ՀՀ կառավարությունն այսօրվա նիստում որոշում կայացրեց Գյուղատնտեսության նախարարությանը հատկացնել մոտ 348 մլն դրամ՝ Արաքս գետի ափապաշտպան կառույցի վերականգնման համար։Արաքս գետի 2012 թ. գարնանային վարարումների առավելագույն ելքը մասնագետները գնահատել են 900 մխ/վրկ, որը 18-20 տոկոսով գերազանցում է 2011 թ. նույն ժամանակահատվածի համապատասխան ցուցանիշը։Կառավարության որոշմամբ նախատեսված է աշխատանքների իրականացման ընթացքում Արմավիրի մարզի Մարգարա, Երվանդաշատ համայնքների տարածքում ամրացնել Արաքս գետի արգելաթումբը և Սյունիքի մարզում, ինչպես նաև Արարատի մարզի Եղեգնավան գյուղում բարձրացնել արգելաթմբի կատարը: Աշխատանքներ կիրականացվեն նաև Լուսառատի տարածքում:Գործադիրի որոշմամբ՝ նախատեսված է նաև կառուցել նոր կամուրջ, և այս ամենի շնորհիվ առափնյա տարածքները զերծ կմնան ողողումից։Կառավարությունը նաև որոշում ընդունեց Գյուղատնտեսության նախարարությանը տրամադրել ևս 5 մլն դրամ, որը պետք է որպես նվիրատվություն հատկացվի “Կանաչազարդ երկիր” հասարակական կազմակերպությանը՝ բարձրորակ տնկանյութերի աճեցմանն ու կանաչ գոտիների վերականգնմանն աջակցելու համար:Կազմակերպությունը 2010 և 2011 թթ. հանրապետության մի շարք մարզպետարաններին և այլ կազմակերպությունների անհատույց տրամադրել է ավելի քան 100 հազար տնկանյութ։ Ծրագիրը շարունակվում է նաև այս տարի։
Վարչապետը, տեղեկանալով, որ այս հասարակական կազմակերպությունը ղեկավարում է Սոս Սարգսյանը, շնորհակալություն հայտնեց նրան շոշափելի արդյունքի հասնելու համար և մաղթեց քաջառողջություն։
.gif)
