Երեկ Երեւանում հերթական նեոկայսերական մուննաթն է հնչեցրել հերթական կիսիլեւազգին` ՀԱՊԿ-ի Գիտավերլուծական ասոցիացիայի համակարգող Իգոր Պանարինը: Երիտասարդ դիվանագետների համար «ՀԱՊԿ-ը եւ Եվրասիական անվտանգությունը» թեմայով դասախոսության շրջանակներում պատասխանելով ուսանողներից մեկի հարցին` սույն պարոնն անդրադարձել է նաեւ Կիսիլեւի հայտնի հայտարարություններին եւ մուննաթ եկել, թե ինչու, օրինակ, Երեւանի Պուշկինի փողոցի ցուցանակը միայն հայերենով եւ անգլերենով է, մինչդեռ Ալմա Աթայում նույն անունը կրող փողոցի ցուցանակը ղազախերեն եւ ռուսերեն է, երբեմն էլ` միայն ռուսերեն:
Ի տարբերություն Կիսիլեւի ներկայությամբ բերանները ջուր առած ԱԺ պատգամավորների, երիտասարդ դիվանագետներն ավելի համարձակ են գտնվել եւ սույն կիսիլեւազգուն բացատրել են, որ Ալմա Աթայի բնակչության զգալի մասն ազգությամբ ռուսներ են, հետեւաբար ռուսերեն ցուցանակների առկայությունը կարելի է տրամաբանական համարել, մինչդեռ Հայաստանում պատկերը միանգամայն այլ է: «Համենայնդեպս` Հայաստանի ռազմավարական դաշնակիցը ոչ թե անգլերեն լեզուն է, այլ Ռուսաստանը»,-ոչ մի կերպ չի հանգստացել ռուս պաշտոնյան, ում ներկայացրած կազմակերպության վեց անդամներից (Հայաստանը հանած) չորսն, ի դեպ, մշտապես մոռանում են ՀԱՊԿ շրջանակներում Հայաստանի հետ ունեցած հարաբերությունների մասին եւ հանդես գալիս հակահայկական դիրքորոշումներով:
Ինչ վերաբերում է Պանարինի հիշեցմանը, թե Հայաստանի ռազմավարական դաշնակիցը Ռուսաստանն է, ապա այս եւ մնացած կիսիլեւազգիներին պետք է հիշեցնել, որ դա նշանակում է՝ Ռուսաստանի ռազմավարական դաշնակիցն էլ Հայաստանն է: Թվում է թե` առանձնապես տարբերություն չկա, սակայն իրականում տարբերությունն ահռելի է: Առավելեւս, որ այս ձեւակերպմամբ դաշնակցային հարաբերությունները դիտարկելիս` ակնհայտ է դառնում, որ Ռուսաստանն իր ռազմավարական դաշնակցի շահերին բացահայտորեն դեմ է դուրս գալիս` միլիարդավոր դոլարների զենք վաճառելով իր դաշնակցի թշնամի պետությանը:
Իսկ ինչ վերաբերում է կոնկրետ հարցին, թե Երեւանի փողոցներում ցուցանակներն ինչ լեզվով պետք է գրվեն, ապա այս հարցի պատասխանը միանշանակ է. առաջին հերթին եւ մեծ տառերով` հայերեն, ապա ավելի փոքր տառերով` անգլերեն: Եվ ոչ ամենեւին այն պատճառով, որ ինչպես նկատել է Պանարինը «անգլերեն լեզուն մեր դաշնակիցն է» (ինչպիսի անհեթեթ ձեւակերպում), այլեւ այն պարզ իրողությունից ելնելով, որ անգլերենը աշխարհում միակ միջազգային լեզուն է:
.gif)
