Մադրիդի «Ռեալ»-ի նախկին նախագահ Ռամոն Կալդերոնը կարծում է, որ ակումբի հարձակվող Կրիշտիանու Ռոնալդուն հիասթափվել է ակումբի վարած տրանսֆերային քաղաքականությունից:
Ամառային տրանսֆերային պատուհանի ժամանակ «Արքայական ակումբը» լքել են Խաբի Ալոնսոն և Անխել դի Մարիան:
«Ինձ մոտ այն տպավորությունն է, որ Կրիշտիանուն «մինչև կոկորդը կուշտ է» Ֆլորենտինո Պերեսի տրանսֆերային քաղաքականությունից: Երբ նա նոր էր «Ռեալ» եկել, մտածում էր, որ Արիեն Ռոբենն իր համար հիանալի թիմակից կլինի:
Շուտով Ռոբենը վաճառքի հանվեց: 2 տարի անց վաճառեցին Իգուաինին, և Կրիշտիանուին դա նույնպես դուր չեկավ: Անցյալ տարի նա սխալ համարեց Մեզութ Օզիլի հեռանալը, իսկ վերջին կաթիլը դարձան Ալոնսոյի և Դի Մարիայի վաճառքները:
Երբ ես նրա հետ պայմանագիր էի կնքում, նա ասաց, որ շնորհակալ է «Մանչեստեր Յունայթեդ»-ին: Նա այնտեղ հիանալի ժամանակ է անցկացրել: Նրան ամեն ինչ դուր էր գալիս», – ասել է Կալդերոնը:
Անցյալ շաբաթ բրիտանական մամուլը հայտնել է, որ պորտուգալացի ֆուտբոլիստը պատրաստ է վերադառնալ անգլիական Պրեմիեր լիգա:
.gif)
