Ազգային ժողովի փոխնախագահ Էդուարդ Շարմազանովը մայիսի 17-ին հանդիպեց Վիեննայի միջազգային հեռուստատեսային երաժշտական 16-րդ մրցույթում` “Դասական Եվրատեսիլ-2012”-ում, 3-րդ մրցանակային տեղը գրաված 15-ամյա քանոնահար Նարեկ Կազազյանին եւ նրա մայրիկին:
Էդուարդ Շարմազանովը շնորհավորեց Նարեկին մրցանակային պատվավոր երրորդ տեղը գրավելու, ինչպես նաեւ հանդիսատեսի եւ ունկնդրի մեծ համակրանքը շահելու համար: ԱԺ փոխնախագահի գնահատմամբ` ակնհայտ է, որ պատանի քանոնահարի հաջողությունները պայմանավորված են նրա երաժշտական ձիրքով, նվիրումով ու հետեւողական աշխատանքով, բայց, անշուշտ, Նարեկի երաժշտական հասունացման գործում մեծ դեր են խաղացել նաեւ միջավայրը, ծնողներն ու ուսուցիչը, որոնք ուղղորդել ու ոգեւորել են նրան:
Էդուարդ Շարմազանովը հավաստիացրեց, որ Հայոց պետությունը հոգածությամբ է վերաբերվում ու միշտ ուշադրության կենտրոնում պահում Նարեկի ու նրա նման օժտված երիտասարդներին, քանզի նրանք հասարակության հպարտությունն են, ու նրանցից յուրաքանչյուրի հաղթանակը նաեւ Հայաստանի հաղթանակն է, իսկ հզոր մշակույթը` մեր երկրի ամրության ու հարատեւության գրավականը:
Նարեկ Կազազյանը շնորհակալություն հայտնեց ջերմ խոսքերի համար` նշելով, որ կրկնակի ուրախալի է, երբ նման գնահատանքի եւ ուշադրության է արժանանում նաեւ իր երկրում:
ԱԺ փոխնախագահը ոգեւորեց Նարեկին, աջակցելու ու սատարելու պատրաստակամություն հայտնեց` նորանոր հաջողություններ մաղթելով նրան:
.gif)
