«ԵՐԲԵՔ ՉԵՄ ՓՈԽՎԻ, ՈՐՔԱՆ ԷԼ ՎՃԱՐԵՆ»

Խորհրդավոր արտաքինով գյումրեցի աղջիկը չէր էլ կարող պատկերացնել, որ ընդամենը երկու տարվա ընթացքում կդառնա հայտնի մոդել: Ներկայումս Լիլիթ Մարտիրոս բեմանվամբ հանդես եկող մոդելը «Ատեքս» նորաձեւության կենտրոնի առաջատար դեմքերից է եւ շատ լավ գիտի իր գեղեկցության արժեքը. «Ժողովուրդ»-ի հետ զրույցում նա նշեց, որ երբեք չի համաձայնի աշխատել ցածր հոնորարով եւ երբեւէ հանդես չի գա մերկ` անկախ առաջարկվող գումարից:

-Հոկտեմբերի 24-ից «Yerevan show 2014»-ի շրջանակներում մեկնարկել են «Yerevan Fashion Week. Golden lace» նորաձեւության ցուցադրությունները, որին մասնակցում եք նաեւ Դուք, Ձեզ ի՞նչ դեր է վստահված:
-Այդ մասշտաբային միջոցառմանը հրավիրված են դիզայներներ, ոսկերչության ոլորտի ներկայացուցիչներ եւ այլ հյուրեր աշխարհի տարբեր երկրներից: Առաջին օրը ցուցադրելու ենք մուշտակներ, ինձ վստահված է նաեւ ներկայացնել դիզայներ Գայանե Մարտիրոսյանի հեղինակած հարսանեկան զգեստը:
-Երկու տարվա ընթացքում հասցրել եք լինել ZARA ապրանքանիշի մոդելներից մեկը, մասնակցել «Oriflame Fashion Night»-ին, «Airfrance»-ի բորդուղեկցորդուհիների զգեստների ցուցադրմանը: Հերթական հաջողությունը ո՞րն է լինելու:
-Իմ մեծագույն նպատակը միջազգային ասպարեզ դուրս գալն է. դրան պատրաստվում եմ՝ շատ մեծ պորտֆոլիո հավաքելով, այլ երկրների գործակալությունների հետ պայմանագրեր կնքելով, բայց հիմնական բնակության նպատակով արտերկիր չեմ գնա:
-Իսկ Հայաստանում Ձեր ֆինանսական պահանջները բավարարվո՞ւմ են: Չէ՞ որ այստեղի եւ դրսի հոնորարներն անհամեմատելի են:
-Իհարկե, դրանք համեմատելի չեն, բայց եթե մոդելը լավն է, նա բարձր է գնահատվում՝ անկախ բնակության վայրից: Առաջարկները շատ են, հատկապես՝ վերջերս: Ինձ համար շատ կարեւոր է հոնորարի չափը: Ես եւ իմ գործակալությունը երբեք չենք աշխատի ցածր հոնորարով. մենք մեզ բարձր ենք գնահատում:
-Ձեր արտաքինի մեջ խորհրդավոր, վայրի ինչ-որ բան կա, դա, թերեւս, Ձեզ շատ է օգնել…
-Շատ են ասում, որ ես կարծես տարբեր ազգերի միքս լինեմ. նման եմ իտալուհու, հնդկուհու, պարսկուհու, իսպանուհու… Բայց ես հպարտ եմ, որ ունեմ նախ եւ առաջ հայուհու արտաքին:
-Գյումրեցի աղջիկն ունի՞ կարիերային առնչվող սկզբունքներ, որոնք անբեկանելի են:
-Ես շատ սկզբունքներ ունեմ, որոնցից մեկն էլ այն է, որ երբեք մերկ հանդես չեմ գա. այդ երեւույթը երբեւէ արվեստ չեմ համարել: Հայկականությունն իմ գեների մեջ է, երբեք չեմ փոխվի, որքան էլ վճարեն:

Զրուցեց ԱՆՆԱ ԲԱԲԱՋԱՆՅԱՆԸ

 
ՍՏԻՊՎԱԾ ՀԻՆ ՀԱՑ ԵՆ ԳՆՈՒՄ, ՈՐ ՍՈՎԱԾ ՉՄՆԱՆ

37-ամյա Քրիստինե Կարապետյանը երկար տարիներ է, ինչ բնակվում է Սեւան քաղաքում: Ունի հինգ անչափահաս երեխաներ: Քրիստինեն վերջերս է ամուսնալուծվել, ինչի պատճառով նրան տանից դուրս են անում:

«Ամուսնուս հարազատները տանից հանում են, որ գցեն փողոց: Ես իմ հինգ երեխաների հետ ուր գնամ: Ո՞վ ինձ կընդունի: Լույսն անջատել են, հինգ էրեխու նպաստը կտրել են: Ես չգիտեմ, թե ո՞ւմ դիմեմ: Ոչ մեկ ինձ չի օգնում»,- թաց աչքերով ներկայացրեց Քրիստինեն:
Անօգնական վիճակում հայտնված բազմազավակ մոր պատմելով՝ իր նախկին ամուսինը ոստիկանական բաժանմունքներից դուրս չի գալիս, քանի որ մշտապես խմած է: «Հինգ երեխաներ ունեմ, որից երեքը գրենական պիտույքներ եւ հագուստ չունենալու պատճառով նախորդ տարվանից չեն հաճախում դպրոց: Տղա երեխաներ են, ես չգիտեմ՝ գնա՞մ աշխատանքի, թե՞ ոչ: Ո՞ւմ մոտ թողնեմ երեխաներիս»,- հուսահատված ներկայացրեց Քրիստինեն:
Նշենք, որ այն տունը, որտեղ Քրիստինեն բնակվում է, տարրական կոմունալ պայմաններից զուրկ է, անգամ տան պատուհաններն ապակի չունեն, իսկ դռները՝ փական: Այս ամենից բացի` սարսափելի խոնավությունից տան պատերն ամբողջովին բորբոսնել են: Քրիստինեի խոսքով՝ լինում է, որ երեխաները նույնիսկ շաբաթներով չեն լողանում: «Իմ էրեխեքը կարտոֆիլից բացի ոչինչ չեն ուտում, իսկ դա էլ այստեղից-այնտեղից խնդրում, բերում եմ: Հին հաց եմ կիլոգրամով գնում, որովհետեւ այդպես ավելի էժան է, ի՞նչ անեմ, էրեխեքիս հո՞ սոված չեմ թողնելու»:
Անելանելի դրության մեջ հայտնված Քրիստինեն իր երեխաների հետ սարսափով սպասում է ձմռան գալուն, որն այս տարածաշրջանում ավելի վաղ է սկսվում:

ՍՅՈՒՆԷ ՀԱՄԲԱՐՁՈՒՄՅԱՆ