ՕՐՎԱ ԽՃԱՆԿԱՐ

ԿՈՂՄՆԱԿԱԼ ՀԵՌՈՒՍՏԱԵԹԵՐ
ՀՌԱՀ-ը մի շարք հեռուստաընկերությունների գրություններ է ուղղել`  կապված անհամաչափ բաշխված եթերաժամերի հետ. «Հանրայինի ուշադրությունն ենք հրավիրել այն հանգամանքին, որ իր լրատվական թողարկումներում առավելապես լուսաբանվել է Հանրապետական կուսակցությունը, նույնատիպ գրություն ուղարկվել է «Կենտրոն», որտեղ առավել շատ լուսաբանվել է «Բարգավաճ Հայաստան»-ը, նաեւ «Երկիր մեդիա»` այստեղ առավել եթերաժամանակ հատկացվել է «Հայ հեղափոխական դաշնակցությանը», եւ մեկ գրություն էլ ուղարկվել է «Հ2», որտեղ եւս առավել շատ լուսաբանվել է «Բարգավաճ Հայաստանը»»,-հայտնել է ՀՌԱՀ նախագահ Գրիգոր  Ամալյանը` հավելելով, որ այդ գրությունները նախազգուշացումներ, վարչական տույժեր չեն:

ՎԿԱՆԵՐԻՆ ԲԵՐՄԱՆ ԿԵՆԹԱՐԿԵՆ
Երեւանի Կենտրոն եւ Նորք-Մարաշ վարչական շրջանների ընդհանուր իրավասության դատարանում շարունակվում է Անժելա Սարգսյանի գործով դատավարությունը: Պոռնոգրաֆիկ նյութեր տարածելու մեջ մեղադրվող դերասանուհու նախկին զուգընկեր Կարեն Արայանի փաստաբան Արթուր Ղարիբյանն ասել է, որ արդեն երկու դատական նիստ է հետաձգվում` վկաների չներկայանալու պատճառով: ««Արմենիա» հեռուստաընկերության սերիալում ներգրավված օպերատորները, դերասանները, ռեժիսորները պետք է լինեին, բայց ոչ ոք չէր ներկայացել: Վկաները չեն ներկայանում, հիմա դատարանը որոշում է կայացրել բերման ենթարկել նրանց, դա ոստիկանությունը պետք է իրականացնի»,-ասել է  փաստաբանը: Հաջորդ դատական նիստը նշանակվել է մայիսի 4-ին:

ՀՐԱՄԱՆԱՏԱՐԸ ՁԵՐԲԱԿԱԼՎԵԼ Է
Ապրիլի 18-ին  Տավուշի մարզի Բերդի տարածաշրջանի  սահմանագոտում   հրազենային վնասվածքից զոհված  22-ամյա ժամկետային զինծառայող Զորիկ  Մարգարյանի եւ  վիրավորված  22-ամյա Կարեն Մովսիսյանի  դեպքի կապակցությամբ  հարուցվել է քրեական գործ, կատարվում է  քննություն: Մեր տեղեկություններով`  այդ գործով ձերբակալվել է դասակի հրամանատար, հենակետի ավագ, ավագ լեյտենանտ Լենտուշ Գրիգորյանը:

ԿԱՆՈՆՆԵՐՈՎ
Ապրիլի 19-ին ՀՀԿ-ն գումարել է գործադիր մարմնի հերթական նիստը, որը վարել է  Սերժ Սարգսյանը: Նիստում քննարկվել են քաղաքական քարոզարշավի հետ կապված հարցեր: Որոշվել է  ընդունել  ընտրությունների ժամանակ քաղաքակիրթ մրցակցությունն ապահովող կանոնները (խոսքը ՀՀԿ գործադիր մարմնի անդամ, պատգամավոր Դավիթ Հարությունյանի առաջարկի մասին է-խմբ.) եւ կոչ անել գործընկեր քաղաքական ուժերին եւս դրանց հետեւել:

ՆԵՐՔՈՒՍՏ ԶԳՈՒՄ Է
«Մայիսի 7-ին ՀԱԿ-ը, ԲՀԿ-ն եւ ՀՅԴ-ն դուրս են գալու փողոց` բողոքարկելով խորհրդարանական ընտրությունների արդյունքները»,-կարծում է  թիվ 11 ընտրատարածքում ինքնաառաջադրված, «Արաբո» ջոկատի հրամանատար Մանվել Եղիազարյանը` հավելելով, որ նա ներքուստ այդպես է զգում եւ տեսնում:

ԽԻՍՏ Է ՊԱՏԺԵԼՈՒ
Henaran.am-ի տեղեկություններով` Աբովյանի հարկային տեսչության պետ Lյուդվիգ Ղազարյանն օրերս իր մոտ է կանչել քաղաքի մանր ու միջին բիզնեսով զբաղվող հարկատուներին եւ ասել, որ պետք է քվեարկեն ԲՀԿ-ի օգտին: Հարկատուների մեջ եղել են նաեւ հանրապետականներ, որոնք ըմբոստացել են այդ պահանջի դեմ: Ավելին, հարկայինի պետը «կարգադրել» է արդեն բերել ռեալ ցուցակները, այլապես ասել է, որ մայիսի 6-ից «խիստ է վարվելու խաբողների հետ»: Կայքի փոխանցմամբ` Լյուդվիգ Ղազարյանն Աբովյանի քաղաքապետ, ԲՀԿ առաջնորդ Գագիկ Ծառուկյանի փեսայի`  Կարո Գուլոյանի մտերիմ ընկերն է, եւ միասին են կատարում «ճշգրտումները»: