդոր էր, թե որքանով դա կկանխի նմանատիպ դեպքերի կրկնությունը, դժվարանում եմ ասել, կյանքը ցույց կտա: Մեր խմբակցությունն այդ առումով առաջարկել է օրենքի նախագիծ, որը լուծում է տալու նման հարցերին. խոսքն էթիկայի հանձնաժողովի մասին է, որը քննարկելու է նման խախտումները:
-Բայց այդ մարմինն ի՞նչ պատիժ պետք է կիրառի, որպեսզի բացառի նման դեպքերը:
-Պատիժները չեն լինում նյութական կամ քրեական: Կան նաեւ քաղաքական պատասխանատվության տարրեր, եւ տվյալ պարագայում դա քաղաքական պատասխանատվության հարց է: Էթիկայի հանձնաժողովն այս կամ այն պատգամավորի կողմից վարքագծի կանոնների խախտման դեպքում կնկարագրի կատարվածը, ԱԺ-ում հանդես կգա հրապարակմամբ: Կարծում եմ՝ հրապարակային քաղաքական պատասխանատվության հարցն ազդեցիկ գործոն կլինի:
-Թեեւ Դուք էիք այս նախագծի համահեղինակներից մեկը, սակայն կան կադրեր, որտեղ երեւում է՝ ինքներդ եւս խախտել եք ԱԺ կանոնակարգն ու քվեարկել բացակա գործընկերոջ փոխարեն: Ինչպե՞ս կմեկնաբանեք Ձեր կողմից կատարված խախտումը:
-Կա տեսագրված մեկ դեպք: Այն վաղուցվա պատմություն է: Տեղի է ունեցել, երբ ԱԺ դահլիճում նոր-նոր էին տեղադրել քվեարկության այս համակարգը: Այդ օրն իմ գործընկեր Գագիկ Մելիքյանը գտնվում էր քարտուղարության մոտ, պատրաստվում էր հանդես գալ զեկուցմամբ: Այդ ժամանակ հայտարարվեց քվեարկություն, եւ քանի որ ինքն այդ պահին չէր կարող վերադառնալ իր տեղը եւ քվեարկել, դիմեց ինձ` խնդրելով «կողմ» քվեարկել իր փոխարեն: Ցավոք սրտի, այդ կադրերը նկարահանված են խոշոր պլանով, ու որեւէ մեկը չի տեսնում, թե որտեղ է կանգնած պատգամավորը, որի փոխարեն քվեարկել եմ: Այդ պատգամավորը մի քանի մետր հեռու էր կանգնած, տանում էր թղթերը՝ ամբիոնին մոտենալու համար:
-Այսինքն՝ Դուք քվեարկել եք ուրիշի փոխարեն:
-Դա մեկ անգամ է եղել, բայց իմ գործընկերը գտնվել է դահլիճում եւ քանի որ իր տեղից հեռու է եղել, այսինքն՝ ամբիոնի մոտ է եղել, խնդրել է ինձ՝ քվեարկել:
-Լավ, նման խախտումների դեպքում կա՞ քրեական տարր, թե՞ ոչ:
-Ես չեմ կարծում, որ այստեղ քրեական տարր կա: Բայց երեւույթն ինքնին ընդունելի չէ, մանավանդ որ օրենքն այդ հարցում հստակ է ձեւակերպված:
-Իսկ ինչպե՞ս հասկանանք ՀՀԿ-ական այն պատգամավորների վարքագիծը, որոնք այսօր ընդունում են համապատասխան օրենք, ըստ որի՝ անթույլատրելի է ուրիշի փոխարեն քվեարկելը, նման երեւույթները պետք է էթիկայի հանձնաժողովի քննության առարկա դառնան, մեկ օր անց խախտում են կատարում:
-Օրենքը երբ սկսի գործել, այն կլինի շատ լուրջ զսպաշապիկ:
-Ուրիշի փոխարեն քվեարկողների մեջ է նաեւ ԵԽԽՎ հայաստանյան պատվիրակության անդամ Հերմինե Նաղդալյանը, նաեւ՝ Ձեզ հետ կապված կադրեր կան: Այս ամենը ԵԽԽՎ-ում ինչպե՞ս է ընդունվում, արդյո՞ք նման քայլերով Հայաստանի հեղինակության վրա բացասական ազդեցություն չի լինում:
-Ես դժվարանում եմ միանշանակ պատասխանել այդ հարցին: Մեկ բան ակնհայտ է՝ մեր գործունեության այս տարիների ընթացքում միակ պատվիրակությունը, որի մասին սեփական երկրից բողոքներ են ուղարկվել ԵԽԽՎ՝ եվրոպացիներին հորդորելով քննել հարցը, դա Հայաստանի պատվիրակներն են: Այս առումով մենք յուրահատուկ ենք: 87 երկրներից որեւէ մեկի պատվիրակության դեմ վերջին 5 տարվա ընթացքում սեփական երկրից ԵԽԽՎ-ում երբեք չեն փորձել հարց բարձրացնել: Փոխո՞ւմ է արդյոք գնահատականը մեր հանդեպ, թե՞ ոչ… չեմ կարծում, որ փոխում է:
-Ի՞նչ երաշխիք, եթե հանուն մի նախագծի` ՀՀԿ-ական պատգամավորները պատրաստ են խախտել ընդամենը մեկ օր առաջ իրենց իսկ ընդունած օրենքը, ապա վաղը չեն խախտի նաեւ ընտրությունները:
-Եթե ընդունված օրենքները չունեն գործադրման մեխանիզմներ, ցավոք սրտի, դրանք դառնում են մեռյալ: Դրանով է պայմանավորված այն հանգամանքը, որ երբ չկան օրենքի գործադրման մեխանիզմներ, ցանկացած քաղաքական գործիչ սկսում է որոնել այն գործադրելու եղանակներ:
.gif)
