ՀՀ առողջապահության նախարար Արմեն Մուրադյանն ընդունեց «Հայկական ակնաբուժական նախագծի» հիմնադիր-նախագահ Ռոջեր Օհանեսյանին և հայաստանյան գրասենյակի տնօրեն Նունե Եղիազարյանին: Նախարարը բարձր գնահատեց Հայաստանում ակնաբուժության զարգացման գործում ՀԱՆ-ի հսկակայան ներդրումը:
«Հայկական ակնաբուժական նախագծի հետ համագործակցությունը ոչ միայն բարի ավանդույթ է, այլև խիստ անհրաժեշտություն: Ուզում եմ անձամբ շնորհակալություն հայտնել ձեր կողմից կատարված աշխատանքի համար»,- ողջունելով հյուրերին նշեց նախարարը:
Հանդիպման ընթացքում կողմերը քննարկեցին համագործակցության հեռանկարներն ու առաջիկա ծրագրերը:
Ռոջեր Օհանեսյանը, անդրադառնալով օրերս Վերարտադրողական առողջության, պերինատալոգիայի, մանկաբարձության և գինեկոլոգիայի հանրապետական ինստիտուտի նորակառույց շենքում հանդիսավորությամբ բացված «Մանկական կուրության կանխարգելման գերազանցության կենտրոնին», շեշտեց, որ այն արտերկրի մասնագետների շրջանում մեծ հետաքրքրություն է առաջացրել:
Օհանեսյանը փաստեց, որ նորաբաց կենտրոնը եզակի է մեջ ոչ միայն Հայաստանում, այլև տարածաշրջանում: Բարձրորակ վերապատրաստում անցած հայ վիրաբույժների և ԱՄՆ բժիշկների շարունակական համագործակցության շնորհիվ բժշկական այս կառույցի աշխատանքը միտված է կուրության կանխարգելման նպատակով բուժման և ծառայությունների մատուցման գերազանցության ապահովմանը: Տեղեկացնելով, որ բացման հաջորդ օրը կենտրոնում կատարվել է ռուս երեխայի վիրահատություն, արդեն իսկ վստահություն է ներշնչում, որ առաջիկայում կենտրոնը գրավիչ կլինի միջին ասիական, եվրոպական երկրների հիվանդների համար:
«Մենք ցանկանում ենք ընդլայնել, հզորացնել ակնաբուժական ծառայությունը մարզերում` հիմնելով նոր բաժանմունքներ»,- նշեց ՀԱՆ հիմնադիր-նախագահը` հավելելով, որ իրենք պատրաստ են ապահովելու ակնաբուժական մարզային ծառայությունների նյութատեխնիկական հագեցվածությունը, կադրերի վերապատրաստումը, իսկ նախարարությունը կաջակցի դրանց տարածքի տրամադրման գործում: Օհանեսյանը նշեց, որ արտերկրի մասնագետների հետ համագործակցության շնորհիվ մարզային բուժաշխատողները հնարավորություն կունենան լայնորեն օգտվել հեռակապի հնարավորություններից` խորհրդակցելով և անգամ բարդ վիրահատություններն իրականացնելով առցանց: Ակնաբույժը հայտնեց, որ նման համագործակցություն է առաջարկվում նաև մանկաբույժների համար, ինչին մեծապես նպաստել է Լոս Անջելեսի մանկական հիվանդանոցի տեսողության կենտրոնի տնօրեն Թոմաս Լին:
Արմեն Մուրադյանը ողջունեց առաջարկը և հավաստիացրեց, որ մարզերի համաչափ զարգացումը ոչ միայն ՀՀ առողջապահության նախարարության, այլև երկրի ղեկավարի անմիջական ուշադրության կենտրոնում է:
Նա նշեց, որ նախարարությունը կարևորում է մարզային մասնագետների վերապատրաստումը, ինչի ուղղությամբ նույնպես լայնածավալ աշխատանքներ են կատարվում: Նախարարն ընդգծեց, որ կարևոր է, որպեսզի արտերկրի առաջատար բժշկական կենտրոններում վերապատրաստում անցնելուց հետո հայ մասնագետները վերադառնան Հայաստան` մասնագիտական գործունեությունը հայրենիքում շարունակելու համար:
Իջևանում կառուցվող ակնաբուժական կլինիկան, որի բացման ժամկետը նախանշված է 2015թ. գարնանը, ակնաբուժական որակյալ ծառայությունները մարզերի բնակչությանն ավելի հասանելի դարձնելուն միտված առաջին քայլն է: Ծրագրի շնորհիվ մարզի բնակիչներն այլևս ստիպված չեն լինի մեկնել Երևան ակնային խնդիրների կամ վիրահատության համար կամ սպասել մինչև շարժական ակնաբուժական հիվանդանոցն այցելի իրենց քաղաք:
.gif)
