ՌԴ գործող վարչապետ ու ընտրված նախագահ Վլադիմիր Պուտինը հայտարարել է, որ երդմնակալության արարողությունից հետո կհեռանա իշխող “Եդինայա Ռոսիա” կուսակցության նախագահի պաշտոնից եւ այդ տեղը կառաջարկի Դմիտրի Մեդվեդեւին։ “Մայիսի 7-ին նախանշված երդմնակալությունից հետո ես ճիշտ եմ համարում վայր դնել “Եդինայա Ռոսիա” կուսակցության նախագահի լիազորությունները։ Նախագահի պաշտոնը վերքաղաքական է, ու նա համախմբող դեր պետք է ունենա”,-հայտարարել է Պուտինը կուսակցության ղեկավարության հետ ունեցած հանդիպման ժամանակ։ “Եդինայա Ռոսիա”-ի բարձրագույն խորհրդի նախագահ Բորիս Գրիզլովը տեղեկացրել է, որ կուսակցությունը պատրաստ է պաշտպանել Մեդվեդեւի թեկնածությունը։ Պուտինն իր հերթին հավելել է, որ դա միջազգայնորեն ընդունված գործելաոճ է, երբ “կառավարությունը հենվում է խորհրդարանական մեծամասնության վրա”։ Հիշեցնենք, որ Պուտինն ամենայն հավանականությամբ վարչապետի պաշտոնը կառաջարկի Մեդվեդեւին։
“Եդինայա Ռոսիա”-ի նախագահի պաշտոնը ստեղծվել է 2008-ի ապրիլին, երբ կուսակցության համագումարում փոփոխություններ մտցվեցին կանոնադրության մեջ։ Համագումարի հաջորդ օրն այդ պաշտոնն առաջարկվեց Պուտինին։ Կանոնադրության համաձայն, նա անսահմանափակ իշխանություն ստացավ կուսակցությունում։
.gif)
