ՊՐՈՖԵՍԻՈՆԱԼ ԻՆՉՊԻՍԻ՞ ԼՈՒԾՈՒՄ ԿԱՌԱՋԱՐԿՎԻ

Արդեն տեղեկացրել ենք, որ ՀՀ ԿԱ քաղաքացիական ավիացիայի գլխավոր վարչության պետ Արտյոմ Մովսիսյանը հայտարարել է, թե «Զվարթնոց» օդանավակայանի հին շենքը, այնուամենայնիվ, քանդվելու է: Նկատենք, որ այս որոշումը կայացվել է՝ հակառակ բազմաթիվ մասնագետների առարկության, այդ թվում եւ` ՀՀ նախագահին կից Հանրային խորհրդի բացասական եզրակացության:

«Զվարթնոց» օդանավակայանի հին շենքը, որը տասնամյակներ շարունակ համարվել է մայրաքաղաքի ճարտարապետական այցեքարտերից մեկը, 1970-ականների խորհրդային եւ հայկական մոդեռնիստական ճարտարապետության ամենանշանակալի կառույցներից է եւ ներառված է խորհրդային մոդեռնիզմի մասին համաշխարհային մասնագիտական ճարտարապետական գրականության ընտրանու մեջ: 2012թ. այն ընդգրկված էր «Խորհրդային մոդեռնիզմ 1955-1991թթ. անհայտ պատմություններ» Վիեննայի ճարտարապետական կենտրոնի կողմից կազմակերպված ցուցահանդեսում ու եղել է Վիեննայի 19-րդ միջազգային ճարտարապետական կոնգրեսի ընթացքում ամենից շատ ակնարկվող ու շեշտադրվող կառույցներից: Իսկ 2013թ մայիսին Ստամբուլում բացված «Trespassing Modernities» («Սահմաններ անցնող արդիություններ»)՝ խորհրդային մոդեռնիստական ճարտարապետությանը նվիրված մեծածավալ ցուցահանդեսի էքսպոզիցիան սկսվել է հենց «Զվարթնոց» օդանավակայանի մանրակերտով:
«Ժողովուրդ»-ը երեկ փորձեց ՀՀ ԿԱ քաղաքացիական ավիացիայի գլխավոր վարչության պետ Արտյոմ Մովսիսյանից պարզել, թե, ի վերջո, ինչպես է որոշվելու «Զվարթնոց» օդանավակայանի հին շենքի «ճակատագիրը»` հաշվի առնելով այս հարցում առկա մասնագիտական դիմակայությունը:
-ՀՀ կառավարության՝ դեկտեմբերի 26-ի որոշումը հավանության է արժանացել «Զվարթնոց» օդանավակայանի կառավարչի կողմից: Հիշեցնեմ, որ ՀՀ վարչապետը հայտարարել էր, թե քանի որ ճարտարապետները սովետական մոդեռնիզմին գնահատական են տալիս, ու շենքն արժեք է ներկայացնում… վարչապետն առաջարկում էր եւս մեկ անգամ այս հարցը քննարկել կառավարչի հետ: Այսինքն` փաստաթուղթը հավանության արժանացել է, մենք հարցը կոնսեսյոների հետ քննարկել ենք, եւ նա երեկ մեզ գրություն է ուղարկել այն մասին, որ ինքը կշարունակի բոլոր գործառույթները: Իսկ ինչ վերաբերում է այդ առաջարկին, ապա կառավարիչը պատրաստակամ է այն ապագայում քննարկելու եւ լրացուցիչ լուծումներ գտնելու:
-Փաստորեն, դեռեւս որեւէ հստակություն չկա, առայժմ սպասողական վիճակ է:
-Սպասողական վիճակ չի կարող լինել, քանի որ ինքը՝ փաստաթուղթը, հավանության արժանացել է՝ քանդման հետ կապված, այստեղ պարզապես խնդիրն այն է, թե պրոֆեսիոնալ ինչպիսի լուծում կառաջարկվի: Եթե հիշում եք, ՀՀ վարչապետի խոսքը նաեւ եղել է «Մինի Եվրոպ»-ի հետ կապված: Բրյուսելում առկա կառույցի օրինակով առաջարկվել է նման մի կառույց ստեղծել այստեղ: Դա հետաքրքիր մի կառույց-այգի է, որտեղ ցուցադրված են ամբողջ Եվրոպայի գեղեցիկ կառույցները, շինությունները մակետների տեսքով, ու պատմամշակութային արժեքները նման ձեւով պահպանվում են: Վարչապետը նմանատիպ մի առաջարկ է արել ու նշել, որ որպես օրինակ՝ այսպիսի լուծում կարելի է կիրառել:
-Այսինքն` շենքը, այնուամենայնիվ, քանդվելու է, եւ առավելագույնը, որ առաջարկվում է, այն մակետի տեսքով պահպանե՞լն է: Բայց հենց Ձեր նշած Եվրոպայում նման կառույցները ոչ թե քանդում են, ապա դրանց մակետները պահպանում, այլ պետական հսկայական միջոցներ են հատկացնում նման շենքերի պահպանության համար: Մի՞թե հնարավոր չէր որեւէ լուծում գտնել «Զվարթնոց»-ի հին շենքը, թեկուզ այլ նպատակով կիրառելով, պահպանելու համար:
-Եթե մենք վերցնում ենք «Զվարթնոց» օդանավակայանը, ապա այն մշակութային արժեքների ցանկում ընդգրկված չէ: Հենց ամբողջ խնդիրն այն է, որ երբ մենք հարցին մոտենում ենք իրավական տեսանկյունից, ապա այդ դեպքում կոնսեսյոներն ազատ է իր որոշումներում, ՀՀ կառավարությունը` եւս: Տարիներ շարունակ ցանկեր են հաստատվել, եւ ոչ մի անգամ մշակույթի գործիչները, հասարակական կազմակերպությունները չեն դիմել համապատասխան կառույցներին` այդ շինությունը մշակութային հուշարձանների ցանկում ներառելու համար: Ինքը, կարող է, ներառված է գրականության մեջ, բայց ինքը մշակութային արժեք չի համարվում: Ես էլ եմ ընդունում, որ դա ներառված է գրականության մեջ, այլ բան չեմ կարող ասել: Իսկ ինչ վերաբերում է ավիացիայի զարգացմանը, եթե դրան խանգարող հանգամանքներ չկան, ապա պետք է գնալ զարգացման ճանապարհով:

Զրուցեց ՍՈՆԱ ԳՐԻԳՈՐՅԱՆԸ

 
ՀՀԿ-ԱԿԱՆ ՊԱՏԳԱՄԱՎՈՐՆԵՐԸ ՎԻՃԵՑԻՆ

ԱԺ պետաիրավական հարցերի մշտական հանձնաժողովի երեկվա նիստը բավական թեժ էր. բանը հասավ ընդհուպ մինչեւ վիճաբանության եւ փոխադարձ վիրավորանքների: Ընդ որում, վեճը տեղի ունեցավ հենց իշխող ՀՀԿ պատգամավորների եւ ՀՀ արդարադատության փոխնախարար Գրիգոր Մուրադյանի միջեւ:

Նիստում քննարկվում էր ԱԺ բոլոր 6 խմբակցությունների ներկայացուցիչների հեղինակած «Դատախազության մասին» եւ «ՀՀ ԱԺ կանոնակարգ» օրենքներում փոփոխությունների նախագիծը, որով հստակեցվում է խորհրդարանին ՀՀ գլխավոր դատախազի` ԱԺ տարեկան հաշվետվությունը ներկայացնելու կարգը, բացի այդ՝ նախատեսվում է, որ ԱԺ-ն պետք է եզրակացություն տա հաշվետվության վերաբերյալ:
Այս նախագծին սկզբում փորձում էին դեմ արտահայտվել ՀՀԿ-ական Հովհաննես Սահակյանը, որր, ի դեպ, ՀՀ գլխավոր դատախազ Գեւորգ Կոստանյանի համակուրսեցին է եղել, ինչպես նաեւ ՀՀԿ-ական Կարեն Ճշմարիտյանը: Սակայն նրանց պահվածքը, մեղմ ասած, տարօրինակ է մեկ պարզ պատճառով, որ նախագծի տակ դրված են նաեւ երկու ՀՀԿ-ականների` ԱԺ պետաիրավական հարցերի մշտական հանձնաժողովի նախագահ Դավիթ Հարությունյանի եւ ՀՀԿ խմբակցության ղեկավար Գալուստ Սահակյանի ստորագրությունները:
ՀՀԿ-ականների այս հակասություններն էլ, կարծես, ավելի նպաստեցին, որ փոխնախարար Գրիգոր Մուրադյանը, հայտարարելով նախագծի վերաբերյալ կառավարության բացասական վերաբերմունքի մասին, պնդի` դատախազը քաղաքական պաշտոնյա չէ, հետեւաբար չի կարող հաշվետվություն ներկայացնել ԱԺ-ին: Թեեւ, մյուս կողմից նա չկարողացավ պարզաբանել, թե, օրինակ, ՄԻՊ-ը, չլինելով քաղաքական մարմին, ինչու է գալիս ԱԺ, հաշվետվություն ներկայացնում: Դ. Հարությունյանն էլ, հակասություններ տեսնելով Մուրադյանի պատասխանների մեջ, դիտողություն արեց. «Դուք խուսանավեցիք իմ հարցերին պատասխանելուց»: Մուրադյանը դրանից խոցվեց ու հակադարձեց, թե ինքը չի եկել ԱԺ` քննություն տալու, հետո վերամբարձ տոնով շարունակեց. «Ես կխնդրեի մի փոքր լուրջ վերաբերվել կառավարության կարծիքին: Ինձ համար անհասկանալի է ձեր ասած զարմանալը, չհասկանալը. ինձ համար դասեր տալու ոճով ինձ սովորեցնելը, մեղմ ասած, ծիծաղելի է, ու այս ոճն ինձ համար ընդունելի չէ»: Նա նույնիսկ հայտարարեց, թե ինքը կարող է պատգամավորների համար ԱԺ-ում սահմանադրական իրավունքի դասընթացներ անցկացնել:
Սա լցրեց պատգամավորների համբերության բաժակը, եւ Ճշմարիտյանն ու Հարությունյանը զայրացած, գրեթե բղավելով հակադարձեցին. «Լսի՛, դու էդ ի՞նչ տոնով ես խոսում»: Դ. Հարությունյանն ավելացրեց. «Չափն ու սահմանն անցաք: Եկե՛ք գնանք, որտեղ ուզում եք, կանցկացնենք, որովհետեւ սա արդեն, ինձ թվում է, չափն անցել է… Կառավարության ղեկավարը պետք է որոշի, թե ում է ուղարկում ԱԺ, որ կարողանա պահել էթիկայի կանոնները»: Մուրադյանն էլ հակադարձեց, թե կառավարության ղեկավարն ինքն է որոշում, ում ուղարկի ԱԺ:
ԱԺ պետաիրավական հարցերի մշտական հանձնաժողովը, այնուամենայնիվ, դրական եզրակացություն տվեց 6 խմբակցությունների այդ նախագծին` դրանք ընդգրկելով ԱԺ մեծ օրակարգ:

ԱՐՄԱՆ ԳԱԼՈՅԱՆ

 
ԼՈՒՐԵՐ

ԴԵՄ ԵՆ

Հանրային խորհրդի ղեկավար Վազգեն Մանուկյանը «Ժողովուրդ»-ի հետ զրույցում հայտարարեց, որ «Զվարթնոց» օդանավակայանի հին շենքի քանդման հարցում իրենք վճռական են. չի կարելի այն քանդել. «Մենք այսօր մեր նիստի ժամանակ որոշել ենք, որ շարունակելու ենք մեր պնդումները: Մենք ՀՀ կառավարության առջեւ հարցեր էինք բարձրացրել՝ «Զվարթնոց» օդանավակայանի հետ կապված, ու այժմ պետք է պատասխան ստանանք: Մեր աշխատանքները դրանով չեն ավարտվում»: Սակայն նա ոչ մի կերպ չցանկացավ բացահայտել, թե ինչ նկատի ունի՝ «մեր աշխատանքները դրանով չեն ավարտվում» ասելով:

ԹԱՆԿ ԾԱՌԱՅՈՒԹՅՈՒՆ

Ինչպես Հայաստանի բնակչության գերակշիռ մասը, այնպես էլ ՀՀ նախագահի նստավայրը այս ձմեռ հսկայական կոմունալ վճարումներ է կատարել: Պատրաստվում է նախագահականում ամսական օգտագործում են մոտ 130 հազար կիլովատ ժամ էլեկտրաէներգիա: «Ժողովուրդ»-ի տեղեկություններով՝ նախագահականն ամսական վճարում է մոտ 4.5 մլն դրամ, բնականաբար, ՀՀ պետական բյուջեից` հարկատուներիս հաշվին:

ՄԱՐԴԿԱՆՑ ՀԱՇՎԻՆ

Տիգրան Սարգսյանի կառավարությունն իր որոշումներով նպաստում է Հայաստանում շեշտակի գնաճին. կառավարության այսօրվա նիստի օրակարգում ընդգրկված է «Առեւտրի եւ ծառայությունների մասին» ՀՀ օրենքում փոփոխությունների նախագծին հավանություն տալու հարցը: Իսկ այդ նախագծով կառավարությունն առաջարկում է այս տարվա ապրիլի 1-ից պարտադիր դրոշմապիտակներ փակցնել կաթնամթերքների, սուրճի, թեյի, ձեթի, պահածոների ու մի շարք այլ ապրանքատեսակների վրա: Դրոշմապիտակներ փակցնելն ինքնըստինքյան կբերի նշված ապրանքատեսակների թանկացման: Հիշեցնենք, որ նախորդ տարվա հուլիսի 1-ից էլ դրոշմապիտակներ փակցնելը պարտադիր դարձավ հյութերի եւ այլ ըմպելիքների համար: Արդյունքում` հյութերն ու հանքային ջրերը թանկացան մոտ 30 դրամով: Տեղեկացնենք նաեւ, որ 2013թ. մայիսին կաթնամթերքը մեկ անգամ արդեն թանկացել էր. թե այս տարվա ապրիլի 1-ից որքան կթանկանան վերոհիշյալ ապրանքատեսակները, մնում է ենթադրել:

ՃԻՇՏ Է

ՀՀ ԱԳ նախարար Էդվարդ Նալբանդյանը երեկ սկանդալային հայտարարություն է արել: Լրագրողները նրանից մեկնաբանություններ են խնդրել աշխարհահռչակ հայ շանսոնյե, Շվեյցարիայում ՀՀ դեսպան Շառլ Ազնավուրի հնչեցրած մտահոգությունների եւ քննադատությունների մասին: «Ես խորը ակնածանքով եմ խոսում նրա մասին: Մենք միասին ճանապարհորդել ենք, հիմա էլ շփվում ենք: Շառլ Ազնավուրի բոլոր մտահոգությունները ճիշտ են ու իմաստուն, պետք է հարգանքով վերաբերվել այդ մարդու ասածներին»,-նշել է Նալբանդյանը: Հիշեցնենք, որ Ազնավուրը խոսել էր Հայաստանում հաստատված մաֆիայի մասին, ահազանգել արտագաղթի տեմպերի վերաբերյալ, ընդ որում բավական սուր արտահայտություններով: Ու հիմա ԱԳ նախարարն իր այս հայտարարությամբ համաձայնել է Ազնավուրի խոսքերի հետ, կիսում է նրա հնչեցրած գնահատականները մաֆիայի ու սպիտակ եղեռնի մասին: