Այսօր նախընտրական քարոզարշավի շրջանակներում ՀՀԿ վերջին մարզային այցելությունը Կոտայքի մարզն էր: ՀՀԿ նախագահ Սերժ Սարգսյանն առաջինը եղավ Աբովյանում: Այստեղ նախագահին դիմավորելու համար հարակից գյուղերից մարդկանց ավտոբուսներով բերել էին: Սերժ Սարգսյանին դիմավորեցին “Նոր գյուղը կատարելու է ճիշտ ընտրություն”, “Ակունքը սատարում է ՀՀ նախագահին” եւ այլ պաստառներով: “Ես կոչ եմ անում ձեզ` եղեք շատ լուրջ ընտրությունների օրը. ավելի լուրջ, քան երբեւէ: Անպայման նկատի ունեցեք, թե որ քաղաքական ուժը կարող է պաշտպանել անձամբ ձեզ եւ ապահովել անձամբ ձեր ու Հայաստանի ժողովրդի բարեկեցության կայուն աճը: Կոչ եմ անում թշնամանքը չավելացնել: Շատ կարեւոր է, որ ընտրություններից հետո մենք լինենք ավելի միասնական: Ես համոզված եմ, որ շատերդ արդեն ձեր դիրքորոշումն ունեք կազմած, բաց ես ուզում եմ, որ դուք այնպիսի ընտրություն անեք, որ ձեր իսկ ընտրությունը ձեր դուրը գա: Բնականաբար, ես եկել եմ այստեղ, որ կոչ անեմ ձեզ` ընտրեք ՀՀԿ-ին”,- ելույթում ասաց Սերժ Սարգսյանը: “Բնականաբար այնտեղ, որտեղ մենք մեծամասնականով թեկնածու չենք առաջադրել, ես կոչ եմ անում ձեզ ընտրել մեր կոալիցիոն գործընկերներին, տվյալ դեպքում` պարոն Գագիկ Ծառուկյանին”,- հայտարարեց ՀՀԿ նախագահը:
.gif)
