Տավուշի մարզի սահմանամերձ Չորաթան գյուղում օրերս հակառակորդի կողմից հնչեցված կրակոցներից, բարեբախտաբար, տուժածներ չկան: Այս մասին Armlur.am-ին տեղեկացրեց համայնքապետի տեղակալ Քալանթար Քալանթարյանը, ով հավելեց, որ դեպքի օրը բնակիչներն իրենց մեքենայով գնացել էին ավազ բերելու, և կրակոցներն արձակվել են այդ նույն մեքենայի ուղղությամբ: Ք. Քալանթարյանի փոխանցմամբ՝ բազմաթիվ փամփուշտներ են արձակվել, սակայն նշված մեքենային դիպել են դրանցից 8-ը:
«Մոտ 20 օր հանգիստ վիճակ է տիրել: Ոչ մի կրակոց կամ արտառոց դեպք տեղի չի ունեցել: Այդ ընթացքում սահմանամերձ տարածք շատ էինք գնում՝ այգիները մշակելու: Սակայն այգեգործության աշխատանքներն ավարտելուց հետո այնտեղ այդքան չեն լինում: Սակայն վերջերս հակառակորդը կրկին ակտիվություն է սկսել ցուցաբերել»,- ասաց մեր զրուցակիցը՝ հավելելով, որ հայկական կողմը հակահարված է տվել՝ պատասխան կրակոցներ արձակելով նրանց ուղղությամբ:
Գյուղապետարանի աշխատակիցը նշեց նաև, որ տուժողների մեքենան ամբողջությամբ վնասվել է. բնակիչները հասցրել են փախչել, իսկ ավելի ուշ գնացել են մեքենայի հետևից:
.gif)
