«Չեմ կարծում, որ այստեղ կգտնվի պատգամավոր, ով դեմ է, որ ՀՀ օրենսդիր մարմնում լինի կարգ ու կանոն, կարգազանցության դեպքեր երբեք չգրանցվեն, աղմուկ չլինի, մեկը մյուսի տեղը չքվեարկի և առհասարակ լինի փոխադարձ հարգանք»,- այսօր Ազգային ժողովում արտահերթ ելույթի ժամանակ նշեց ԱԺ փոխնախագահ Էդուարդ Շարմազանովը` խոսելով «Ժառանգության» հեղինակած ԱԺ կանոնակարգի մասին օրենքում փոփոխություններ կատարելու նախագծի մասին:
«Այն, որ անթուլատրելի է, որ ՀՀ ԱԺ-ում խախտվի ԱԺ կանոնակարգ-օրենքը, դա փաստ է, բայց ինչքանով ենք մենք ազնիվ: Ինձ մոտ այնպիսի տպավորություն է, որ որոշ մեր գործընկերներ առաջնորդվում են հին հունական հայտնի սկզբունքով՝ «ինչ-որ կարելի է Զևսին, չի կարելի եզին», այսինքն` քարտեր կարելի է վերցնել, պատգամավորներին թույլ չտալ իրականացնել բնականոն իրավունքը, կարելի է տեղից ընդհատել, գոռալ, ապա գալ, այս ամբիոնից 180 աստիճան շուռ տալ, ասել` նիստ վարողը ձայնի իրավունքից ինձ զրկում է: Հարգելի գործընկերներ, եթե ձեզ թվում է, որ իմ ուշքը գնում է ձեզ ձայնի իրավունքից զրկելու, չարաչար սխալվում եք», – նշեց նա:
Շարմազանովն ընդգծեց, որ որևէ մեկին այս դահլիճում հաճելի չէ իր գործընկերոջը զրկել ձայնի իրավունքից: «Բայց մեր դրության մեջ էլ մտեք, կա ԱԺ կանոնակարգ-օրենք: Եթե օրակարգի մասին չեն խոսում` անկախ նրանից կլինի ընդդիմություն, իշխանություն, թե այլընտրանք, նիստ վարողը` կլինի Շարմազանովը, պարոն Սահակյանը, թե տիկին Նաղդալյանը, մենք պարտավոր ենք առաջնորդվել կանոնակարգ-օրենքով»,- տեղեկացրեց նա:
Շսրմազանովն ընդգծեց, որ չի կարելի ամեն ինչ բարդել մեծամասնության ու նիստ վարողների վրա: «Եթե մեզ լսի մի մարդ, ով վերջին մեկ տարին Հայաստանում չի եղել ու միանգամից կլսի ձեր ելույթը` կասի այս Ազգային ժողովն այս ինչ է, օրենքները շըփթըփալով անցկացնում են: Ախր այդպես չէ, իրականությունն ինչու եք խեղաթյուրում», – եզրափակեց նա:
.gif)
