Աղջկա ծնողները երկու «բռնաբարողներից» ամուսնության համար ընտրեցին մեկին

ՀՀ Վճռաբեկ դատարանը մերժել է Տավուշի մարզի դատախազության ավագ դատախազ Ա. Թամրազյանի վճռաբեկ բողոքն այն մասին, որ Տավուշի մարզի Հաղարծին գյուղի բնակիչներ Կարեն Ստեփանյանին ու Մկրտիչ Հովհաննիսյանին առաջին ատյանի դատարանն արդարացրել է անչափահասին բռնաբարելու մեղադրանքում (ՀՀ քրեական օրենսգրքի 138-րդ հոդվածի 2-րդ մասի 3-րդ կետ)՝  հանցագործության դեպքի բացակայության  հիմքով: Իսկ վերաքննիչ քրեական դատարանն անփոփոխ է թողել վճիռը: Այս մասին Armlur.am-ը տեղեկանում է դատական տեղեկատվական համակարգից:

Նշենք, որ ըստ մեղադրանքի՝ Կարեն Ստեփանյանը 2012թ. հոկտեմբերի լույս 8-ի գիշերը՝ ժամը 02:00-ի սահմաններում, Տավուշի մարզի Հաղարծին գյուղի հարակից անտառամասում՝ «ՈՒԱԶ» մակնիշի ավտոմեքենայում,  իսկ Մկրտիչ Հովհաննիսյանը 2012թ. նոյեմբերի կեսին՝ գիշերը ժամը 02:00-ի սահմաններում, Տավուշի մարզի Հաղարծին գյուղում «Ֆորդ Տրանզիտ» մակնիշի ավտոմեքենայում նույն անչափահասի կամքին հակառակ, դանակի ցուցադրմամբ և դրանով վերջինիս սպանելու բռնություն գործադրելու սպառնալիքով՝ նրա հետ ունեցել են սեռական հարաբերություն:

Գործի դատաքննությամբ՝ դատարանը, սակայն, հաստատված է համարել, որ գործով ամբաստանյալ, 26-ամյա ամուրի Կարեն Ստեփանյանը 2012թ. սեպտեմբերին համացանցի միջոցով ծանոթացել է գործով տուժող անչափահասի հետ, ով այդ ժամանակ սովորում էր Տավուշի մարզի Հաղարծին գյուղի ավագ դպրոցի 12-րդ դասարանում:

Որոշ ժամանակ անց նրանք որոշել են հանդիպել, և 2012թ. հոկտեմբեր ամսին՝ գիշերը՝ ժամի 02:00-ի սահմաններում, հանդիպել են աղջկա տատի տան մոտ: Նրանք սկսել են հաճախակի հանդիպել, շփվել հեռախոսով և մտերմացել են: Այնուհետև որոշել են ամուսնանալ, երբ աղջիկը դպրոցն ավարտի:

Այդ ընթացքում Ռուսաստանի Դաշնությունից Հաղարծին է վերադարձել Կարենի ընկերը` գործով մյուս ամբաստանյալ Մկրտիչ Հովհաննիսյանը, որի հետ Կարենը ծանոթացրել է աղջկան, սակայն նրանց միջև որևէ հարաբերություն չի եղել:

Հանդիպումներից մեկի ընթացքում Կարենն ու անչափահասն ունեցել են սեռական հարաբերություն, որից հետո նրանց մտերմությունը որոշ չափով սառել է: Վախենալով, որ Կարենն իր հետ ամուսնանալու մտադրությունը փոխել է, աղջիկը 2013թ. հունվարի 30-ին իր ընտանիքի անդամներին հայտնել է, թե իբր 2012թ. հոկտեմբերի 7-ի գիշերը՝ ժամը 02:00-ի սահմաններում, Կարենը` դանակի սպառնալիքով, իսկ հոկտեմբերի 2-րդ կեսին՝ նույնպես գիշերվա ժամը 02:00-ի սահմաններում, Մկրտիչ Հովհաննիսյանը, դարձյալ դանակի սպառնալիքով` տարբեր ավտոմեքենաներում բռնաբարել են իրեն:

Աղջկա ծնողների պահանջով՝ իրենք և Կարենի ծնողները հանդիպել են իրար` իրենց երեխաների հետագա համատեղ կյանքի մասին պայմանավորվելու, սակայն համաձայնության չեն եկել և աղջիկը ծնողների հետ որոշել է, որ պետք է հանցագործության մասին հաղորդում տալ: Տրված հաղորդման հիման վրա քրեական գործ է հարուցվել, և ամբաստանյալներ Կարեն  Ստեփանյանին և Մկրտիչ Հովհաննիսյանին մեղադրանք է առաջադրվել՝ ՀՀ քրեական օրենսգրքի 138-րդ   հոդվածի 2-րդ մասի 3-րդ կետով (անչափահասի բռնաբարություն):