Սահմանամերձ Ճամբարակ քաղաքի քաղաքապետ Յուրա Ավալյանը «Ժողովուրդ» օրաթերթի հետ զրույցում վստահեցրեց, որ 38 կիլոմետր ավտոճանապարհը վերանորոգելու համար ողջ քաղաքը պատրաստ է քվեարկել ՀՀԿ-ի օգտին:
-Պարո՛ն Ավալյան, Ձեզ մոտ քաղաքական իրավիճակը սրվե՞լ է:
-Կայուն է: Սրվելու խնդիր չկա: Բնակիչները բոլորին էլ ճանաչում են` կուսակցություններին:
-Իսկ ո՞ւմ են ավելի շատ հակված ընտրելու:
-Դե, բնականաբար, Հանրապետականին:
-Բայց ինչո՞ւ բնականաբար:
-Դե, այնուամենայնիվ, եթե համայնքի ղեկավարը հանրապետական ա, այս տարածքում ունենք լուրջ խնդրի լուծում` կառավարական մակարդակով:
-Ի՞նչ խնդրի մասին է խոսքը:
-Ավտոճանապարհի 38 կիլոմետրի կառուցում, որը մեր գերակա խնդիրն էր: Այդ խնդիրը լուծում է ստացել, եւ բնակիչները տեսան, որ, վերջիվերջո, մեր տարածաշրջանի ճանապարհը հիմնովին կառուցեց:
-Բայց Ճամբարակը Հայաստանի Հանրապետության ամենաաղքատ քաղաքներից մեկն է: Մարդիկ հա՛մ վատ են ապրում, հա՛մ սիրում են ՀՀԿ-ին, ինչպե՞ս է դա լինում: Ընդամենը մի ճանապարհը սարքելո՞վ:
-Ես չգիտեմ, թե ոնց է, որ ամենաաղքատն է: Էստեղ մարդիկ իրենց զբաղմունքն ունեն:
-Ձեզ մոտ գործազրկություն էլ չկա՞:
-Դե մարդիկ անասնապահությամբ են զբաղվում, իրենց տունը պահում են: Մարդիկ կան՝ պետական աշխատողներ են: Իրենց խնդիրները լուծում են: Էդքան պրոբլեմներ չկան, որ ասենք, թե վատ է: Հասկացանք` գործարաններ չկան, որ մարդիկ աշխատեն, բայց դե անասնապահությամբ կարողանում են իրենց աշխատանքը ապահովել:
-Հավանաբար կասեք նաեւ, թե Ճամբարակից մարդիկ չեն արտագաղթում: Այո՞:
-Այդքան էլ ոչ:
-Փայլուն է: Իսկ այլ կուսակցությունները ներկայացվա՞ծ են հեռավոր Ճամբարակում, թե՞ միայն ՀՀԿ-ն է:
-Դե հիմա Ձեզ ասեմ` իմ տեղակալը Բարգավաճ ա: Կուսակցության նախագահն ա:
-Տուկի թել, սելիտրա չի՞ բաժանում ԲՀԿ-ի կողմից:
-Չէ՛, տենց տեղեկություն չունեմ:
-Իսկ տրակտո՞ր:
-Էս պահի դրությամբ տենց բան չեն տվել:
-Իսկ ընդդիմությունը Ձեզ մոտ ի՞նչ դիրքերում է:
-Ճիշտն ասած, մեզ մոտ ընդդիմությունն ուժեղ կառուցվածքներ չունի:
-Իսկ համակիրնե՞ր:
-Համակիր ունեն, բայց քիչ կազմով:
-Ձեզ մոտ մեծամասնական ընտրակարգով ՀՀԿ-ն թեկնածու չի առաջադրել: ՕԵԿ-ի, ԲՀԿ-ի եւ Հայ ազգային կոնգրեսի անդամներն են առաջադրել իրենց թեկնածությունը: Ո՞ւմ համար եք աշխատում:
-Էսօրվա դրությամբ մեծամասնականի պահով ոչ մեկի համար չենք աշխատում:
-Իսկ անձամբ Դուք ո՞ւմ եք ճանաչում, ո՞ւմ եք հակված պաշտպանելու:
-Ես ոչ մեկին էլ չեմ ճանաչում, ոչ մեկի հետ էլ շփում չեմ ունեցել:
-Բայց իրենք նաեւ Ճամբարակն են ներկայացնելու, ով էլ որ ընտրվի: Իսկ Դուք որեւէ մեկին չե՞ք ճանաչում:
-Դե քարոզարշավը թող սկսվի, թեկնածուները կգան համայնք, կշփվենք, կճանաչենք, կտեսնենք` ով հնարավորություն ունի մեր համայնքում ինչ-որ բան անելու, նրան էլ կպաշտպանենք:
Հ.Գ. Ու այսպիսի ծիծաղելի տրամադրությամբ էլ ՀՀԿ-ն կառուցում է իր ընտրարշավը. եթե համայնքի ղեկավարը ՀՀԿ-ական է, ուրեմն ՀՀԿ-ն պետք է ընտրվի: Ոչինչ, որ մարդիկ սոված են, թշվառ, անգործ: Կարեւորը համայնքի ղեկավարը ՀՀԿ-ական է, գազալցակայան ունի ու իր կամքը կարող է թելադրել իրենից խեղճին:
.gif)
