««ՆԱԻՐԻՏ»-Ի ՀԱՐՑՈՎ ԴԻՄԵ՛Ք ԻՐԱՎԱՊԱՀ ՄԱՐՄԻՆՆԵՐԻՆ»
Օրերս ԱԺ տնտեսական հարցերի մշտական հանձնաժողովը մերժեց ՀՅԴ խմբակցության` «Նաիրիտ» գործարանի մասնավորեցման, ստանձնած վարկային պարտավորությունների եւ անհրաժեշտ ծավալով տնտեսական գործունեություն չիրականացնելու պատճառներն ուսումնասիրող ժամանակավոր հանձնաժողով ստեղծելու առաջարկը: Պատճառաբանվեց, թե հանձնաժողովի ստեղծումը նպաստելու է քաղաքական շահարկումներին: Սակայն, չնայած դրան, ԱԺ ՀՅԴ խմբակցությունը հարցը համարում է հրատապ, ու այսօր այն արտահերթ կարգով քննարկվելու է: Խնդրի շուրջ «Ժողովուրդ»-ը զրուցեց ԱԺ տնտեսական հարցերի մշտական հանձնաժողովի նախագահ, ՀՀԿ խմբակցության անդամ Վարդան Այվազյանի հետ:

-Պարո՛ն Այվազյան, փաստորեն, ՀՅԴ-ականները «Նաիրիտ»-ի հարցով ժամանակավոր հանձնաժողով ստեղծելու մասին նախագիծը համարում են հրատապ, ու արդեն որոշվել է, որ այն քննարկելու են արտահերթ կարգով: Դուք ինչպե՞ս եք վերաբերում այս հարցին, քանի որ Ձեր հանձնաժողովը հարցը համարեց քաղաքական:
-Մենք մեր վերաբերմունքն արդեն ասել ենք, որովհետեւ երբ իրենք հանձնաժողովում ներկայացրել են քննարկման, հանձնաժողովը տվել է բացասական եզրակացություն: Իսկ ինչի՞ համար է տվել բացասական եզրակացություն. սույն հարցը բարձրացվել է մի քանի անգամ, մենք հստակ մեր գործընկերոջը խնդրեցինք, ասացինք, թե քանի որ գնում է բանակցային գործընթաց, հարցը ժամանակավրեպ է: Իրենք էլ ասացին, թե հարցը մտցրե՛ք օրակարգի մեջ, բայց մենք կքննարկենք աշնանը: Մենք էլ նշեցինք, որ սա քննարկման պարագայում բերելու է քաղաքական շահարկումների: Եվ երկրորդ` այս գործընթացն իր մեջ պարունակում է իրավական տարբեր խնդիրներ, որոնց մասին, ասենք, պատգամավորն իրազեկված չէ: Չէ՞ որ այդ պայմանագրերը միջազգային արբիտրաժի քննարկման ենթակա են: Բացի այդ` հարց. իրենք դատախազություն դիմե՞լ են, թե՞ չեն դիմել` որպես քաղաքական միավոր, այդ դեպքում ես ո՞նց հասկանամ: Ես որոշում կայացնող անձնավորություն եմ, եւ իմ որոշումը քաղաքական հարթության վրա է, խոսքը վերաբերում է պատգամավորին: Ինչպե՞ս եք մտածում, եթե ես առանց մասնագետների եզրակացություն անեմ, ի՞նչ եզրակացության պետք է հանգեմ, չէ՞ որ ես կարող եմ ասել, որ սա վատ գործարք էր, բայց իրավական նորմերով տան, որ այդ վատ գործարքի հետ կապված մեղավորը մյուս կողմն էր: Այսինքն` ես մտնեմ քաղաքական շահարկման դաշտ: Մենք չենք հրաժարվում այդ գործընթացից, մենք ասում ենք՝ թող այս ժամանակահատվածն անցնի: Առաջին անգամ, երբ սա դրվեց քննարկման, մենք տվեցինք դրական եզրակացություն ու մտցրինք մեծ օրակարգ: Ասացինք՝ թող իմանան, որ սա քննարկելու ենք, բայց երբ դուք ունենաք փաստաթղթային կազմը, մենք այն ժամանակ կքննարկենք:
-ԱԺ ՀՅԴ խմբակցությունը հարցը համարում է հրատապ…
-Դե այստեղ էլ գալիս է քաղաքական որոշման խնդիրը, իրենք ասում են՝ հրատապ է, մենք էլ ասում ենք՝ հրատապ չէ: Ի՞նչն է հրատապ, քաղաքական շահարկո՞ւմը: Մենք որ հիմա հելանք, ասեցինք՝ «Նաիրիտ»-ը շատ վատ է, թալանված է, առնողը կառնի՞, թե՞ չի առնի: Իսկ մեզ պետք է, որ «Նաիրիտ»-ն աշխատի, մեզ պետք է, որ չարաշահումներ անողներին բռնենք, մենք էլ ուզում ենք դրա եղանակները գտնել:
-Տեսակետ կա, որ հանձնաժողովի ստեղծումը մերժվել է այն պատճառով, որ «Նաիրիտ»-ում տեղի ունեցածը կապվում է վարչապետ Տիգրան Սարգսյանի եւ նրա եղբոր` Աշոտ Սարգսյանի անվան հետ, որը եղել է «Նաիրիտ»-ի կոմերցիոն գծով փոխտնօրենը: Իրականում նման բան կա՞:
-Ո՛չ, եթե նման բան լիներ, մենք հարցը մեծ օրակարգ չէինք մտցնելու: Երկրորդն էլ, եթե այդ փաստաթղթերում լինեն Տիգրան Սարգսյան, Վարդան Այվազյան անունները, ապա դա մնացած փաստաթուղթ է: Է՛, թող դիմեն իրավապահ մարմիններին, այնտեղից հանեն Տիգրան Սարգսյանի կամ Վարդան Այվազյանի անունը, կամ միջազգային արբիտրաժը չի՞ հանի, թող դիմեն այնտեղ, այնտեղ որեւէ խնդիր չկա անուն-ազգանուն հրապարակելու:
-Բայց ինչո՞ւ է Ձեր ղեկավարած հանձնաժողովը հրաժարվում գոնե առաջին քայլերն անել ինչ-որ բաներ բացահայտելու կամ եղած կասկածները փարատելու ուղղությամբ:
-Հանձնաժողովը նման իրավասություն չունի: Նորից եմ ասում, եթե մենք խնդիր ունենայինք, մենք մեծ օրակարգ չէինք մտցնելու, այսինքն՝ մենք ասում ենք, որ հարցը մենք քննարկելու ենք: Հետո ասում եմ, սիրելի՛ս, դիմի՛ր իրավապահ մարմիններին, ու ասում եմ` արի՛ քննարկենք մի քիչ ուշ, թող բանակցային գործընթացներն ավարտվեն: Այսինքն՝ դա, օրակարգում մնալով, գալու է ու դառնա քառօրյայի հարց, ես չեմ հրաժարվում դա քննարկելուց: Գալիս են ինտերնետում եղած փաստերով… եթե գողություն են անում, մարդիկ գնում են, իրավապահ մարմնին են դիմում, չէ՞: Անգամ եկել է նախարարը, խոսել է իրենց հետ ու ասել, որ հարցը քննարկման փուլում է, խնդրում ենք առժամանակ հետաձգել, իսկ այդ փաստաթղթերը, որոնք կան, արդեն կան, դրանք չես կարող փոխել: Ի՞նչ հրատապության խնդիր գոյություն ունի:
Հ.Գ. ՀՅԴ «Նիկոլ Աղբալյան» ուսանողական միությունը կոչ է արել այսօր՝ ժամը 14:00-ին, լինել ԱԺ-ի մոտ` միասին սատարելու ԱԺ ժամանակավոր հանձնաժողով ստեղծելու` ՀՅԴ խմբակցության պահանջը:

ՍԼԱՔՆԵՐՆ ՈՒՂՂՎՈՒՄ ԵՆ ԱԲՐԱՀԱՄՅԱՆԻ ԵՎ ԾԱՌՈՒԿՅԱՆԻ ԿՈՂՄԸ

«Ժողովուրդ»-ի` իրավապահ համակարգին մոտ կանգնած աղբյուրները տեղեկացնում են, որ սույն թվականի հունվարին ՀՀ քրեական օրենսգրքի 291-րդ հոդվածի հատկանիշներով (ընդերքի պահպանման եւ օգտագործման կանոնները խախտելը) հարուցված քրեական գործը լուրջ ընթացք է ստացել: Մեր տեղեկություններով` մեղադրանքի սլաքներն ուղղվում են դեպի բնապահպանության նախարար Արամ Հարությունյանի եւ նրա մերձավոր շրջապատի կողմը, որոնց անուններով տրվել են ջրօգտագործման թույլտվությունները:

Բանն այն է, որ անձամբ Արամ Հարությունյանն ու նրա մեկ-երկու մերձավորներ են ստորագրել այս կամ այն անձին տրված ջրօգտագործման թույլտվությունները, որոնք շատ դեպքերում արդարացված չեն եղել: Իսկ որոշ դեպքերում, երբ շարքային քաղաքացիներն են ջրօգտագործման թույլտվությունները երկարաձգելու դիմում ներկայացրել, այդ դիմումները կամ մերժվել են, կամ էլ մնացել նախարարության դարակներում: Իսկ ընդերքից եկող ջուրը չի փակվել, շարունակել է հոսել՝ արդեն ապօրինի կարգավիճակով:
Այս եւ շատ այլ ուշագրավ մանրամասներ բացահայտվել է եւ «վերեւից» հրահանգ կա, որ իրավապահ մարմինները մտնեն ջրօգտագործող տնտեսությունները` ստուգելու եւ պարզելու, թե ով որքան ջուր է օգտագործվում, եւ ինչքան են բնությանը հասցված վնասի ծավալները: Բանն այնտեղ է այնտեղ, որ մի քանի օր առաջ ստուգումներ են իրականացվել ԲՀԿ առաջնորդ Գագիկ Ծառուկյանին եւ ԱԺ նախագահ Հովիկ Աբրահամյանին պատկանող ձկնաբուծարաններում եւ հայտնաբերվել է, որ նրանք ահռելի քանակությամբ ջուր են օգտագործում՝ նախատեսված ծավալներից մի քանի անգամ ավելի: «Ժողովուրդ»-ը փորձեց տեղեկությունը ճշտել նրանց ներկայացուցիչներից:

ԱԺ ԲՀԿ խմբակցության անդամ
ՍՏԵՓԱՆ ՄԱՐԳԱՐՅԱՆ

-Պարո՛ն Մարգարյան, տեղեկություններ կան, որ այժմ ստուգումներ են իրականացվում Գ. Ծառուկյանին պատկանող ձկնաբուծարանում, քանի որ այն ընդերքի պահպանման եւ օգտագործման կանոնները խախտել է ու նախատեսվածից շատ ջուր օգտագործել:
-Անկեղծ ասած` տեղեկություն չունեմ. ընդհանրապես ձկնաբուծարաններից որեւէ տեղեկություն չունեմ: Բայց ես վստահ եմ, որ պարոն Ծառուկյանը որեւէ բան չէր անի, որ վնասեր ՀՀ բնությունը, դա վստահ եմ ասում: Ոչ թե նրա համար, որ նա ԲՀԿ-ի ղեկավարն է, այլ ասում եմ որպես անձ, որպես քաղաքացի՝ այդպիսի բան թույլ չէր տա: Այնպիսի բան չէր անի, որ վնասեր, քանի որ որեւէ գործ ձեռնարկելիս պարոն Ծառուկյանը բազմաթիվ մասնագետների հետ խորհրդակցում է, բազմաթիվ ստուգումներ է իրականացնում:
-Իսկ ի՞նչ է նշանակում այդ տեղեկությունը…
-Բազմաթիվ հերյուրանքներ ու մեղադրանքներ կան հենց այնպես: Վերջին դեպքը, որ իբրեւ թե գործարանը ջուրն անջատել էր, ու այն գնում էր Ադրբեջան, դա ո՞ր շարքին դասես: Ի՞նչ ասես, երբ որ հազարներով մարդիկ չեն աշխատում… դա այլ կերպ, քան վնասարարություն ՀՀ-ի տնտեսությանը, չեմ կարող գնահատել: Նման բաներից ես եզրակացնում եմ, որ դրանք քաղաքական ենթատեքստ ունեն:
Հ.Գ. Իսկ ԱԺ հասարակայնության եւ տեղեկատվության միջոցների հետ կապերի վարչության պետ Գոհար Պողոսյանը «Ժողովուրդ»-ին ասաց, որ իրականում նման բան չկա:

Նյութերը` ՍՈՆԱ ԳՐԻԳՈՐՅԱՆԻ

 
ԼՈՒՐԵՐ

ԳԱՂՏՆԱԼՍՈՒՄ ԵՆ

Խորհրդարանում սնկի նման աճում են տեսախցիկները: Այդ սարքավորումները տեղադրված են ԱԺ ե՛ւ հին, ե՛ւ նոր մասնաշենքերի անխտիր բոլոր հարկերում: Բանն այնտեղ է հասել, որ շատ դեպքերում տեսախցիկներն ուղղված են դեպի զուգարանները` հսկելով նաեւ այնտեղի ելումուտը: Տեսախցիկներ են տեղադրվել նաեւ ԱԺ շենքի դրսի պատերին, արդյունքում` պատգամավորները, որոնք գաղտնի զրույցները գերադասում էին վարել բակում, այսուհետ զրկված են այդ հնարավորությունից:
Ի դեպ, տեսախցիկների թեման երեկ արծարծվեց նաեւ ԱԺ նիստում: ՀԱԿ խմբակցության քարտուղար Արամ Մանուկյանն ԱԺ նախագահ Հովիկ Աբրահամյանին հարցրեց, թե ինչ իմաստ ունի «ժուչոկների վրա» մեծ գումարներ ծախսելը: «Տեսախցիկաֆիկացիա է անցկացվում: Ինձ թվում է` ԱԺ-ն պետք է բացատրի` ի՞նչ եք ձայնագրելու, ինչքա՞ն խոսենք, ո՞ւմ հետ, ինչի՞: Մենք ինչ ասում ենք էստեղ, նույնն ասում ենք դահլիճում, հրապարակում»,-ասաց Մանուկյանը: Հ. Աբրահամյանն էլ նշեց, թե այդ ամենն արվում է ԱԺ անվտանգությունն ապահովելու համար. «Ես ոչ մի ցանկություն չունեմ որեւէ մեկին վերահսկելու, դա շատ վատ զբաղմունք է, եւ մենք ավելորդ փողեր չունենք դրա համար»:

ԳԵՂԱՄՅԱՆԱԿԱՆ ԸՆԹԵՐՑՈՒՄՆԵՐ

Երեկ մեկնարկած ԱԺ նիստը լի էր բուռն իրադարձություններով: ՀՀԿ խմբակցության պատգամավոր Արտաշես Գեղամյանը, որ սովորություն է դարձրել Մաքսային միությանը Հայաստանի անդամակցության մասին պարբերաբար գրքեր գրելը, երեկ իրեն հատուկ հանդիսավորությամբ տեղեկացրեց, որ ԵԱՀԿ ԽՎ նստաշրջանում ինքը 6 ելույթ է ունեցել եւ այդ ելույթների տեսագրությունը բաժանելու է պատգամավորներին: Այս անգամ, սակայն, Գեղամյանի ելույթներն ուղղված են Ադրբեջանի դեմ: Ավելի ուշ Գեղամյանը կրկին ձայն խնդրեց ու նույն հանդիսավորությամբ հայտարարեց. «Երեկ գիշեր՝ ժամը 00:41 րոպեին, «Ռեգնում» լրատվական գործակալությունը հրապարակել է իմ հարցազրույցը…»: Անակնկալի եկած պատգամավորները սկսեցին ծիծաղել, իսկ Գեղամյանը շարունակեց իր խոսքը` ԱԺ նախագահ Հովիկ Աբրահամյանին առաջարկելով հանձնարարել համապատասխան վարչությանը` ԱԺ կայքում տեղադրել իր հարցազրույցը: Դահլիճից պատգամավորներից մեկը, չկորցնելով պահը, առաջարկեց. «Պետք չէ այդքան սպասել, մինչեւ սայթում դնեն: Խնդրե՛ք Գեղամյանին, թող հենց հիմա կարդա հարցազրույցը»:

ՉԴԻՄԱՑԱՎ

«Ժողովուրդ»-ին հայտնի դարձավ, որ երեկ աշխատանքից ազատվել է ՀՀ էներգետիկայի եւ բնական պաշարների նախարարի տեղակալ Հովսեփ Շահինյանը: Թե որն է նրա՝ աշխատանքից ազատվելու իրական պատճառը, գաղտնի է պահվում: Վարչապետ Տիգրան Սարգսյանի որոշման մեջ նշված է, որ Շահինյանն աշխատանքից ազատվել է սեփական դիմումի համաձայն: Վերջինս, ի դեպ, ՕԵԿ անդամ է, եւ ուշագրավն այն է, որ այդ պաշտոնին նշանակվել էր ընդամենը 2013թ.: Ասել է թե՝ ՕԵԿ-ական փոխնախարարը չկարողացավ այդ պաշտոնում աշխատել նույնիսկ մեկ տարի: