Կառավարությունն այսօրվա նիստում դեմ արտահայտվեց Ազգային ժողովի պատգամավորներ Լյովա Խաչատրյանի և Աբրահամ Մանուկյանի՝ օրենսդրական նախաձեռնության կարգով ներկայացրած նախագծին:
Նշենք, որ պատգամավորների ներկայացրած նախագիծը վերաբերում է «Հայաստանի Հանրապետության ընտրական օրենսգրքում լրացում կատարելու մասին» Հայաստանի Հանրապետության օրենքի նախագծին:
Հայաստանի Հանրապետության ընտրական օրենսգրքի 39-րդ հոդվածի 2-րդ մասը սահմանում է այն սուբյեկտների ցանկը, ովքեր չեն կարող լինել ընտրական հանձնաժողովի անդամ: Մասնավորապես՝ ընտրական հանձնաժողովի անդամ չեն կարող լինել քաղաքական պաշտոն զբաղեցնող անձինք (Ազգային ժողովի պատգամավորներ, նախարարներ, համայնքի ղեկավարներ, հայեցողական պաշտոն զբաղեցնող անձինք՝ նախարարների տեղակալներ, մարզպետները և նրանց տեղակալները), հատուկ ծառայություններում պաշտոններ զբաղեցնող քաղաքացիները և սահմանադրական դատարանի անդամները, դատավորները, դատախազները: Նախագծով առաջարկվում է ընտրական հանձնաժողովներում նշանակվելու սահմանափակումը կիրառել նաև «մանկավարժ աշխատողների և «կրթական զործընթացի մասնակիցներ»-ի նկատմամբ:
Կառավարության որոշման մեջ նշված է, որ օրենքում հիշյալ սահմանափակումների հիմքում դրվել են օրենսդրությամբ սահմանված՝ նշված պաշտոնատար անձանց կարգավիճակի առանձահատկությունները, ինչը կիրառելի չէ մանկավարժ աշխատողների և կրթական գործընթացի մասնակիցների համար:
Նշվում է նաև. «կրթական գործընթացի մասնակից այլ անձանց» արտահայտությունը հստակ չէ և պարզաբանման կարիք ունի: Կառավարությունը գտնում է, որ նախատեսվող լրացման անհրաժեշտությունը ոչ միայն առկա չէ, այլև նոր հարցադրումներ է առաջադրում:
.gif)
