Օտարերկրյա ներդրումների եւ մասնավոր տրանսֆերտների նվազումն իր ազդեցությունն է թողել նաեւ բանկային համակարգի վրա. «Հայոց աշխարհ»

«Հայոց աշխարհ» թերթը գրում է. «Ազգային վիճակագրական ծառայության տվյալների համաձայն, տնտեսական ակտիվության ցուցանիշն այս տարվա առաջին ութ ամիսներին, նախորդ տարվա նույն ժամանակահատվածի համեմատ, աճել է 4,1 տոկոսով: Աճ է արձանագրվել գրեթե բոլոր ոլորտներում` արդյունաբերական արտադրանքի ծավալը աճել է 0,9 տոկոսով, շինարարության ոլորտում աճը 0,4 տոկոս է, իսկ գյուղատնտեսությունում՝ 4,9 տոկոս: Զգալի աճ է գրանցվել նաեւ առեւտրաշրջանառության ծավալներում` 5,7 եւ ծառայությունների ոլորտում` 6,2 տոկոս:
Երկրի տնտեսության վիճակը գնահատելիս տնտեսագետ Բագրատ Ասատրյանը նշել է, որ բերված թվերն ամբողջությամբ չեն գնահատում Հայաստանի տնտեսության վիճակը. «Կան այլ ցուցանիշներ, որոնք ավելի բնութագրական են: Նվազել են ֆինանսական հոսքերը, խոսքը ե՛ւ մասնավոր ներդրումների, ե՛ւ տրանսֆերտների մասին է: Այս տարվա յոթ ամիսներն ամփոփվել են, եւ արձանագրվել է, որ ունենք ցուցանիշների նվազում: Նվազման միտումներ են նկատվում բանկային համակարգին վերաբերող ցուցանիշներում: Երկարատեւ հատվածում` ավելի քան 10 տարի, բանկային համակարգի ընդհանուր ցուցանիշներում` կապիտալ, ակտիվներ, վարկային ներդրումներ, աճ ենք ունեցել, ընդ որում` տպավորիչ աճ` միջինը 15-20 տոկոս: Այս տարի կիսամյակն ամփոփվել է, եւ մասնավորապես ակտիվների մասով աճ չկա, անգամ կա որոշակի նվազում: Այսինքն` օտարերկրյա ներդրումների եւ մասնավոր տրանսֆերտների նվազումն արդեն իր ազդեցությունն է թողնում նաեւ բանկային համակարգի վրա»»:

Մանրամասները թերթի այսօրվա համարում: