ԲԼԹ

«Մեր պրակտիկայում ես ականատես եմ եղել նման որոշումների կայացմանը, եւ նման իրավիճակ չի եղել, որ ձեռքով քվեարկենք, ու դրա համար առանձին արձանագրություն կազմվի, հաշվիչ հանձնաժողովում որոշում կայացվի»:

Հովհաննես Մարգարյան 168.am
Կարծում ենք՝ վաղուց արդեն պարզ է, որ Հայաստանի ԱԺ-ի եւ իշխանական կուսակցությունների պրակտիկան ճիշտ աշխատանքի չափանիշ չի կարող լինել, հատկապես եթե այդ պրակտիկայի մասին խոսում է ՕԵԿ-ական պատգամավորը: Արդեն հայտնի տխրահռչակ քվեարկության ժամանակ հաշվիչ հանձնաժողովը, ըստ էության, իր բուն գործը չէր արել, այդ պատճառով էլ 77 կողմը դարձավ 72, ինչը կրկին ապացուցեց, որ մեր Աժ-ն ավելի շատ հանրապետականների գրասենյակ է, քան խորհրդարան: Փաստորեն, ՀՀԿ-ի կույրաղիքի համարում ունեցող ՕԵԿ-ական պատգամավորը խոստովանեց, որ նման անհեթեթություններն ԱԺ-ի համար նորմալ երեւույթ են:

 
«Մենք ընդամենը առողջ ապրելակերպի քարոզչական աշխատանքներ ենք տանելու լրագրողների հետ, հասարակական կազմակերպությունների հետ»:

Դերենիկ Դումանյան «Ազատություն»
Այսպիսով՝ առողջ ապրելակերպի կիսաառողջ քարոզչության համար պետբյուջեից հատկացվել է 10 մլն դրամ: Փաստորեն, Հայաստանում անիմաստ խորհրդատվությունների ու քարոզչությունների վրա ավելի շատ գումար է գնում, քան բուն խնդիրների լուծման: Մի՞թե պետք է նախարարության աշխատակիցը մեզ սովորեցնի, թե ինչ է առողջ ապրելակերպը: Դրա փոխարեն նրանք ավելի լավ կանեն` իրենց բուժհաստատությունների բժիշկներին սովորեցնեն, թե ինչպես վարվել հիվանդների ու հաճախորդների հետ, որ այդպես էլ չսովորեցին: Այ դա ուղղակի կլինի առողջ ապրելակերպին ուղղված քայլ:

 
«Երեք հատը մեկի հետ կարելի է փոխել… իմ մեկ քարտն արժի ընդդիմության երեք քարտը»:

Աշոտ Աղաբաբյան 1in.am
Դե իհարկե, ՀՀԿ-ական պատգամավորը, որը կոչումով Գալուստ Սահակյանի աներձագն է, ճիշտ է ասում, որ ՀՀԿ-ական պատգամավորի քարտն այսօր ընդդիմության հազար պատգամավորի քարտ արժե, որովհետեւ բոլոր տխրահռչակ ու հակաժողովրդական որոշումները քվեարկելիս հաշվի են առնվում հենց ՀՀԿ-ականների ձայները: Այնպես որ, ՀՀԿ-ական քարտը մեր երկրում որոշիչ է, համազգային թալանին նպաստող, ՀՀ ինքնիշխանության դեմ պայքարում մեծ դեր ունեցող: Եվ հետո, ՀՀԿ-ական քարտերն այդքան հեշտ չեն ստանում, ծանոթ, բարեկամ, փեսա, բաջանաղ, քավոր պետք է խառնել իրար… Դրա համար էլ այն արժեք ունի:

ԿԱՐԵՆ ՎԱՐԴԱՆՅԱՆ