Քաղաքաշինության նախարարությունում այսօր՝ լրագրողների հետ հանդիպմանը, նախարար Նարեկ Սարգսյանն ամփոփեց իր պաշտոնավարման հարյուր օրը:
Լսելով նախարարին` տպավորություն ստեղծվեց, որ քաղաքաշինության ոլորտում կան միայն խնդիրներ, որոնք չեն լուծվում:
Այսպես, նախարարը տեղեկացրեց, որ անցած երեք-չորս ամիսների ընթացքում ուսումնասիրություններն ու աշխատանքները ցույց են տվել, որ կան լուրջ խնդրրներ թե՛ ճարտարապետությունում, թե՛ շինարարների աշխատանքում և թե՛ մյուս բոլոր ոլորտներում:
Անդրադառնալով Հյուսիսային պողոտայի «չվերջացող» շինարարությանը, նախարարը նշեց, որ հոկտեմբերին նախատեսվում է ավարտին հասցնել բարեկարգման աշխատանքները:
«Ամբողջությամբ ավարտված կլինեն սալահատակների նորոգումները: Այժմ օգտագործվում են կոշտ նյութեր, ծաղկամաններն են փոխվելու, որոնց մակերեսները երեք անգամ մեծացվում են, թփերի փոխարեն ծառեր են լինելու, արտաքին լուսավորության էլեմենտներն են փոխվելու: Տեղադրվելու են նաև ժամանակակից քանդակներ»,- տեղեկացրեց Նարեկ Սարգսյանը:
Լրագրողի հարցին, ինչու՞ որոշվեց թփերի փոխարեն ծառեր տեղադրել, նախարարը պատասխանեց. «Եթե մարդը մահամերձ ընկած է, մարդու կյանքը բժիշկը փրկում է, հետո մնացած սպիի համար բժշկին մեղադրում են: Հյուսիսային պողոտան` տասը հա տարածք է, և կա Երևանի երկու գլխավոր հրապարակները միացնող հատված, որը պետք է ծառերով շրջապատել:
2007 թ.-ին չունեինք տեխնոլոգիաները, հիմա ունենք, կանցնի ևս տասնհինգ տարի տեխնոլոգիաները կփոխվեն, կգան նոր սերունդներ, և կրկին ճարտարապետական փոփոխություններ կլինեն»:
Նախարարը նշեց նաև, որ ճարտարապետական սխալներ միշտ են լինում:
Առաջիկայում ի՞նչ հեղինակավոր շինություններ են քանդվելու և ինչու՞ հարցը նախարարը գնահատեց որպես սարկազմ և հավաստիացրեց, որ չեն քանդվի: Իսկ «Զվարթնոց» օդանավակայանի մասով Նարեկ Սարգսյանը տեղեկացրեց, որ հեղինակների հետ համատեղ ստեղծվում է աշխատանքային խումբ, որը տեղում կուսումնասիրի, թե խնդիրներն ինչի հետ են կապված, և դրանք կլուծվեն: Այս պահին շենքը քանդելու խնդիրներ չկան:
Փաստորեն, ստացվում է, որ մինչ այսօր շենքը քանդելու շուրջ հայտարարություններն անհիմն են եղել, քանի որ չի եղել աշխատանքային խումբ, որը կուսումնասիրեր խնդիրները: Իսկ խնդիրներ, նախարարի հավաստմամբ, կան, բայց թե որոնք են դրանք, պարզ չէ:
.gif)
