ԿԻՍԻԼԵՎՆ ԱՅԺՄ ԷԼ ՎԻՐԱՎՈՐԱԿԱՆ Է ՀԱՄԱՐՈՒՄ ՆԺԴԵՀԻ ՀԵՐՈՍԱՑՈՒՄԸ

Դեռեւս հունիսի 11-ին հայրենի խորհրդարանում տեղի էր ունեցել հայ-ռուսական խորհրդարանական ակումբի՝ «Ոչ կառավարական կազմակերպությունները որպես պետական քաղաքականության իրականացման միջոց» թեմայով նիստը: Միջոցառման հյուրն էր «Ռուսաստանն այսօր» միջազգային տեղեկատվական գործակալության գլխավոր տնօրեն Դմիտրի Կիսիլեւը, ով հայտարարել էր, թե հայերը ռուսերեն չգիտեն, ինչը շատ վիրավորական է իրենց համար:

Դմիտրի Կիսիլեւի արհամարհական պահվածքը վրդովեցրել էր ԱԺ ՀԱԿ խմբակցության անդամ Նիկոլ Փաշինյանին, ով ԱԺ նիստի ժամանակ դատապարտելով այդ քննարկմանը մասնակցող Աժ պատգամավորների պահվածքը` առաջարկել էր ռուս լրագրողին Հայաստանում հայտարարել «պերսոնա նոն գրատա»: Ն. Փաշինյանի այդ հայտարարությունից հետո ԱԺ ՀՀԿ խմբակցության անդամները միմյանց հերթ չէին տալիս Դ. Կիսիլեւին պաշտպանելու համար: Սակայն պարզվում է՝ Կիսիլեւը վերջերս էլ մի հոդված է գրել, որտեղ արդեն անթույլատրելի արտահայտություններ է թույլ տվել ՀՀ ազգային հերոս Գարեգին Նժդեհի մասին` նրան մեղադրելով ֆաշիզմի մեջ: «Գարեգին Նժդեհի հերոսացումը, ով Երկրորդ համաշխարհային պատերազմի ժամանակ համագործակցել է ֆաշիստների հետ, վիրավորական է Ռուսաստանի քաղաքացիների համար»,- գրել է Կիսիլեւը: Ռուս լրագրողի հայտնած մտքերը վրդովեցրել են ԼՂՀ ԱԺ պատգամավոր Վահրամ Աթանեսյանին, ով հայտարարել է. «Գարեգին Նժդեհին քննադատում էին կոմունիստները, հիմա նրան քննադատում եւ ֆաշիստների հետ նրա համագործակցության մասին խոսում է ռուսական առաջատար լրատվական գործակալության ղեկավարը, ով փաստացի արտահայտում է պաշտոնական շրջանակների տեսակետը»:
«Ժողովուրդ»-ը զրուցել է նժդեհականների հետ՝ պարզելու, թե նրանք ինչպես են վերաբերվում մեր ազգային հերոսի, եւ ՀՀԿ-ականների «գաղափարական հոր» մասին Դ. Կիսիլեւի հայտարարություններին:

ԱԺ ՀՀԿ խմբակցության անդամ ՍԱՄՎԵԼ ՆԻԿՈՅԱՆ
-Պարոն Նիկոյան, «Ռուսաստանն այսօր» միջազգային տեղեկատվական գործակալության գլխավոր տնօրեն Դմիտրի Կիսիլեւը հոդված է գրել, որտեղ նշել է, թե Գարեգին Նժդեհի հերոսացումը վիրավորում է ռուսներին: Դուք, լինելով Նժդեհի գաղափարների կրողը, ինչպե՞ս եք վերաբերվում նման հայտարարություններին:
-Աշխարհում շատ մարդկանց կարող է շատ բան դուր չգալ ու դրա հիման վրա կարող են շատ հայտարարություններ անել, իրենց մոտեցումները ցուցաբերել: Դա իրենց խնդիրն է, ինչո՞ւ եք կարծում, որ կուսակցությունն անպայման պետք է արձագանքի նման հայտարարություններին, տեսակետներին, հոդվածներին: Ինքը կարող է իր տեսակետն ունենալ, որը կարող է ձեւավորված լինել մակերեսային հարթության վրա:
-Այսինքն՝ նման հոդվածները, հայտարարությունները Ձեզ` նժդեհականներիդ, չե՞ն վիրավորում:
-Աշխարհում բազմաթիվ մարդիկ կան ու իրենք կարող են ունենալ իրենց տեսակետները, ՀՀԿ-ն պետք է մտահոգվի՞ բոլորի տեսակետներով: Ոչ միայն Կիսիլեւին, այլեւ շատ ու շատ մարդկանց կարող է Նժդեհի կենսագրությունը դուր չգալ, հիմա ի՞նչ, մենք նստենք ու մտածենք, թե ում դուրը կգա, ում դուրը չի՞ գա:

ԱԺ ՀՀԿ խմբակցության ղեկավար ՎԱՀՐԱՄ ԲԱՂԴԱՍԱՐՅԱՆ
-Պարոն Բաղդասարյան, Դմիտրի Կիսիլեւը հոդված է գրել, որտեղ նշել է, թե Գարեգին Նժդեհի հերոսացումը վիրավորում է ռուսներին: Ինչպիսի՞ն է Ձեր դիրքորոշումը այդ հարցի շուրջ` նկատի առնելով այն հանգամանքը, որ Նժդեհին ֆաշիզմի մեջ մեղադրողին տակավին վերջերս ԱԺ-ում ընդունեցին գլխավոր մուտքից` ցուցաբերելով առաջին դեմքերին վայել ընդունելություն:
-Դա իր կարծիքն է, ու չեմ հասկանում՝ էդ մարդն իր հետեւից է ընկել, ինչ է արել, ես չեմ հասկանում, ո՞նց կարող ենք մենք Նժդեհին չհերոսացնել, ու չգիտեմ՝ ինչպե՞ս ենք վիրավորում ռուսներին:
-Եթե այդպես է, ինչո՞ւ Գարեգին Նժդեհի արձանն այդպես էլ չի կանգնեցվում Հայաստանում:
-Կկանգնեցվի, ամեն ինչ իր ժամանակին կլինի: Եթե որոշումը կա, ուրեմն կկանգնեցվի:
-Բայց Գ. Նժդեհի արձանը տեղադրելու որոշման մասին հայտարարվել էր դեռ նրա 100-ամյակին նվիրված միջոցառումից ի վեր, մինչդեռ ցայսօր նրա արձանը կանգնեցված չէ, փոխարենը քննարկվում է Միկոյանի արձանը կանգնեցնելու հարցը: Միգուցե հենց ռուսների զայրույթը «չբորբոքելու» համա՞ր է դա արվում:
-Կկանգնեցվի, նման տիպի որեւէ բան չկա:

ԱԺ ՀՀԿ խմբակցության անդամ ՇԻՐԱԿ ԹՈՐՈՍՅԱՆ
-Պարոն Թորոսյան, Դմիտրի Կիսիլեւը հոդված է գրել, որտեղ նշել է, թե Գարեգին Նժդեհի հերոսացումը վիրավորում է ռուսներին: Իսկ ՀՀԿ-ականներին նման հայտարարությունները չե՞ն վիրավորում:
-Նժդեհի նկատմամբ մեր վերաբերմունքը հայ-ռուսական հարաբերությունների հետ պետք չէ կապել, ես կարծում եմ՝ դրանք տարբեր հարթությունների վրա են գտնվում: Նժդեհը պայքարել է հանուն ՀՀ-ի անկախության, հանուն ՀՀ-ի պաշտպանության, հանուն հայ ժողովրդի անվտանգության, ու ասել, թե Նժդեհին մեծարելը չի բխում հայ-ռուսական հարաբերություններից` սխալ է, որովհետեւ Նժդեհը պայքարել է սովետական իշխանության դեմ, բոլշեւիզմի դեմ: Իսկ ինչ վերաբերում է մերօրյա հայ-ռուսական հարաբերություններին, ապա դրանք ռազմավարական հարաբերություններ են, բարձր մակարդակի համագործակցությամբ, ու դրանք նույն հարթության վրա դնելը ճիշտ չէ:

ԱԺ ՀՀԿ խմբակցության անդամ ԱՐՏԱԿ ԶԱՔԱՐՅԱՆ
-Պարոն Զաքարյան, խնդրում եմ նշեք Ձեր տեսակետը` կապված Դմիտրի Կիսիլեւի այն հայտարարությունների հետ, թե Գարեգին Նժդեհին հերոսացնելով` հայերը վիրավորում են ռուսներին:
-Նժդեհ պետք է շատ ուշադիր կարդալ ու նաեւ պետք է Նժդեհին շատ խորապես ընկալել ու միայն այդ պարագայում նման տպավորություններ չեն լինի:

ՍՈՆԱ ԳՐԻԳՈՐՅԱՆ