ԼՂ խնդրի լուծումը պետք է տան Հայաստանը, Ադրբեջանը եւ Լեռնային Ղարաբաղը. «Ժողովուրդ»

«Ժողովուրդ» օրաթերթը գրում է․ «Սերժ Սարգսյանը տարածաշրջանային այցով Հայաստան ժամանած Հարավային Կովկասի ու Վրաստանի ճգնաժամի հարցերով ԵՄ հատուկ ներկայացուցիչ Հերբերտ Զալբերի հետ հանդիպման ժամանակ կարեւոր հայտարարություն է արել ԼՂ խնդրի մասին:

Պաշտոնական հաղորդագրության համաձայն՝ «Սերժ Սարգսյանը վերահաստատել է մեր երկրի դիրքորոշումը, ըստ որի՝ Հայաստանը ԼՂ հիմնահարցի խաղաղ կարգավորումը տեսնում է բացառապես խաղաղ միջոցներով, ԵԱՀԿ Մինսկի խմբի համանախագահողների ձեւաչափում ընթացող բանակցությունների շրջանակում: Մինսկի խումբն առաջարկել է սկզբունքներ, որոնք, Սերժ Սարգսյանի համոզմամբ, կարող են հակամարտության լուծման առանցք դառնալ»:

ԵՄ պաշտոնյային նա ասել է նաեւ, որ Ադրբեջանը հակառակ իր պնդումներին, չի ընդունում այդ սկզբունքները: Ս.Սարգսյանը նաեւ ընդգծել է, թե ԼՂ խնդրի լուծումը պետք է տան Հայաստանը, Ադրբեջանը եւ Լեռնային Ղարաբաղը:

Հիշեցնենք, որ բանակցային սեղանին դրված են հայտնի Մադրիդյան սկզբունքները, որոնք առաջին հերթին սկզբունքորեն մերժում է ԼՂՀ-ն, եւ վերջին շրջանում ԼՂՀ պաշտոնյաները պարբերաբար հայտարարել են այդ մասին: Եվս մեկ փաստ. հակառակ Ս.Սարգսյանի պնդումներին, թե ԼՂ խնդրի լուծումը պետք է տա նաեւ ԼՂՀ-ն, վերջինս 1998թ. ի վեր ներկայացված չէ բանակցային գործընթացում: Էլ ինչպե՞ս պետք է լուծում տա խնդրին»:

Ամբողջությամբ՝ թերթի այսօրվա համարում։