Նախկինում դատապարտված, փսիխոպաթիա հիվանդությամբ տառապող Հայկ Դավթյանը, ով ընդամենը մի քանի տարի առաջ էր ընտանիք կազմել Աստղիկի հետ ու համատեղ կյանքում երկու երեխա ունեցել, հանկարծ սկսել է կասկածել կնոջը դավաճանության մեջ:
Թեեւ այդ փաստը հավաստող ապացույց չի ունեցել ու հետագայում էլ չի կարողացել դատարանում ապացուցել, այդուհանդերձ, կնոջ վարքագծից համոզված է եղել, որ նա իրեն դավաճանել է: Եւ 2 տարի համերաշխ ապրելուց հետո ամուսինների հարաբերությունները սրվել են, եւ հաճախակի վիճաբանություններ առաջացել: Քանի որ երկուսի ջուրն այդպես էլ մի առվով չի գնացել, ի վերջո որոշել են ամուսնալուծվել: 2011թ. ապրիլի 2-ին գնացել են Շենգավիթի տարածքային ՔԿԱԳ բաժին (Քաղաքացիական կացության ակտերի գրանցման բաժին), որտեղ ամուսնալուծվելու մասին դիմում են ներկայացրել: Հաշտվելու համար նրանց 1 ամիս ժամանակ է տրամադրվել: Այդ մեկ ամսվա ընթացքում նրանք միասին չեն ապրել ու չեն հաշտվել: Աստղիկը բնակարան է վարձակալել ու երեխաների հետ տեղափոխվել այնտեղ: Հայրը չի իմացել բնակարանի տեղը, քանի որ Աստղիկը փոխել է նաեւ իր հեռախոսահամարը, եւ նրանից չի կարողացել իմանալ տան տեղը եւ տեսակցել երեխաներին:
Ըստ Հայկի ցուցմունքի` հենց այդ հանգամանքն էլ զայրացրել է իրեն: Եւ մեկամսյա ժամկետը լրանալուց հետո, երբ մայիսի 2-ին` ժ. 14:00-ին, նրանք կրկին ներկայացել են ՔԿԱԳ բաժին, Հայկը որոշել է հաշվեհարդար տեսնել կնոջ նկատմամբ` վնասել նրան կամ դեմքին անջնջելի հետք թողնել: Գնացել է ՔԿԱԳ բաժին, որտեղ հանդիպել է Աստղիկին եւ նրա մորը` Անժելային: Նախ Աստղիկից հետաքրքրվել է, թե ինչու է նա խոչընդոտում երեխաներին տեսակցելու հարցում, որից հետո իր մոտ գտնվող դանակով, ինչպես ինքն է պատմել, երկու անգամ հարվածել է կնոջ ձեռքին ու հեռացել: Իսկ դատարանում չի ընդունել մեղքը եւ ասել է, որ կնոջը սպանելու դիտավորություն չի ունեցել, հակառակ դեպքում ոչ ոք չէր կարող իրեն խանգարել: Մինչդեռ քրեական գործը հարուցվել է սպանության փորձի ու դիտավորությամբ առողջությանը թեթեւ մարմնական վնասվածք հասցնելու փաստերով, քանի որ նրա դանակի հարվածները վնաս են պատճառել ոչ միայն Աստղիկին, այլ նաեւ նրա մորը` Անժելային:
Քրգործի նյութերից տեղեկանում ենք, որ Հայկը կնոջը սպանելու դիտավորություն ունեցել է. ըստ Աստղիկի պատմածի` շենք մտնելիս տեսել է մոտեցող Հայկին եւ նրա քայլվածքից հասկացել, որ խմած է: Արդեն ՔԿԱԳ բաժնում մոտեցել է Հայկը եւ իրեն հարցրել, թե ինչու է անջատել բջջային հեռախոսահամարը եւ խոչընդոտներ ստեղծել երեխաներին տեսակցելու հարցում: Տեսնելով, որ Հայկը խմած է, կինը չի ցանկացել վիճելու առիթ տալ եւ խոստացել է երեկոյան միացնել հեռախոսահամարն ու նրան հնարավորություն տալ խոսելու երեխաների հետ: Սակայն այդ ժամանակ Հայկն ասել է. «Արդեն ուշ է, հիմա պետք է մեռնես»: Այդ պահին էլ նա իր մոտ գտնվող ծալովի-սեւեռվող, շեղբով, գրպանի դանակով փորձել է հարվածել Աստղիկի կրծքավանդակի ձախ կեսին` այդ ընթացքում բղավելով` մեռի՛: Աստղիկը, նկատելով դանակն ու հարվածի ուղղությունը, թեքվել է, սակայն չի կարողացել հարվածից խուսափել. աջ բազուկով է փորձել կանխել եւ հարվածից ձեռքն է վնասվել: Այդ ժամանակ Հայկը հետեւից մի ձեռքով բռնել է Աստղիկի պարանոցից` նրան թիկունքով սեղմելով իր կրծքավանդակին, որպեսզի չկարողանա դիմադրել, իսկ մյուս ձեռքով դանակով մի քանի անգամ հարվածել է կնոջ կրծքավանդակի աջ կեսին: Այդ պահին միջամտել է Աստղիկի մայրը եւ դստերը փեսայի ճանկերից ազատելիս ինքն էլ առողջության թեթեւ քայքայումով վնասվածք ստացել: Իսկ Աստղիկի վիճակն ավելի վատ է եղել. նա դանակի երկու հարված է ստացել աջ բազկի շրջանում, երկու հարված` կրծքավանդակին, որոնք առաջացրել են կյանքին վտանգ սպառնացող ծանր վնաս:
Արդեն դատական վիճաբանությունների փուլում փեսան եւ զոքանչը հաշտվել են, եւ այդ հիմքով մեղադրանքի` թեթեւ վնասվածք պատճառելու մասով կողմերը եկել են հաշտության, եւ քրեական հետապնդումն այդ մասով դադարեցվել է, իսկ սպանության փորձի համար Շենգավիթ վարչական շրջանի ընդհանուր իրավասության դատարանը Հայկ Դավթյանին դատապարտել է 8 տարվա ազատազրկման` կնոջ դեմքին անջնջելի հետք թողնելու ցանկության, բայց իրականում սպանության փորձի համար:
.gif)
