Երևանի քաղաքապետարանի 2014 թվականի ծրագրերով իրականացվող աշխատանքներին տեղում հետևելու նպատակով Երևանի քաղաքապետ Տարոն Մարգարյանի վարչական շրջաններ աշխատանքային հերթական շրջայցը Աջափնյակում էր: Վարչական շրջանի ղեկավարի ուղեկցությամբ քաղաքապետն այցելել է Սիսակյան 16, Շինարարների 6 և 15, Մարգարյան 45 հասցեներում կառուցվող բազմաբնակարան շենքերի շինհրապարակներ, որտեղ ընթանում են բազմաբնակարան շենքերի շնարարական աշխատանքները: Մայրաքաղաքի 4-րդ աստիճանի վթարային շենքերի բնակիչներին նոր բնակարաններով ապահովելու նպատակով նախատեսված բազմաբնակարան շենքերը, որոնք կառուցվում են նույն հասցեներում ապամոնտաժված 4-րդ աստիճանի վթարային շենքերի տեղում, համաձայն նախագծի, բազմահարկեր են:
Ներկայացնելով շինարարության ընթացքը՝ պատասխանատուները քաղաքապետին զեկուցել են, որ աշխատանքներն իրականացվում են սահմանված ժամանակացույցի համաձայն: Երևանի քաղաքապետը բոլոր պատասխանատուներին հանձնարարել է մշտական հսկողության տակ պահել շինաշխատանքներն ու դրանք կազմակերպել այնպես, որ շինարարության ընթացքում հարակից տարածքների բնակչությանը հնարավորին քիչ անհանգստություն պատճառվի: Քաղաքապետի հանձնարարությամբ շինարարության ավարտից հետո կբարեկարգվեն ու պատշաճ տեսքի կբերվեն նորակառուցների հարակից տարածքները:
Պատասխանելով լրագրողների՝ 4-րդ կարգի վթարային շենքերի բնակիչների վերաբնակեցման փուլային ծրագրով իրականացվող գործընթացի վերաբերյալ հարցերին՝ քաղաքապետ Տարոն Մարգարյանն ընդգծել է, որ վթարային շենքերի բնակիչների տարհանման և նոր բնակարաններով ապահովման հարցը մշտապես եղել է քաղաքապետարանի առաջնահերթ լուծում պահանջող խնդիրների շարքում և հենց այս ուղղությամբ հետևողական աշխատանքի շնորհիվ է, որ ձեռնարկված հստակ քայլերով այսօր կառուցվում են միանգամից մի քանի շենքեր:
«Եթե հիշում եք, 2012 թվականին իմ որոշմամբ ստեղծվեց 4-րդ կարգի վթարային շենքերի բնակիչների վերաբնակեցման հանձնաժողով, որը պետք է նախ տեղերում գույքագրեր առկա պահանջարկը՝ ընդհանուր պատկերացում կազմելու համար, թե ինչ ծավալների մասին է խոսքը: Գույքագրմամբ պարզ դարձավ, որ տվյալ պահի դրությամբ ավելի քան 650 բնակարանների կարիք կա: Հարցը նաև Հանրապետության նախագահի ուշադրության կենտրոնում էր, և ՀՀ կառավարության հետ համատեղ մենք խնդիր դրեցինք 2013 թվականին, առնվազն, 200 ընտանիքների ապահովել բնակարաններով: Սիսակյան 22 և Մարգարյան 37 հասցեներում բազմաբնակարան շենքերի կառուցումով, ըստ էության, լուծեցինք առաջնահերթ տարհանման ենթակա 207 բնակարանների խնդիրը: Ի դեպ, Սիսակյան 22 շենքը կառուցվել էր բացառապես համայնքային բյուջեի միջոցներով: Իսկ արդեն այս տարի, ՀՀ կառավարության հետ համատեղ, նախաձեռնել ենք 4 բազմաբնակարան շենքերի կառուցում, որի արդյունքում ամբողջությամբ կլուծենք վթարային շենքերի 450 բնակիչների բնակարաններով ապահովման խնդիրը», – ընդգծել է քաղաքապետ Տարոն Մարգարյանն ու հավելել նաև, որ 2014 թվականի հունվարի 1-ի դրությամբ Երևանում հաշվառված է քանդման ենթակա 4-րդ կարգի վթարայնության 9 շենք՝ 450 բնակարանով: Խոսելով նորակառույցներում բնակարանների հատկացման սկզբունքի մասին՝ Տարոն Մարգարյանը նշել է, որ Երևանի քաղաքապետարանը քանդման ենթակա շենքերից վերաբնակեցումն իրականացնում է ՀՀ կառավարության 25.10.2000թ. հ. 682 որոշմամբ հաստատված կարգին համապատասխան, ինչը չի նախատեսում բնակիչների վերաբնակեցումն իրականացնել բարելավումով և մեկ գույքային միավորի դիմաց հատկացնել հավելյալ կառուցվածքով բնակարան և /կամ/ լրացուցիչ բնակարան, ինչպես նաև չի նախատեսում հավելավճարի դիմաց կատարելու բնակմակերեսի ավելացում: Քաղաքապետը նաև ընդգծել է, որ ինչպես արդեն իսկ տրամադրված 207 բնակարանների պարագայում, այնպես էլ կառուցվող նոր բնակարանները շահառուներին կտրամադրվեն վիճակահանության սկզբունքով. Այսինքն, բնակիչներն իրենք վիճակահանությամբ կորոշեն նոր բնակարանի հարկն ու համարը:
Վթարային շենքերի բնակիչներին վերաբնակեցնելու նպատակով կառուցվող բոլոր շենքերում բնակարանները շահառուներին կհանձնվեն բնակության համար միանգամայն պատրաստի վիճակում՝ ամբողջությամբ նորոգված և ջեռուցման անհատական համակարգով ապահովված: Շենքերի կառուցման համար նախատեսվել է 5 մլրդ 600 մլն դրամ, որից 1 ու 6 միլիարդը տրամադրվել է համայնքային բյուջեից, իսկ 4 մլրդ-ը՝ կառավարության կողմից: Բոլոր շենքերը կառուցվում են նախկին վթարային շենքերի տեղում և ունեն սեյսմակայունության ՀՀ-ում գործող նորմերին համապատասխան աստիճան։ Ինչպես Սիսակյան 16, այնպես էլ մյուս շենքերի շինարարական աշխատանքները նախատեսվում է ավարտել 2015 թվականի հոկտեմբերին:
Երևանի քաղաքապետարանի տեղեկատվության և հասարակայնության հետ կապերի վարչություն
.gif)
