ՀԱՐՑ. Մենք բազմանդամ ընտանիք ենք եւ ապրում ենք սոցիալապես անապահով պայմաններում: Ի՞նչ փաստաթղթեր են անհրաժեշտ ընտանեկան նպաստ ստանալու համար, եւ արդյոք կապ ունի բնակարանում գրանցված անձանց թիվը:
ՊԱՏԱՍԽԱՆ. «Պետական նպաստների մասին» ՀՀ օրենքի 9-րդ հոդվածի համաձայն` ընտանեկան նպաստ ստանալու համար ընտանիքի չափահաս անդամներից մեկը` ընտանիքի մյուս չափահաս անդամների համաձայնությամբ, տարեկան մեկ անգամ պետք է դիմի իր փաստացի բնակության վայրի սոցիալական ծառայություններ տրամադրող տարածքային մարմին` ներկայացնելով դիմում-հայտարարագիր, ընտանիքի անապահովության միավորը հաշվարկելու համար իր ընտանիքի յուրաքանչյուր անդամի եկամտի, զբաղվածության, սոցիալական վիճակի եւ այլ պայմանների մասին ամբողջական տեղեկատվությունները հավաստող փաստաթղթեր: Օրենքի պահանջից հետեւում է, որ տվյալ բնակարանում հաշվառված անձանց թիվն ունի նշանակություն, քանի որ համակարգում հաշվառվելու համար պահանջվող փաստաթղթերի թվում է նաեւ ՀՀ կառավարությանն առընթեր ՀՀ ոստիկանության բնակչության պետական ռեգիստրում հաշվառման մասին տեղեկանքը, որում նշվում է տեղեկատվություն ընտանիքի գտնվելու վայրում (հասցեում, կացարանում) բնակչության պետական ռեգիստրում հաշվառված եւ փաստացի բնակվող բոլոր անձանց մասին: Տարածքային մարմինն առցանց հարցում է կատարում բնակչության պետական ռեգիստրի տեղեկատվական բազա` դիմումում հայտարարագրված բնակության հասցեի եւ այնտեղ բնակվող անձանց մասին տեղեկատվություն ստանալու նպատակով:
ՀՀ աշխատանքի եւ սոցիալական հարցերի
նախարարության սոցիալական աջակցության
վարչության պետ Ա. Մինասյան
«ԺՈՂՈՎՈՒՐԴ». Ուշագրավ է, որ մարդիկ անհուսությունից, այլ ելք չգտնելով, փորձում են գործադրել բոլոր հնարավոր տարբերակները նպաստառու դառնալու համար:
.gif)
