2014թ. առաջին կիսամյակում առողջապահության նախարարության «թեժ գիծ» ծառայությունն ստացել է 5826 հեռախոսազանգ` նախորդ տարվա նույն ժամանակահատվածի 3675-ի փոխարեն։ Ընթացիկ տարում ավելի քան կրկնապատկվել են տեղեկատվական բնույթի հարցումները։ 2013թ. առաջին կիսամյակի 1453-ի դիմաց այս տարվա նույն ժամանակահատվածում ստացվել է 3064 նման զանգ: Փոխարենը նվազել են բողոքները` 2013թ. առաջին կիսամյակի 203-ի փոխարեն գրանցվել է 152-ը։
Բողոքները կազմել են գրանցված ընդհանուր հեռախոսազանգերի 2.6 տոկոսը` 2013-ի 5.3-ի դիմաց: Միաժամանակ ստացվել է շնորհակալական 40 զանգ։ 2014թ. գրանցվել է օձի խայթոցի 33, կարիճի խայթոցի` 4 դեպք։ 2013թ. նույն ժամանակահատվածում գրանցվել է օձի խայթոցի 24 եւ կարիճի խայթոցի 1 դեպք: Առողջապահական սոցիալական փաթեթի վերաբերյալ արձանագրվել է 274, զինծառայողների եւ նրանց ընտանիքի անդամներին տրված արտոնությունների վերաբերյալ` 130 հեռախոսազանգ: Բոլոր հեռախոսազանգերին տրվել են սպառիչ պատասխաններ, բարձրացված խնդիրներն ստացել են համապատասխան լուծումներ։ Առաջին կիսամյակում ստացված բողոքների կապակցությամբ հարուցվել է 2 վարչական վարույթ, 5 անձ ենթարկվել է կարգապահական տույժի, մեկն ազատվել է աշխատանքից: Քաղաքացիների կողմից բարձրացված հարցերն ուսումնասիրվել եւ քննարկվել են։ Խնդրահարույց դեպքերի առնչությամբ տրվել են լրացուցիչ հանձնարարականներ եւ համապատասխան լուծումներ։
Քաղաքացիների կողմից հնչեցված բոլոր հարցերը,առաջարկությունները եւ բողոքները զեկուցվում են ՀՀ առողջապահության նախարարին:
.gif)
